Aoga Maululuga ma Kolisi sa auai i le tatalaina o le vaiaso o le Gagana Samoa

O le gagana Samoa o le meaalofa lea mai le Atua o le measina e putiputi tele i ai soo se Samoa o loo auamau i soo se tafa o le lalolagi. Mai lava i tagata matutua seia oo i fanau laiti e faamemelo lava i lana gagana Samoa aua na o le pau lea o le gagana Samoa i le lalolagi atoa.

O le vaiaso atoa ua mavae na faatāuaina ai le gagana Samoa i totonu o Niu Sila atoa, ma sa molimauina ai le tele o tagata Samoa o loo galulue i totonu o matagaluega eseese a le malo, o pisinisi ma kamupani taitasi ua fai le vaiaso atoa ma vaiaso ua latou faatāuaina ai le latou uluai gagana le gagana Samoa na soifua ma ola a’e ai ae amata loa ona gagana ai. Ua oo foi i totonu o Kolisi ma aoga maualuluga sa latou avea le Aso Sa ma aso ua atofaina e aoga maualuluga uma i fanau ma faiaoga Samoa e faatāua ai le tatalaima o le vaiaso o le gagana Samoa. 

Matagaluega o Faamasinoga a Waitakere

Na faatāua foi e le aufaigaluega a le Matagaluega o Faamasinoga a Waitakere (MOJ Waitakere) aemaise i latou mai tupuaga Pasefika, le vaiaso o le Gagana Samoa. Sa latou filifilia nisi o upu o le gagana Samoa e faamasani ona ta’u ma faaleo i aso taitasi o le vaiaso, e lē gata ia latou talanoaga masani o le aso i totonu o le galuega, ae faapea foi a’o felafoa’i a latou imeli o talanoaga.

Ona faaiu ai lea o le vaiaso o le faatāuaina o le Gagana Samoa a le ofisa i le Aso Faraile, lea na taualuga ai i se taumafataga o meaai Samoa. Sa laeiina foi o laei e masani ai tamaitai ma alii Samoa ona laei i o latou tiute ma galuega i aso taitasi e pei o puletasi a tamaitai ma iefaitaga ma ofutino alo’a o alii. Sa faaali ai foi e nisi o tamaitai o le ofisa le siva Samoa a’o silamiō le aufaigaluega mai isi gagana e aofia ai ma nisi o faamasino o le faamasinoga sa auai.

Aufaigaluega Pasefika a le Faamasinoga Faaitumalo Waitakere

O pesega Samoa, o faafiafiaga faa-Samoa ua avea ma feau tāua o le vaiaso o le gagana Samoa. E oo lava i fanau aoga tulagalua, o aoga amata ua latou lagona uma le tāua o lea vaiaso i totonu o Niu Sila ona ua faatāuaina ai le gagana Samoa. Ae le gata i lea ua iai foi mafutaga ma faalapotopotoga ua galulue faatasi ma faatāua lava le vaiaso o le gagana Samoa. O faletusi ua avea ma nofoaga e fai ai faitauga tusi Samoa a fanau aoga, ao aoga ua fai a latou polokalame Samoa e ala i ava o le feiloaiga o taumafa Samoa ma faafiafiaga e patipatia ai le vaiaso o le gagana Samoa.

O alo ma fanau na fananau i Niu Sila nei ua taulamua i latou i le tele o polokalame i totonu o galuega o loo galulue ai, ae faapea foi i fanau aoga i aoga o loo aotauina ai lo latou poto salalau. O le sini ma le faamoemoe maualuga o le vaiaso ina ia mafai ona faamalosia ai pea matua ma faiaoga e aoao le gagana Samoa i totonu o aiga ma aoga. 

O le gagana Samoa o le tasi lea mataupu ua maualuga lona tāua i totonu o aoga maualuluga e suesue ai fanau aua a latou suega i le faaiuga o le tausaga. A leai se gagana ua leai se aganuu, a leai se aganuu ua po le nuu. 

O le tasi lea mau sa malosi ai le faatāuaina o le gagana i totonu o Niu Sila, ina ia aua nei maimauina le lusi ma le leiloa e tagata o lana gagana ma lona faasinomaga.

Ae o le tāua i tagata matutua o loo nonofo i totonu o Niu Sila o lenei vaiaso ua faatāua ai le gagana Samoa, ona ua fai mai i latou poo fea lava se atunuu o le lalolagi e nofo ma aumau ai se Samoa, e iloa lava le tagata nuu i lana lava gagana, auā e tofu lava le atunuu ma le gagana na aumai e le Atua, e faapena foi la ma Samoa.

E iloa lava le tagata Samoa i lana lava gagana, o le meaalofa na foai mai e le Atua ma o le measina foi a le atunuu e auau i ai e lē mafai ona mavae. 

O le gagana muamua foi lea na amata ona aoaoina ai le tagata ina ua fanau mai, aua ana leai se gagana Samoa e leai se gagana lona lua poo le faaperetania lea ua tele tagata ua gagana ai e avea ma a latou gagana lona lua. O tausaga uma lava ua faamalosia ai lava le faamanatuina o le gaga a Samoa i totonu o Niu Sila.

Tatau Academy ma le La O Samoa Academy i le faamanatuina o le Vaiaso o le Gagana Samoa