Malo Tau Malo Toa, Manusamoa Tuilagi

Manu Tuilagi

England 19 All Blacks 7

I le silasila ma le maimoa a Samoa, e ao ona viia le agavaa o le alo e toatasi o le atunuu na taalo mo le ‘au malosi a Egelani. O le tagata toa lenei o Manusamoa Tuilagi, 28 tausaga mai le afioaga o Fatausi i Faasaleleaga i le motu tele i Salafai. 

O Tuilagi na tulai mai e faafetauia le malosi o Niu Sila. E toafitu alo o Samoa na taalo mo Niu Sila e iai Sonny Bill Williams, Anton Lienert-Brown, Angus Taavao, Richie Mo’unga, Ardie Savea, Nepo Laulala ma Patrick Tuipulotu. O ā nisi auga o le taaloga ae ua manino o Manusamoa Tuilagi na matuā matautia lana taalo mai le ‘au a Egelani.

I le minute muamua o le taaloga na faalua ona osofai e ia le laina a Niu Sila, e lei umi ae sikoa Tuilagi e pau ai foi lea o le sikoa a Egelani. Na faaaogā Manusamoa e faatamo’e le polo ma faafeto’ai le malaosi o le All Blacks. A’o lana puipui ma le pue o le tasi lea o ‘olo maoa’e a Egelani, e lei mafai e le All Blacks ona pasia.

Na mausali le mau a Manu e tetee i osofaiga a Niu Sila. Ae na tamo’e malosi foi Manu ma le polo, o lona malosiaga lea ua masani ai le lalolagi atoa. O le saoasaoa o le tama mai Fatausi talu ona amata taalo Manu mo Egelani.

E lē gata i lea ae na faaaogā foi e Egelani Manusamoa e taalo i luma. E lē na’o le laina i tua na taalo mai ai. Na vaaia lea malosiaga a Manusamoa i le sikoa a Egelani. A’o faatamo’e e le foueti le polo agai atu i le laina ae soso atu loa ma Manu i autafa o le ruck ma sii le polo ma ave i autafa o le pou ma sikoa ai, ae faatoa minute ma sekone ua mae’a o le taaloga, 1m 41s. O se vaaiga matautia le sikoa muamua a Manusamoa Tuilagi.

I le taaloga atoa na tumau pea le matautia o le taalo a Manu, o ona tiute ia o le ave i luma o le polo mai le laina i tua. O le pue malosi i taimi uma o osofaiga a le All Blacks. O le faalatalata foi i le foueti e tulei molo ma fesoasoani i le galuega a le foueti i autafa o polo e pue ma molo. O na mea uma na vaaia ai le agavaa o Manusamoa. 

O le lua ai lea o vaiaso o tau toatasi mai Tuilagi i le ‘au a Egelani, e na’o ia. E leitioa foi faae’e ia te ia suafa tāua uma o Fatausi ma Fogapoa – e iai le Namulau’ulu ma le Lauaki, e lē gata i lea, ae na tasi foi le afioaga o Fatausi e faae’e ia Manusamoa le suafa tāua o le afioaga, le Tuita’amasauali’i. O suafa tāua uma ia ua tauave e Manusamoa.

E matautia le taua a le All Blacks ma Egelani. E lei mateina e se tasi o le a faapea le maoa’e o le ‘au a Egelani. I le mae’a ai o le taaloga na manumalo i ‘ai 19-7. 

O upu sa’o na pei le taalo a le All Blacks o le taaalo a ni tamaiti. E lei iai ma se mea na fai e Niu Sila e lei mate’ia e Egelani. O taimi uma foi na tau alu ai i luma osofaiga a le  All Blacks ua iai foi ma Egelani. O le tetee ma le puipui a Egelani o le faavae lea a le latou manumalo. 

E ao ona viia le galuega a John Mitchell, le faiaoga Defence Coach a Egelani. O ia lea na gafa ma le a’oina o le puipui ma le tetee a le ‘au. I lea tulaga, e mata’utia le sao a Mitchell i le manumalo a Egelani. O John Mitchell na faiaoga i le All Blacks i le RWC 2003, lea na faia’ina ai ia Ausetalia na faiaoga ai Eddie Jones. I le RWC lea, na faia’ina ai Ausetalia ia Egelani i le taaloga faaiu, e pau foi lea o le manumalo o Egelani i le Ipu o le lalolagi. 

O le a tapena nei loa Egelani e feagai ma Aferika i Saute i le taaloga faaiu o le RWC i Iapani i le vaiaso a sau. Ae o le All Blacks o le a tapena e taalo i le taaloga mo le tulaga lona tolu. 

England 19 (Manusamoa Tuilagi tatao, Farrell 1 con, George Ford 4 sala)

New Zealand 7 (Ardie Savea tatao; Richie Mo’unga con)