Ua faagasolo polokalame a le Iuni Lakapi a Samoa e saga unai taamilosaga o le lakapi i aoga a le atunuu. O le faaiuga o le vaiaso na faatautaia ai se taamilosaga o le lakapi taitoa 7 i fanau aoga o aoga a le malo ma aoga umia tumaoti i le itumalo o Faleata.
O se polokalame na fesoasoani i ai le afioga Muagututia Sila Vaifale, Galumalemana Rudolph Moors ma Potu Leavasa, o sui tuai uma o le Manu Samoa ma o alo foi faasino i le itumalo o Faleata ina ia unai lenei taaloga i le fanau laiti.
O le talitonuga o le Iuni aemaise foi i faiaoga, ona pau lava lea o le auala e mautinoa ai le maualuga o le itu tau i taleni e maua e alo o le atunuu i taaloga faapenei, o le amata mai o tausinioga a o laiti.
O le taamilosaga la na faatautaia ai taaloga a alii faapea ai ma au a teine mai i le ono tausaga i le 13 tausaga le matutua.
E silia i le to‘a 200 fanau a Faleata na faapea ona tausinio ae na faaalia e le sui tuai o le Manu Samoa, le susuga Potu Leavasa le maofa i le maualuga ua oo i ai le iloa o le fanau laiti i lenei taaloga i le faatautaiga o le taamilosaga lea a aoga i le itumalo o Faleata.
O le sailiga siamupini na manumalo ai le aulakapi taitoafitu a le aoga laititi a Vailoa i le la fetauiga ma le aoga laititi a Vaimoso ae manumalo le au a teine mai i Lepea i le la taaloga ma le au a teine a le Robert Louis Stevenson mai i Lotopa.
O le faamoemoe e saili mai i au nei e 10 i Faleata se au a le itumalo i alii ma tamaitai ma saili ai ma isi itumalo le siamupini mo le sailiga siamupini i le atunuu atoa auā le ipu a le Palemia.
O loo faagasolo polokalame atiae o le lakapi i itupa uma e lua i aoga i Upolu faapea ai ma Savaii. Faato‘ā taliu mai foi le Bluesky Manuiti i sana taaloga i Niu Sila.
O le au lea na fili mai i tama aoga o aoga laiti i le atunuu ma o se vaega o polokalame atiae o le lakapi ua faatautaia e le Iuni Lakapi a Samoa i aoga uma a le atunuu. O le amataga la lea o lea foi polokalame ua faatautaia i le tele o aoga i le talafatai o le taulaga o Apia ma le faamoemoe ua faalauiloa nei e le Alii Minisita o Aoga Taaloga ma Aganuu, le Afioga Magele Mauiliu Magele, o le a faalautele atu lenei tausinioga i fanau aoga i nuu i tua aemaise o le motu tele i Salafai ma o le a fili mai ai iina se au e agai lava i fafo i tausaga o lumanai e saga unai ai le taaloga lenei o le lakapi a le fanau laiti.
Ae mo le fanau i Faleata, o le faaiuga o tausinioga na vaaia ai le faanaunautaiga ina ia toe faatino se isi taamilosaga mo fanau lava ia o loo i aoga i totonu o lenei itumalo ma e le gata i le saga unai ai o le taalo lakapi i fanau tama ae faapena foi i fanau teine ua iai le fiafia i lea foi faagatama.