Malosi fualaau faasāina i Aoga ma pusameli

Ua lē toe po se lilo i Sini ma Ausetalia nei i le tele o seleni e maua i auala eleelea a kegi ma tagata faatau fualaau faasāina i luga o auala ma faatau i tagata e masani i ai. Ua loa foi tausaga ma o le tele lava o atunuu o loo faia pea lenei solitulafono e ui i le mamafa o faasalaga.
I Sini nei ma isi Setete o Ausetalia ua ripotia mai le agai atu o nei faatauga fualaau faasāina  i totonu o aoga tulagalua (public Schools) ma lafo mai i pusameli o ni meli puipuia.
O le tausaga talu ai e toatele ni tamaiti aoga tulagalua na fesiligia e leoleo ina ua maua ai fualaau pei o le mariuana lea e taatele. O le isi fualaau taatele o le ecstacy lea e tele ina faaaogā e tupulaga ma tagata sisiva ma pepese e suia ai o latou mafaufauga ma lagona i taimi e felelei maualuluga ai.
O le isi fualaau taugofie o le aisa (methamphetamine) lea e gaosia mai totoga o panadols ma fualaau faapena ma ua mafai lava ona gaosia i maota ma laoa. O le ituaiga fualaau faasāina taugata i le maketi o le cocaine e pei ona lausilafia lea ua toatele tagata taaalo iloga ua molia i lo latou faaaogāina.
O se vaega toatele o nei tupulaga Samoa i Sini ma isi setete o alo ma fanau Samoa ua molia ma taofia i nofoaga saisai  ma falepuipui e pei ona faailoa mai e se pepa o faamatalaga mai le Ofisa o Tulafono a Ausetalia.
E lē gata i lea o le faatauina lea e tagata lautele o soo se fualaau i luga o le upega tafailagi ma momoli sa‘o mai lava e auala mai i meli puipuia. Ua siitia le numera o moliaga mai lenei faiga fou lea e faafetaia ai taifau sosogi o loo sailia ma maua nei meli i totonu o falemeli.
O loo gugulu pea Sini i le maliu o le alii talavou ia Henry Kwan na o le sefulufitu ona tausaga ae faamuta lona soifua e le fualaau matautia o le LSD.
“O Henry o se atalii atamai i le aoga ma sa DUX foi, e sili lava o ia i lana vasega ma o ana tapenaga mo suega na faatauina atu ai e se tasi lenei fualaau e fesoasoani ai i le tapenaga o meaaoga,” o le saunoaga lea a lona tamā faavauvau.
I faamatalaga na folasia i le ripoti i leoleo, na taunuu atu i le fale Henry Kwan ua sasao le fualaau ma ia ta‘u i lona tina ma lona tuafafine ua mafai ona lele mai lo latou fogafale tolu e ui ina fiu si ona tina ma lona tufafine e vaovao ma iu ai lava ina oso i lalo ma maliu ai.
O lea ua lapatai ai e leoleo Faiaoga ma mātua ina ia mataitūina uo ma ē militino ma fanau i taimi uma ma ia aua ne‘i talanoa i tagata faatau fualaau faasāina faapenei auā e oo uma lava nei faafitauli i soo se tasi pe a lē mataalia.