E fai o le tele o isi taaloga o loo faagasolo i le taumafanafana e pei o le taamilosaga kilikiti faasamoa ma le faapapalagi atoa ai ma le anoanoai o isi taaloga o loo mafuli i ai le taumafanafana ae o loo filo ai foi ma le tulaga o nisi o taaloga Lakapi o loo finau ai le Aulakapi a le New Zealand Samoa o loo pulea ma vaaia e nisi o taamalii Samoa.
I le faaiuga la o le vaiaso na se‘i mavae atu, na faataunuuina ai ni taaloga lakapi a tamaitai. O le taaloga muamua i le taamilosaga ua faaigoaina o le Northern Regional Maori Competition (Te Hiku Te Ika), na feiloai ai New Zealand Samoa ma Northern Maori (Ngapuhi). E faapea se faamatalaga o le uluai taimi lea ua ulufale ai Samoa i lenei taamilosaga.
Na vaaia le mataina o le uluai taaloga a New Zealand Samoa ma Nothern Maori, ma manumalo New Zealand Samoa e 29 i le 17 a Northern Maori. O le aoauli o le Aso Sa na se‘i mavae atu na feiloai ai New Zealand Samoa ma le Au malosi a Auckland Maori (Tamaki Makaurau).
O le ‘au a Auckland Maori o loo filifilia mai ai nisi pe o loo taaalo mai ai nisi tamaitai e toatolu o loo filifilia i le Au tele a Niu Sila le Black Ferns. Na lei avea le iai o nisi o le Black Ferns i le Au lenei a Auckland Maori e laveaina mai ai i le malolosi tele o le Au a New Zealand Samoa.
Na vaaia le faafiafiaina o le tamaitai Faiaoga ia Vania Lavea i le taaloga e le gata i le faaaogāina o metotia talafeagai i le taaloga ae o le faataunuuina o le taaloga i taimi o osofaiga, o se vaaiga siitia o le taaloga i le tomai o le faiaoga ia Vania Lavea, faatasi ai ma le atamai faatino e le tamaitai ia Johanna Su‘a, Kafa Tilialo ma le taumafai foi a Bella Milo.
O le Au a New Zealand Samoa i se vaavaai atu i ai, o se Au malosi i lenei taamilosaga. O loo iai le faamoemoe o le aso 2 o Mati e toe faia ai isi taaloga faaiu i Waitemata Rugby Club ae faasauni atu ai i taaloga i le Northern Regional Maori Competition i le isi vaiaso i tua atu.
O se vaaiga la lenei i le Au filifilia a New Zealand Samoa:
Faamoana Leilua (C), Alaisalatemaota Bakulich-Leavasa, Rona Mulitalo, Fiaoo Faamausili, Cynthia Apineru, Regina Sheck, Contessa Wright, Cynthia Ta‘ala, Piuti Samuelu, Fono Schmidt, Kafa Tilialo, Genia Muavae, Cynthia Lilii, Sally Asiata-Kaokao, Justine Lavea, Salote Otutaha.
(Backs): Tulua Leuluaialii, Amanda Cahill, Bella Irene Milo, Umu Sao-Taliu, Peka Sao-Taliu, Naite Faitala, Johanna Su‘a, Montana Taogaga, Kalesha Kasipale, Faasea Sao-Taliu, Sosefina Petelo, Roseanne Leaupepe, Justine Manaia, Mele Leuluaialii.
Darryl Suasua (Head coach), Vania Lavea (Backs Coach), Nick Bakulich (Manager), Dr Neru Leavasa (Medic), Megan Lupe (Physio), Stephen Ah Chong (Trainer), Reynold Slade (Hydration Monitor), Rev Fei Taulealeausumai (Chaplain).
O iuga ia o taaloga na faamanuiaina ai le New Zealand Samoa:
Aso Toonai, 9 Fepuari: NZ Samoa vs Northland Maori (Ngapuhi), Old Boys Rugby Club, Whangarei
NZ Samoa 29: Mele Leuluaialii 2, Tulua Leuluailii, Amanda Cahill, Faasea Sao-Taliu tries. Bella Milo 1conv, Umu Sao-Taliu 1.
Northland Maori 17
Aso Sa, 10 Fepuari: NZ Samoa vs Auckland Maori (Tamaki Makaurau), Liston Park
NZ Samoa 53: Faasea Sao-Taliu 2, Mele Leuluaialii 2, Salote Otutaha, Contessa Wright, Fono Schmidt, Piuti Samuelu, Johanna Su’a tries. Bella Milo 2 conv, Umu Sao-Taliu 2.
Auckland Maori 10
Talosia le taumafaiga a nei foi alo tamaitai o le atunuu ina ia a‘e ma le manuia faiva i taaloga o loo feagai ai aemaise lava le tau atinaeina lea o le taaloga o le Lakapi i le itupa o tamaitai.
E toe maua atu se isi faaopoopoga o ia taaloga i lomiga o loo lumanai nei aemaise le taamilosaga.
