Na atagia le lototetele o le Toa Samoa i lana taaloga o le Ipu o le Lalolagi ma Niu Sila e ui e tele tusitusiga na manatu ai nisi o se ‘au vaivai le ‘au a Samoa i le tauvaga. O le toatele foi o tama manunu‘a e aofia ai Steve Matai, Roy Asotasi ma Harrison Hansen ae lei amatalia le taamilosaga na atili masalomia ai lenei popolega.
E ta le ‘afa ua sili le Kiwi 22-4 a le Toa Samoa mai se sikoa a Ben Roberts ma atili seki ai Niu Sila mo se lami tele i sikoa a Hoffman, Simon Mannering ma Roger Tuivasa Sheck lea na filifilia e Samoa ae fulitua i le fia taalo mo Niu Sila.
E lua sikoa a Manu Vatuvei i le amataga o le ‘afa lona lua faapea Isaac Luke ma sili atili ai le Kiwi ae faatoa osofai malosi mai loa le Toa i se sikoa mataina i le minute 53 a Joseph Leilua, sosoo ai ma Penani Manumeasili faapea Suaia Matagi ae tatao atu ai ma le sikoa a Anthony Winterstein mo ‘ai e 24 a le Toa Samoa.
E ui na toe sikoa Vatuvei ma manumalo ai Niu Sila e 42-24 ae na mataina atu le toe osofai a le Toa Samoa i le afaina o le Kiwi ia latou pue malolosi aemaise lava Mose Masoe. Na pepese ma patipati le ‘au tapuai a Warrington mo le Toa Samoa i le ‘afa faaiu ma siitia ai le taaalo a tama. Sa faapea na atili leoleoā i le sikoa a Sonny Bill na misi.
I luga o le facebook na alalaga faatasi Samoa i soo se itu o le kelope i le mataina o le taaloga e ui na faiaina Samoa. Ua mautinoa ai nei e telē se avanoa e ono sao atu ai le Toa pe a malo ia Farani ma Papua.
O se vaega o le a tagai i ai le pulega o le osofai mai le amataga ma faaleleia la latou kiki polo. Na iloga foi le lotonuu o tama fou ma nai uso na tauaveina mai le fu‘a mai le taaloga ma Toga ia Aperila.
O lenei taumafaiga a le Toa ua faailoa ai o ai lava le tama taalo e ofu i le lanu moana a Samoa ua ofo e tautua mo le tapuaiga. Na faaalia e Mose Masoe i luga o le Twitter i le uma o le taaloga, “O le asō na ou ofuina ai laei o le Toa Samoa mo o‘u mātua ma le tapuaiga. Matou te lei manumalo ae ua mitamita o matou agaga i le faamalieina o lau tapuaiga i le taaloga. O se aso lenei ua faafiafiaina ai foi matou tama taaalo, ma e momoli atu ai le faafetai tele mo lau tapuaiga,” Mose Masoe o le Toa Samoa.
