Maliu i le sami le faipisinisi, Nicky Ah Kuoi

O gatai o Mulinuu sa ta ai lana ofe fagota e pei ona masani ai lenei alii faipisinisi, o se tasi e silafia uma e le toatele o le aufaipisinisi i le atunuu. E faia le faiva o lea tamalii a o faatali atu i le taavale se tasi o lona aiga ma lana uo.
O le afiafi o le Aso Lulu o le vaiaso talu ai lea na tulai mai ai lenei faalavelave a o alu le faiva o le susuga Nicky Ah Kuoi i le afiafi. Peitai o se tala faanoanoa e pei ona faamaonia mai e leoleo ma faia ai suesuega i le maliu o lea tamalii.
E faapea se lipoti, sa umi se taimi o faia lona faiva, na lei toe iloa atu e lona aiga lona tino i le pito na agai i ai, peitai sa lei mamafa tele i o la manatu, ona sa faapea laua atonu ua tofu i lalo o le sami le alii e faaauau ai lona faiva.
Peitai ua faasolo ifo lava le aso ma ua fai lava sina umi e lei toe vaaia lava lona tino ona alu ai lea o se tasi oi laua ia sa faatali i le taavale e siaki, ona ua afiafi ane lava ma pogipogi e lei toe alu ane Nicky.
Ae ina ua saili atu i le vaega sa fai ai lona faiva ua leai se isi. Na logo leoleo ma faia loa sailiga i le po lava lea o le Aso Lulu, ae lei manuia, peitai na faatoa maua lona tino maliu i le taeao o le Aso Tofi na sosoo ai, i gataifale o Faleula.
E lei toe maua mai se faamatalaga i suesuega a leoleo i le mafuaaga tonu o lenei faalavelave, ua faafuasei ai ona motusia le mafutaga ma lenei foi tamā ua silafia uma i totonu o le lio o le aufaipisinisi i Samoa.
O le susuga Nicky o se tasi o alo o le tamā faipisinisi sa lauiloa i lona foi vaitaimi, le susuga a Sione Ah Kuoi ma le faletua ia Mele Ah Kuoi, i lo la faleoloa ma le falefalaoa a Sione Ah Kuoi i le magafā i Matautu-uta i Apia. O nisi nei o aiga sa uluai tulai mai i totonu o le taulaga o Apia ia latou pisinisi tau faleoloa a agai i ai le mamalu o le atunuu mo faatauga.
E momoli atu ai foi faamaisega ma faamafanafanaga a le Samoa Times i le tina loto mafatia ia Mavis ma le nofoaalo ma tauaiga uma o le susuga ia Nicky.