Ua ono ai nei o tausaga talu ona tu malosi le kamupani a le Money Shop e lagolagoina le ‘au malosi a le Nations mai le itu i Sisifo o Aukilani. I totonu o lea ono tausaga ua tolu ai foi tausaga o taaalo le Nations i togiga fou sa faatauina mai e lea kamupani latou te faaaogāina i le taamilosaga o le Aukilani Samoa.
Ua toe ofoina mai foi le isi togiga fou i lenei tausaga mo le Nations e pei ona tatala aloaia i le po o le Aso Faraile ua mavae 17 o Aokuso a’o loma ai le amataina o le taamilosaga o le Aukilani Samoa i le Aso Toonai e sosoo ai 18 o Aokuso. E tusa ma le $3500.00 le tau aofai o le togiga e aofia ai le ofu vae, totini ma le jersey, ae o loo iai foi ma le togiga e koleni ai le ‘au a’o lei alo atu mo le taaloga. O le togiga la lea sa fai ai sailiga tupe a le ‘au ma faatauina ai lea e $2,100.00 lona tau aofai.
O le Nations o le tasi lea ‘au malosi i totonu o le Aukilani Samoa lea ua sefulu lua tausaga talu ona faavae mai. E faalua ona latou umia le siamupini o le taamilosaga ae faatolu ona tulai mai i le sailiga o le semi-final. O le tapena atu o le Nations i le taamilosaga o le Aukilani Samoa i lenei tausaga, e 30 tama taaalo o lea ua mae’a ona fai iai le filifiliga a le pulega a le ‘au latou te sailia se ‘ai o le tapua’iga a aiga faapea le komiti faafoe. Ma o tama uma nei e aofia ai tama tuai sa auai muamua faatasi ai ma nisi o alii fou o lea ua latou fia ofuina le togiga mumu a le Nations.
O le po o le Aso Faraile na tatala aloia ai le togiga fou, ma sa auai le faatamā o le ‘au le afioga ia Faumui Ve’a faapea le faatina le faletua ia Miriama Siitia. O le susuga i le a’oa’o ia Tavai Meni na saunia le upu faamalosi mo le ‘au i lea po e tapena ai le amataina o taaloga o le taamilosaga. Saunoa le susuga i le a’oa’o e faapea, e lē o le malosi, e lē o le fitafita ae o le agaga o le Atua latou te mafaia ai mea uma.
Ua uma ona tapena le malosi i le tino e ala i koleniga e faatino ai le taaloga ae tatau foi ona tapena le ola faaleagaga ina ia iloa ona a’oa’oina le amio i totonu o le malae e sili ona tāua lea i le maimoa a tagata ma le silafaga a le Atua. E sili ona lelei o le tagata na te iloa ona pulea lona loto nai lo le tagata na te a’ea le ‘olo.
O le tama taaalo e amio pulea e sili atu ona tāua nai lo se isi lava mea, o nei faamalosi ‘au uma na momoli faatasi lava ma faamanuiaga a le susuga i le alii a’oa’o faatasi ai ma le faatamā o le ‘au le afioga ia Faumui Ve’a faapea le faatina ia Miliama Siitia.
Na saunoa faaopoopo foi le faiaoga o le ‘au le susuga ia Lalau Solo Afioga i lana ‘au e timata ma faamalosi ai pea tama taaalo aua le amataina o le taamilosaga.
O le faletua ia Mandy Momoisea o loo galue nei i le Money Shop o ia lea o loo ala mai ai le tele o fesoasoani mai lea auaunaga mo le Nations e pei ona iai togiga.
Pulega o le ‘au a le Nations
Peresetene – Faaloia Nimo
Sui Peresetene – Wayne Matautia
Failautusi/Manager – Tainau Taotua Polevia
Teutupe – Ueligitone Lia
Faiaoga – Lalau Solo Afioga
