O le malaga a le vaalele tele Boeing o le kamupani vaalele o le Samoa Virgin i le Aso Sa na tea nei mai Aukilani i Faleolo i Apia, sa kapeteni e le susuga Pito Faalogo faatasi ai ma se tasi o soa pailate.
Na taunuu le malaga i le aoauli o le Aso Sa ona mālōlō atu lea o alii pailate ma le auvaa i le faletalimalo o le Aggies Resort i Mulifanua mo le po, ona sauni ai lea e toe faaauau le galuega mo le isi malaga mai Apia mo Sini i Ausetalia i le taeao o le Aso Gafua ananafi.
Na faamoemoe o le ‘afa o le fitu i le taeao e alu ese ai le faigamalaga, peitai e lei taunuu ina ua maliu le alii kapeteni, le susuga Pito Faalogo ona o se faalavelave na tupu i se taelega i le sami i gatai ane lava o le faletalimalo.
E oo mai i le taimi na tuuina atu lenei lipoti mo le faasalalauina e lei maua mai se faamatalaga mai le sui sooupu o le matagaluega o leoleo ona sa pisi i le faia o faatalanoaga poo interviews mo nisi o avanoa faigaluega a le matagaluega.
Peitai o loo iai molimau mai leoleo ua faaalia ai o le alii pailate na maliu ina ua malemo i le taelega lea i le aoauli o le Aso Sa 22 o Ianuari 2012.
O le susuga Pito Faalogo o se alo e faasino i le afioga Seuseu Faalogo Pito ma le faletua o Eseta ua faamautu uma i Niu Sila.
O ia o se tasi o tama fanau a le atunuu sa faamanuiaina ana a‘oa‘oga faaave vaalele a o galue i le Kamupani vaalele o le Polenisia, lea na faaauau pea ona galue i lea tomai i le kamupani vaalele o le Polynesian Blue, lea ua suia nei le igoa i le Samoa Virgin Airline.
O le kamupani vaalele o loo iai sea o le Malo o Samoa ma le faletalimalo o Aggie Grey e ala i le susuga Laauli Allan Grey ma lona aiga e ana le faletalimalo lauiloa i le lalolagi.
O le susuga Pito Faalogo e silafia e le toatele i lana galuega o le pailate, ma o se tasi foi e silafia e nisi o le atunuu e fiafia i le taaloga o le Tapolo poo le Golf.
O se aso o le vaiaso nei e tuua ai Samoa e le tino maliu o le alii pailate faatasi ai ma ona aiga i Samoa mo le auina atu i Aukilani i Niu Sila mo ona toe sauniga.
Ia faamaise le agaga o le Atua i le tina ma le fanau, o mātua ma aiga faapea uso ma tuafafine tainane o uo ma aumea mamae ona o le motusia o le mafutaga ma lea auauna.
