E toaono i latou sa faanatinati ane ma taofia i le falemai o Malietoa Tanumafili II i Tuasivi i Savaii i le Aso Lulu talu ai ona o se faalavelave tau taavale na tupu i Sataua lea na maliu ai se tamā ua 54 tausaga o lea lava afioaga.
E toaono na manunu‘a, o tamaiti e toafā ma se alii talavou e toatasi ma le tina e faapea mai leoleo o le faletua o se faifeau o le ekalesia Assembly of God i Sataua na ia aveina le taavale pikiapu na aafia i le faalavelave.
Faaalia e le komesina lagolago o le sooupu o le matagaluega o leoleo ma falepuipui le afioga Leaupepe Fatu Pula, o lipoti mai Savaii ua ta‘ua ai o le taavale na agai mai i luga o se vaega maualuga o le alatele i Sataua, ma sa lē mafai ona faatonutonu lelei le taavale ma mafua ai ona tifa i tua ma taia ai lē ua maliu sa savali i autafa o le auala.
O le mafuaaga foi lea o le tifa ai i tua ma le taavale ma aafia ai loa le fanau e toafā a le tina na aveina le pikiapu ma manunu‘a uma ai e aofia ai ma le alii talavou 14 tausaga sa malaga ai foi i le taavale.
Ua faailoa mai e le falemai i Tuasivi o le vaa usu o le aso mai Salelologa na ave ai le au manunu‘a o lea faalavelave mo le maota gasegase o Tupua Tamasese Meaole i Motootua mo nisi o togafitiga faafomai, ona e fai si tuga o manu‘aga.
I se tasi o faalavelave tau taavale na tupu i le po o le Aso Toonai i ona tua i se vaega o Vaitele-tai e toatasi se alii aoga 22 tausaga le matua o le iunivesite aoao o Samoa na maliu ai. Faaalia e le sooupu o le matagaluega o leoleo e onanā uma alii talavou e toatolu na malaga i le taavale e aofia ai ma lē na aveina, o se alii 19 tausaga lea ua molia i le ave taavale faatamala ua mafua ai ona oo le maliu i se tasi.
Faaalia e le sooupu ua maua i suesuega o lea faalavelave, e lei faamauina fusipa‘u o le saogalemu e taulelea na malaga i le taavale, o le isi lea mafuaaga o le maliu o le tasi o i latou, ma o se pa uaea o loo sio ai se tasi o kamupani inisinia i Vaitele toetoe faafeasagi ma le fale kalapu o le tausala bar na oso iai le taavale na aafia.
Ua faamaonia mai e leoleo o le tagofia o le avamalosi le mafuaaga o le faalavelave, ma ua toe fautuaina ai le atunuu faimalaga i luga o taavale ina ia faamau fusipau o le saogalemu ma taofi le tagofia o le avamalosi a o uu le foeuli poo le tuu o le foeuli i se isi tagata e lē o aafia i le avamalosi, mo le tausisia lava o le saogalemu o soifua o tagata faimalaga i luga o taavale ma tagata savavali.
