O le afiafi o le Aso Faraile na logotala ai le toatele i le maliu ai o le alii Ofisa Sili o le Matagaluega o Punaoa Faanatura ma le Siosiomaga, le Afioga Taulealeausumai Laavasa Malua. O se alii ua lima tausaga o tulai mai e taitaia le tasi lenei o matagaluega tele a le Malo o Samoa. E maliu nei Taulealeausumai Laavasa, faatoa 45 tausaga o lona soifua.
O se tasi lenei o Ofisa Sili e laitiiti i totonu o le potopotoga o Ofisa Sili a le Malo ma e 40 tausaga o Taulealeausumai ae tofia loa e avea ma Pule o le matagaluega tele lenei ae sa ia vaaia foi nisi o vaega o lenei matagaluega a o lei oo atu i le tofi o le Ofisa Sili.
O le vaiaso na te’a nei sa malaga atu ai i Fiti lenei alii auā foi fonotaga mo le iloiloga lava o le tele o galuega ma fuafuaga faataatitia a le itulagi i puipuiga o le siosiomaga ma e manino le tele o galuega na feagai ma ia ae o loo feagai lava ma gasegase.
E lei aumaia se lipoti aloaia o le gasegase ua maliu ai si nei tamalii, se‘i vaganā ai le mau faamatalaga ua faapea foi ona taamilo i tua e faatatau i le maliu ai o Taulealeausumai.
O lea na ta‘ua o le silailalo le gasegase o lea alii ae e malosi lava foi lona gasegase o le suka ma e foliga mai ua tuai togafitiga ma na avatu i le falemai tele i Motootua na faapea mai ni lipoti ua oo mai i le tatou ofisa, faapea ua tuai lava togafitiga ona ua aafia ona alatoto i le ‘ona o le gasegase o le silailalo. Na iai faasalalauga i le sailiga o se toto o le Afioga Taulealeausumai peitai o le afiafi lava o le Aso Faraile na maliu ai o ia.
E toatele aemaise i latou e galulue i le Malo ma kamupani i totonu o le taulaga o Apia, ua na o le maofa i le vave ona maliu o Taulealea ae o lea faatoa taliu mai i fonotaga i Fiti ma na tele lava foi faamanatuga o le lua vaiaso talu ai a le Siosiomaga sa auai atu o ia ma faatautaia. Ae o le tulai mai o lona maliu ua avea foi ma auala ua talanoa ai lava le toatele i le tatau lava ona agai e siaki ma vaai lelei le soifua maloloina e tusa pe tele galuega ma tiute tauave.
O le faletua o lenei alii o Margaret Malua, o loo pulea le Faalapotopotoga tele o Pisinisi Laiti i totonu o Samoa ma o se ulugalii lenei e ui ina talavou lava, ae na vaaia le malosi i galuega ma o la tiute tauave i tofiga maualuluga e pei ona faamanuiaina ai.
E laiti si a la fanau tama ma ua na o le misialofa lava o le toatele i le maliu faafuasei ai o lenei foi taitai talavou iloga o le atunuu.
O loo tālia se polokalame o le maliu o Taulealeausumai, o se tasi foi o poutu o le afioaga o Vaiala i Apia aemaise lava i lana unai o le itu tau i taaloga o le lakapi a le afioaga.
