E tasi le mea ua mautinoa, o le agaga fiafia ma le faagaeetia na lagonaina e sui sa auai ai i le polokalame ua faaigoaina o le Aiga Challenge ina ua faamae‘aina ma le manuia le luitau o lenei tausaga.
O le polokalame e mafua mai i le auaunaga a le HVAZ poo le Healthy Villages Action Zone lea o loo galulue malosi ai nisi o tamalii o lo tatou atunuu, faatasi ai ma le lagolagosua a isi auaunaga tau soifua maloloina e pei o le ProCare ma le Allianz.
O le faamoemoe o loo resitala ai ekalesia e 42, o ia ekalesia e lē na o ekalesia Samoa peitai e aofia ai ma aulotu mai isi atunuu o le Pasefika. O le auga ma le autu o le polokalame o le fia faatumauina o le soifua maloloina aemaise o le taumafa paleni.
E valu vaiaso o lenei polokalame ma sa tuu i le faitalia a le ekalesia i ana lava toleniga ma auala e faatino ai faamalositino ae fua lava pauna poo le mamafa i vaiaso taitasi; o nisi ekalesia e tailua vaiaso ma faatino lea fuafuaga. O le vaiaso na tea nei sa faia ai le laugatogi o lenei taumafaiga i le maota o le Ekalesia Faapotopotoga Kerisiano Samoa i Otahuhu ma na saunoa ai le susuga i le faafeagaiga o lea ekalesia i le tāua foi o ituaiga luitau faapea i le soifua o le tagata.
O se tasi foi tamalii o le atunuu sa iai i le amataga mai o lenei faamoemoe o Hilda Faasalele na ia molimau i le tulaga lelei ma le alu i luma o le polokalame ua maitauina i le taimi nei pe a faatusa i lona faatoa amata.
E fai si tele o vaega na agai i ai le taumafaiga ma o le sui mai le Pulega a le falemai faaitumalo i Aukilani (ADHB) Faimafili Tupu, na saunoa e faamalamalama le polokalame ma itu sa fua agai i ai le faaiuga a le komiti o le Aiga Challenge. O le ekalesia PIC Newton Samoa na sola ma le manumalo ma maua foi le faailoga tupe e afe tala. E anoanoai ituaiga toleniga sa o latou faatino e pei ona molimauina i se ata video sa o latou tuufaatasia e faatatau lea ata ia latou toleniga uma sa faia.
O le alii o Nofo Nofoaiga (PIC Newton) na malo i le inspirational male a o le tamaitai o Elaine Sala Tunai (Sacred Heart Ponsonby) na malo i le inspirational female. O le faauluuluga o le Procare, Wilmasen Jensen na saunoa e faafetaia le atunuu na auai atu i le faamoemoe a o fofoga o le polokalame o Funaiga Valita Partsch faatasi ma le tamaitai o Mesepa Selau.
Faafetaia ai foi e le sooupu o le Procare, Masuisui Sam ekalesia uma na auai i le polokalame mo lenei tausaga 2013. Ae mo ekalesia fou faatoa ulufale i le tausaga nei, o le a toe timata le upega ma faasauni mo le toe amataina o le Aiga Challenge i le tausaga fou 2014.