I le silia i le fāsefulu tausaga o galue i le galuega faafaifeau mo le fafagaina o agaga o tagata i le upu o le ola ma le talalelei, ae ua lē fia nofonofo ai pea le susuga i le faafeagaiga ia Popo Su‘a ma le faletua ia Epenesa Su‘a faapea lona aiga i le fia faaauau pea o le soifua tautua.
E lē o le galuega faifeau la lea ua iai nei, ae o le galuega tau pisinisi mo le auauna atu pea i le atunuu e pei ona tatala ai se pisinisi a lona aiga o se faleaiga. Ua faaigoa le pisinisi lenei i le faaupuga o le tulafono sefulutasi poo le eleventh commandment. I le saunoaga a le Susuga Popo poo le faifeau malolo penisione manumalo o le ekalesia EFKS, na ia faaalia ai, e sefulu tulafono a Mose, ae o tulafono uma e fesootai ma le fafagaina o agaga o tagata i meaai faaleagaga. Peitai o le tulafono e sefulutasi ua faaigoa ai lona faleaiga e fesootai ma le fafagaina o tagata i taumafa sili ona saogalemu ma lelei mo le tausia o le soifua maloloina ma maua ai le malosi silisili.
O le afioga i le Palemia Susuga Tuilaepa Lupesoliai Sailele Malielegaoi na ootiina le lipine e tatala ai lenei faleaiga fou, ma ua ta‘utino le susuga Popo o le a mulimulitai i le fautuaga a le taitai o le Malo, ia iai se pisinisi faapea i le atunuu e faalauiloaina taumafa Samoa i ni faiga sili ona lelei mo le soifua o tagata aemaise o tulisi tafafao mai i le atunuu.
E 250 afe tala le tau o lea atinae ma e pei ona silafia o le susuga Popo Su‘a ma le faletua sa galulue i le tele o tausaga i le ekalesia EFKS i Porirua i Ueligitone Niu Sila, ma ua malolo penisione lea ua toe taliu ai i le atunuu ma faamautu ai.
