O fea ua alu i ai tupe o le galulolo, ae o loo mafatia pea le tele o aiga i Aleipata ma isi alalafaga?
Ona pau lava lea o le fesili faigofie a John Campbell ua mafua ai le vevesi, ma ua lagolagoina ai e nisi le Palemia o Samoa, ae matuā toatele foi isi o loo lagolago ia John Campbell.
Na faaalia e John Campbell i lana faatalanoaga ma le Radio Samoa e faapea, e faigofie tele lana fesili sa taumafai atu ai ia Tuilaepa, peitai ua lē mafai ona tali sa‘o mai. E lē o se suesuevale, ae sa fia mautinoa se vaevaega mai e le Palemia o atinae uma ua faaalu i ai le seleni. Sa faavae foi lana suesuega ona o fuainumera sa faamatuu mai e le Sui Palemia, Misa Telefoni i le talanoaga muamua.
Atonu o le a e maua ma pueina le uiga moni o fesili a le alii faasalalau a Niu Sila, faapea ai ma nisi o faipule o le maota fono a Samoa, i vaega o le lipoti o le a ta‘ua i lalo.
Levaopolo Talatonu Vaai, sui faipule o Gagaemauga Nu 2
Na faaalia manino e le faipule o le itumalo o Gagaemauga Nu 2, Levaopolo Talatonu Vaai, lona lagolagoina o le mau a le alii faasalalau o le televise tolu a Niu Sila, ae na te matuā teena pea faamatalaga uma ua faamatuuina e le alii Palemia o Samoa, Tuilaepa Aiono Lupesoliai Sailele Malielegaoi.
Ua mafua ona toe lagaina ma faaalia le lē fiafia o le sui a faipule o Gagaemauga Nu 2 i le taitai o le atunuu, talu ai o sana saunoaga sa faia i le talanoaga ma le Radio Samoa i le po o le Aso Tofi, 28 o Oketopa i Niu Sila. O le saunoaga a Tuilaepa sa ta‘ua ai ma faasaga i le alii faipule e faapea, ua lē mafai e le faipule ona tali atu ia John Campbell, ona toe telefoni ane lea ia te ia na te faia le talanoaga.
E faia le talanoaga lea ma le saunoaga a le taitai o le atunuu, a o iai Levaopolo i Niu Sila nei, ma sa ia faafofoga manino i ai i lea faamatalaga, ma ua ia faaalia ai lona faanoanoa tele, ma lona lē fiafia ia Tuilaepa. Sa ta‘ua e le alii faipule, e matuā mamao i sini ma eseese tele le mafuaaga na vili ai ma talanoa i le Palemia, a o sauni atu John Campbell i lana malaga i Samoa, mo le faia o ana suesuega ma ana faatalanoaga.
Peitai ua faaalia e Tuilaepa ma tuuaia lona sui i se faamatalaga lē sa‘o ma le talapelo ua aafia ai lona finagalo mamā ma le lotonuu moni sa mafua ai ona ia tuuina le mataupu i le Palemia e tali pea i le alii faasalalau ina ua taunuu atu i Samoa. Saunoa Levaopolo e faapea, na mafua ona lē talanoa i le mataupu lea, ona talu ai e manumanu i le igoa pele o Samoa, ma e malamalama lelei i le feau sa ia momoli ia Tuilaepa.
O lona talitonuga e lē fia pulou i lona pulou o ia o se sui o le Itu Agai i mataupu faapea, ae manumalo ia te ia lona silasila i le tauleleia ma le igoa o lona atunuu.
O le ala tonu lava lea sa mafua ai lona manatu, ma sa manao ai ina ia tutufaatasi ma le Palemia ma le malo e puipui ma lagolago se saunoaga o le a saunoa ma tali ai le alii Palemia.
O faiga ia ma tu faaaloalo e lē aveesea e se tasi, poo ā lava faamatalaga ma eseesega faavaega faaupufai i totonu o le Palemene, peitai o le mau a Samoa, e tasi lava le aiga e soifua mai ai.
O lona foi lea talitonuga, o mataupu faapea ma le va i fafo o Samoa ma isi atunuu, e ao ai ona tutufaatasi ma le manatu e tasi ma faaaloalo pea i lē o loo taitai i le atunuu.
E ui i lea manatu sa ia te ia, peitai ua sopo loa ma ua lē silasila le alii Palemia, i le agaga moni ma le autū, aemaise ai o lona pipii pea ma lona militino faatasi ma le malo i lea taimi. O le taufaaleaga o Tuilaepa i lona tagata ua avea o se ta ma se u maai ua tuia ai lona fatu, ma o se faailoga lea o le lē amanaia o le ava fatafata sa tatalo ai i le taitai o le malo.
O le lē fiafia o le alii faipule, sa ia tapā ai le Samoa Times, e sasaa i ai le tiga o lona finagalo, ma faasoa i ai lagona manumanu ma le alofa sa manatu e tatau ona faaleo e le palemia, peitai sa le o lea lana faalogo a o saunoa Tuilaepa i lana taimi masani i luga o le Radio Samoa.
O le tiga tele o le alii faipule, ua ia faamatuuina ai loa ma se tasi o lipoti maumaututū, sa faamatuu ane e se tasi o le ofisa o tupe a Samoa, ma o le lipoti tonu lea o loo faavae ai isi mau a le alii faasalalau a Niu Sila. O le lipoti foi lava lea e tasi ua taulimaina nei e le Samoa Times.
I totonu o se vaega o lea lava lipoti tusitusia, e talitonu le faipule o Gagaemauga Nu 2, ua iai nisi o vaega tāua ua toe suia e le Palemia ma le Malo. E mautinoa e le faipule o se isi vaega tele o lea lipoti o le tupe, o loo atagia ai le taumafai o le Malo, e tau faatutusa tupe ua faaaluina ma galuega ua faatinoina, ma isi atinae e lei faatinoina lava peitai ua mae‘a ona tuu i totonu o lea lipoti faaletupe.
O le lipoti lava lea e tasi sa tolaulauina i luma o le Palemene i lana fonotaga mo le taimi muamua lava na tapā ai se tala o le tupe mo le galulolo. O le mae‘a o le sunami mai ia Setema e oo mai ia Fepuari o le tausaga nei, o le vaitaimi tonu lea sa ta‘ua i le tala lea o le tupe faapitoa lava mo na o le galulolo. O le mae‘a ona tolaulauina o lea lipoti i luma o le fonotaga a le Palemene, sa ave loa i ai le lagolago a sui uma o le maota, ma pasia ai loa mo le faataunuuina o mea taitasi sa ta‘ua i le lipoti.
O le faamoemoe o se isi fonotaga i se taimi e lei mae‘a lenei tausaga, e tatau ai ona toe oo atu lea lava lipoti, mo le toe ioeina e sui o le maota, pe afai ua faataunuuina le tele o polokalame faaleleia o le galulolo sa fuafuaina ma pasia muamua.
O le vaega tonu lava lea e manatu ai Levaopolo ma nisi o sui, e lē toatele ua latou mauaina le lipoti lona lua lea, ua lape ai le faatatau ma le faasoasoaina e le malo o tupe o le galulolo. E matuā telē sona faaletonu o loo iai i totonu o le lipoti lona lua lea, e pei ona saunoa i ai le sui faipule o Gagaemauga Nu 2.
E pei ona faailoa atu, ua taulimaina e le Samoa Times faamaumauga uma ia e pei ona vevesi ai ma fesiligia e le alii faasalalau a Niu Sila le Palemia o Samoa.
Auiliiliina o le lipoti o tupe o le Tsunami Setema 2009 – Fepuari 2010
O nisi ia o vaega tetele o lea lipoti e faavae ai le mau a Levaopolo ma isi, ma o loo ilitata i ai taofi ma finagalo. O tusitusiga uma foi nei e faavae i fuainumera ma faamaumauga tusitusia o loo i totonu o le lipoti, faatasi ai ma le ioeina e le sui faipule o Gagaemauga Nu 2, Levaopolo Talatonu Vaai.
Housing/Fale (Iva miliona tala)
E iva miliona o loo faamauina i le tala faapitoa e pei ona pasia e le Palemene, o le tupe e toe fausia ai fale o i latou sa faaleagaina. E tusa ma le 347 fale sa faailoa e le malo e faaagaga i ai le iva miliona e pei ona ta‘ua. E lei mafai ona vaevaeina le faaaogāina o le iva miliona tala sa ta‘ua, e tusa ai ma le faaaliga a le malo.
Peitai o se suesuega na maua mulimuli ane, sa faamaonia ai e 50 fale sa fausia e le polokalame a le Ekalesia Katoliko, e 40 fale sa fausia lava e fesoasoani a le Ekalesia Mamona, ma le isi 40 na fausia e le kamupani ma le faalapotopotoga a le Caritas. O lona tuufaatasiga e 90, ma o fale uma ia e lei alu ai se tupe o le 9 miliona tala e pei ona faamauina i le lipoti, e tusa ai ma le molimau a le sui faipule.
O lona uiga e na o le 257 fale sa fausia e le malo, ma na pau ia o fale sa faaaogā i ai le seleni e pei ona faatulagaina. E pei ona silafia sa manino lava foi i nisi o lipoti sa faamatuu muamua mai e le malo, o loo ta‘ua ai le 18 afe tala, o le vaega tupe lea e laugatasia uma ai aiga uma mo le fausiaina o le fale e tasi. E faigofie la ona silafia pe a faatele le 257 fale i le 18 afe tala le tau o le fale e tasi (257 x 18,000 = 4.62 miliona tala).
O loo fesiligia poo fea le isi 4 ma ona tupu miliona tala ina ia tausisia ai le 9 miliona o loo ta‘ua i le lipoti. O le fesili a le alii faasalalau John Campbell, O fea ua faaaogā i ai tupe o le galulolo sa faamealofa atu, a o loo vaaia pea le tulaga maualalo o le tele o aiga i Aleipata ma isi alalafaga.
O fale sa fausia e le malo, sa faaaogāina ai le faalapotopotoga mai Niu Sila le Habitat for Humanity. O se faamatalaga mai lea foi kamupani agalelei sa malaga atu i Samoa, e faapea sa faatupeina lava e i latou le aumau ai mo le vaitaimi atoa sa iai i le atunuu. E lē gata i lea, sa fai lava foi a latou sailiga tupe mo le faaatoaina o tau o le fausiaina o fale, ona e lei lava seleni na ofo ane e le malo mo lea fuafuaga.
Leitio Faasalalau a le atunuu (lua miliona tala)
E 4 miliona tala na faaalu mo le sifiina ma le suia o le nofoaga fou ua faaaogāina nei e le leitio a le atunuu. E fesiligia lea fuafuaga a le malo, pe aisea ua faaaogā ai le tupe o mealofa o le sunami mo le toe suia o le nofoaga o le leitio e pei ona iai nei, atoa ai ma le faatotogaina ma isi galuega toe faaleleia.
E fesiligia pe na faaleagaina le leitio i le galulolo ma le sunami. O le tasi lea o vaega o le lipoti e lei oo i le Palemene ma e lei ioeina foi e sui o le maota, peitai ua faia lava i le pule ma le faitalia a le malo.
E mafua ona teena e Levaopolo ma isi lea tulaga, talu ai o le poloketi lea a le malo ua leva ona fuafua mai, peitai ua faaofi i totonu o le tupe o meaalofa o le sunami e faatino ai, ma o se faiga lē amiotonu tele lea. E tatau lava ona faatino e le malo ana galuega faapea ma lea poloketi, mai tupe o le paketi a le malo lava, ae lē aafia ai tupe o le galulolo.
E manatu le sui a faipule, o tupe uma lava sa faamealofa atu mo le galulolo, sa tatau lava ona palasi tonu ma faaaogā mo le toe fausia o aiga ma alalafaga sa faaleagaina i le sunami. O le isi lea mafuaaga o le teena pea o lea lipoti a le malo.
O le tasi foi lea o vaega sa mafua ai le fesili a le alii o John Campbell, O fea ua faaalu i ai le isi vaega tupe tele o meaalofa o le galulolo (Where’s the money gone?)
E fai si tele o isi vaega o loo iai i le lipoti lenei, peitai e fai si lavelave mo le faitau a le atunuu. Ae o vaega e lua e pei ona ta‘ua e sili ona taulalata mai ma faigofie ona manino i ai pe a faitauina. O se ata atoa lea o le nunumi ma le lē manino o fuainumera ma lona faaaogāina e pei ona fesiligia ai e le alii tusitala o Niu Sila.
E malosi le talitonuga, e lē tatau lava i le malo ona tuuina a latou galuega ma poloketi i totonu o le fuafuaina o tupe faapitoa sa faamealofa atu mo le galulolo, atoa ai ma lona faaaogāina. O le vaega tonu lea o loo nunu ai le toau, ma ua felefele ai le mataupu. I le ma lea, e lē tatau foi ona fuafuaina se vaitaimi umi e pei ona faatulagaina agai i ai tupe, auā e lē o le mafuaaga lea na mafua ai ona fesoasoani atu atunuu i fafo, ae ia palasi tonu mo aiga sa sili ona mafatia.
E ui i lea, o le manatu lea o le alii faipule ma nisi o sui o le maota e pei ona faaalia e le tofa ia Levaopolo Talatonu, peitai atonu e ese foi le faitau ma le silasila a le malo i le fuafuaina ma le faaaogāina o ia lava seleni.
