E lē taumate ua silasila soo ma faitau le mamalu o le atunuu i nisi o tala e lomia mai i le nusipepa o le NZ Herald e tusia ai le suafa o le tamaitai tusitala o Vaimoana Tapaleao, e lē gata i le nusipepa ae faapea foi i luga o le upega o fesootaiga a le Herald, e faitau i ai le faitau afe o tagata i itu e fia o le lalolagi.
O le aso 11 o le masina lenei o Iuni sa faataunuuina ai se sauniga faapitoa e tauaao ai faailoga taualoa e lagolagoina e le kamupani vaalele a le Qantas mo tusitala uma na mafai ona tausinio i le faamoemoe lea mo galuega sa faatino i le tausaga na tea nei, 2009.
O se sauniga sa faatautaia i le Sky City, ma o se tasi o polokalame e lē taumate o le a faagalo gata i le tamaitai o Vaimoana ma lona aiga, ona sa tauaaoina aloaia ai ma ni faailoga se lua sa maua e le tamaitai i lana galuega.
E 3 vaega sa faaulu ai Vaimoana e tausinio ai:
• Best Junior Reporter (General News)
• Best Junior Reporter (Human Relations)
• Overall Award (Best Junior Reporter of the Year)
E lua vaega na manumalo ai Vaimoana (Best Junior Reporter of the Year & Best Junior Reporter – Human Relations). O le tusitala (junior) aupito sili o le tausaga ma le tusitala aupito sili i fesootaiga faaletagata.
O le faailoga lea na maua ona o lana galuega sa faia i Samoa i le taimi o le sunami ia Setema faatasi ai ma sana tusitusiga e fa itulau sa tuufaatasia e aualofa ai i ē na aafia ma maumau soifua ina ua goto le vaa a Tonga o le Princess Ashika.
Faaalia e Vaimoana, ua silia nei ma le 12 tausaga talu ona faato‘ā toe manumaloina e se tusitala mai le NZ Herald faailoga ia, ma o le uluai taimi foi lea ua malo ai se tusitala mai le Pasefika ma Samoa foi e ui faato‘ā silia laititi ma le lua tausaga talu ona avea Vaimoana ma tusitala.
O se faaeaea maualuga e lē gata mo tagata Samoa, ae faapea foi mo le Pasefika atoa.
Mo le tamaitai tusitala talavou i se faatalanoaga ma le Samoa Times na ia faaalia ai, e lagona lona faamaualalo i luma o le Atua ona o le faamanuiaina ai i nei faailoga taualoa i totonu o le atunuu o Niu Sila.
O Vaimoana ua atoa nei le 23 o ona tausaga ma na soifua ane i Massey i le itu i Sisifo o Aukilani. O nai ona tuaa o le susuga Puniloa Auatama Tapaleao (tamā) mai Toamua i Faleata, ma Tauamafili Tapaleao nee Lealaiauloto Sakaria (tina) mai le afioaga o Lelepa i Savaii.
Na amata mai lava le olaga a‘oa‘oina o Vaimoana i a‘oga tulagalua ma a‘oga maualuga a Massey seia oo ina faauu mai le vasega 7 i le tausaga e 2004, ma maua ai lona avanoa i le AUT i le 2005 ma faauma ai ana a‘oa‘oga mo lona faailoga o le Bachelor of Communications Studies i le tomai faatusitala (Journalism) i le tausaga 2007. Ta‘ua e le tamaitai, i lena lava tausaga e 2007 a o faagasolo pea ana a‘oa‘oga, sa maua ai sana galuega faavaitaimi i le SPASIFIK Magazine, sosoo ai loa ma lona mauaina o se galuega i le Herald a o toe lua vaiaso faaaloaia loa lona faauuga mai le AUT, i le masina o Mati i le 2008.
E na o Vaimoana le alo o nai ona mātua e pei ona ia faailoa mai, ma o loo galulue nei i le Ekalesia Faapotopotoga Kerisiano Samoa i Te Atatu, lea o loo taitaia e le faafeagaiga, susuga ia Lucky Slade.
O se tulaga faamomoiloto na faamatala e Vaimoana i lona faimalaga atu ai i Samoa ina ua maua le avanoa e filifili ai o ia e le pulega e na te galue i tala mai Samoa o le sunami, auā o ia o le Samoa ma e mafai ona ia fesootai i tagata i le tatou gagana. O ni vaaiga faagalogata i le tamaitai ma sa ia faatino ma le toto‘a lana galuega e ui i le faigata na feagai foi ma ia i le vaaia o tagata o si o tatou atunuu o pagatia i mafatiaga faapea faalenatura. O le Atua lava o loo ave i ai le faamua ma le faasagi a le tamaitai tusitala i lona agalelei ua mafai ai ona ia ausia lea maualuga i le faatinoina o lana galuega.
Fai mai a ia, ana lē seanoa le Atua, e lē mafai ona taunuu mea uma. Faamatala e Vaimoana o se tasi o ana moemitiga o le fia vaai lea i nisi foliga eena poo ni tama ma ni teine talavou mai Samoa ma le Pasefika e tumutumu ai potu fai lipoti (newsroom) a le tele o ofisa faasalalau i Niu Sila nei, auā e talitonu lava Vaimoana, afai e mafai ona ia ausia lea tulaga i le soifuaga nei, o lona uiga e tele ma anoanoai isi tagata Samoa e mafai foi ona ausia.
O le mātau a le tusitala i le tamaitai talavou, o se tagata agamalu ma loto maualalo o loo faasaga atu i se faitotoa va tele o avanoa mo ia i le lumanai o lana galuega faatusitala i totonu o Niu Sila nei.
O loo iai le faamoemoe o Vaimoana e fia tusia se tusi i le lumanai ma faaauau pea ona galue faamaoni i lana galuega i le Herald ma faaaogā avanoa uma e mafai ona ia maua mo le faalauteleina atili o le malamalamaga i lenei matata. O se faamalo ma se faafetai foi i lea alo o le atunuu i lona faaeaea ma talosia ia avea pea ma luitau mo tupulaga o tama ma teine Samoa, ia tausinio i le mea sili i soo se vaega o galulue ai i le atunuu nei.
Ua moni lava le upu a le Tusi, ‘o le teine poto e fiafia ai le tama.’
