O le Aso Faraile 26 o Oketopa na pa mai ai le tala faamomoi loto ma le talia gata e finagalo o mātua ma le aiga faanoanoa aemaise le mamalu o le atunuu na silasila i le faalavelave na tupu i luga o le auala i Cannons Creek.
O le taavale na alu atu ae fetaui ma le tamoe faafuasei ane a le tamaitiiti lenei e fitu tausaga i luga o le auala ma taia ai loa. O le taimi tonu ua le tuua le aoga, ma o le foi o si tamaitiiti i lona aiga na tupu ai le faalavelave.
E pei ona tusia i le Upega o Fesootaiga e faapea na lē mafai ona taofi le taavale ona ua vave ane le tamoe a le alualutoto i luga o le auala ma taia loa.
O le toe solomuli mai i tua o le taavale na molimauina e i latou na vaaia lea tulaga na toe alu ai le taavale i luga i si nei alualutoto e aunoa ma le iloa e le avetaavale le mea ua fiti atu i ai si tamaitiiti.
E tele ni faalavelave faapenei e tutupu mai ona o le faatamala o le fanau aemaise le faatamala o avetaavale i le saosaoa lē faatuaoia.
Ae o le fesili e tu mai i finagalo o tagata i lea taimi: “O fea o iai mātua o si nei alualutoto ua tuulafoai e alu na o ia i le fale?”
Talofa e, o se mea tiga lea ua oo i ai nei mātua e lei faamoemoeina, ae mafua lava o le faatamala ma le tuulafoai o le fanau. Manatua o le taimi lava tatou te lē mafaufau lelei ai, e tupu ai mala ma faigata.
O le saga faufautua atu pea a le Sooatulau ina ia nofouta mātua i taimi nei o le pisi o femalagaaiga i luga o auala, ona ua lata foi aso fiafia.
Uu lelei le lima o lou alo ma savavali i le aoga ma toe oo atu e piki mai i le faleaoga ma toe uulima i le fale pe afai e tuua le aoga.
Ia saili se isi e matua ma faatuatuaina e momolia tamaiti i le aoga ma toe piki mai pe a lē avanoa pe lē malolosi mātua. Ia faamaise atu le Atua i mātua ma aiga faanoanoa.
