O se tala faanoanoa i le amata ai o taamilosaga lakapi i totonu o le atunuu mo lenei tausaga 2019 ina ua logoa ai tala ave i le maliu ai o se tasi o taulealea talavou mai i le kalapu lakapi a le afioaga o Vaimoso i le la taaloga ma Vailele i le lua vaiaso ua tuanai.
O le alii talavou ia Faiva Tagatauli 27 tausaga mai i le afioaga o Fagamalo i Savaii e lei mafai ona toe taalo ai i le tausaga atoa 2018, ae o lana taaloga muamua foi lenei faatoa toe taalo ai.
Faaalia e le taitai malaga o le kalapu lakapi a Vaimoso le susuga ia Tauiliili Polito Vili, na faatoa sui i totonu Tagatauli i le 30 minute talu ona amata le ‘afa mulimuli o le taaloga ma Vailele, ma e leai lava se foliga vaaia o se gasegase poo se lavea na aafia ai Tagatauli. O le taimi tonu o le molo i le ‘afa mulimuli na agai mai ai i tua le susuga ia Tagatauli ma le malae ma sa avatu ia te ia le vai ma le ‘aisa peitai mulimuli ane matapogia, lea na valaau faatopetope ai le taavale mo faalavelave faafuase’i ma natinati atu ai i le falema’i. Faamaonia mai i se pepa o faamatalaga mai i le kalapu lakapi a Vaimoso, na faia togafitiga a Foma’i ma maua ai le aafia o le itu taumatau o le fai’ai o Tagatauli (Internal Bleeding).
O se aso pogisa tele mo le kalapu lakapi a Vaimoso aemaise o se tasi lenei o ana fetu pupula, o le susuga foi ia Tagatauli o se tasi o sui e lagolago foi ma naunau i le taaloga lenei o le lakapi. Ua tuuina atu ai foi le fesoasoani mai i le kalapu lakapi a Vaimoso e lagolago ai le faletua o Tagatauli ma lona aiga e ala i le faatupeina o nisi o vaega e manaomia mo ona toe sauniga.
Ua faailoa foi le galulue faatasi ai o le Iuni Lakapi Faaitumalo a Apia ma le aiga o Tagatauli ina ia mafai ona tuuina atu ai se fesoasoani mo le aiga o lea tama taalo. Na faaalia foi le agaga faanoanoa o le Ofisa Sili o le Iuni Lakapi a Samoa le susuga ia Faleomavaega Vincent Fepuleai ona o le maliu ai o lenei fetu pupula o le lakapi a Samoa.
O le susuga ia Faiva Tagatauli e taalo ai i le tulaga o le flanker, sa filifilia foi i le au a Samoa mo i latou e i lalo ifo o le 20 tausaga le matutua e pei ona sa faiaoga ai Soifua John Schuster lea na siamupini mai ai i le taamilosaga o le Junior World Trophy lea na faia i totonu o Georgia i le tausaga e 2011. Sa taalo foi le susuga ia Tagatauli i le taamilosaga lakapi o le Super 9 i le tausaga na tea nei.
O taaloga uma a le Iuni Lakapi faaitumalo a Apia i le Aso Toonai na tea nei na faia ai se minute fifilemu poo se tulai faaaloalo e amanaia ai le sao o lenei alii talavou i le taaloga lakapi, ae mo le kalapu a Vaimoso na o latou laei ai se black armbands e manatua ai pea le susuga ia Faiva Tagatauli.
O le mataupu lenei ua lagalaga ai finagalo o nisi o le atunuu i le tatau lea ona saogalemu ai soo se tama taalo mai i le taaloga lakapi. Ua faaalia foi e le vaega o le koluse mumu a Samoa, sa tatau lava ona iai se koluse mumu i soo se taimi e faatino ai taaloga, afai ana iai se sui o le koluse mumu i le taimi na tupu ai le faalavelave, atonu e laveaiina le soifua o Faiva Tagatauli.
O le tulai mai ai o lenei faalavelave o se toe fafagu lea mo kakapu lakapi uma i le atunuu aemaise lava le Iuni Lakapi a Samoa i le tatau lea ona ave le faamuamua i le saogalemu o soo se sui lakapi.
