Ua maliu ai nei le pepe sili ona lauiloa a Samoa, le tamaitai o Baby Miracle poo Tinamaryame Nanai o Falelatai, ae ua toe o nai masina atoa le 11 tausaga o lona soifua.
E manatu ua tele se tala’aga ole soifua o lenei foi alo ole atunuu, ua silafia talu mai lona soifua ane i ona matua o Mikaele ma Sefulu Nanai.
Na soifua mai Miracle ile aso 1 o Setema ole tausaga e 2007. Peita’i e iai ona manaoga tumau, o ona manaoga tumau ia na afua ai ona avea o ia ma pepe sili ona lauiloa ona tala ave ia Samoa ma faasolo atu ia i atunuu mamao.
O ia tala ‘ave sa le’i avea ma auala e matamumuli pe fo’i ai le alolofa faamatua moni o ona matua ia Mikaele ma Sefulu.
Ma sa o la molimauina lava le agaga faasinosinomia o lo la alo, amata mai ile falema’i, ina ua faatonuina le tina e ‘aua nei fafagaina pe faasusu le pepe, ma sa iai foi manatu e na’o le lua lava ni vaiaso e ola ai. O loo manatua lelei e Mikaele taimi sa tolotolo ai e fafaga nana lona afafine ile pusa faapitoa na tuu ai ile falema’i o tamaiti.
E salalau mai tala o le tamaitai lenei o lona suafa i lea taimi o Tina na faaigoa ai e lona aiga. E uma ane taaloga a le Pasefika i Saute na faia mai i Samoa i lena vaitaimi, o le 2007, ae o loo ‘aave lava tala o Tina. Ma saili ai loa e le polokalame a le Televise Samoa ma le nusipepea o le Samoa Post mai Niusila. E maua atu ile sailiga, ua faitau vaiaso le matua o le pepe ina ua ‘aveese mai e ona matua ma avatu i le aiga o lona tama i Falelatai, ma ua taumafai lona aiga e fafaga.
Sa o faatasi le le Samoa Post ma le TV SAMOA mai Niusila ma le polokalame a le Survival Foundation, a le Susuga a Tuilaepa Mary Grey.
O iina na amata ai loa ona saili tupe le pulega o le TV Samoa ma le Samoa Post le tofa Tanupo Aukuso ma Taufau Aukuso e fesoasoani i le pepe lenei ma avatu ai i le falemai i Fagaalu Amerika Samoa mo lona fa’ata faapitoa.
O lea malaga na faatupeina uma atu lava i Niu Sila e sui e le Samoa Post ma le TV Samoa, o iina na maua mai ai lipoti faafoma’i e taumafai e faamaonia ai le talosaga o le visa e avatu ai i Niusila Baby Miracle mo se togafitiga i ona foliga, lea e afua ai ona ‘aave ona tala.
Sa manuia mai le sailiga o se lipoti mai Tutuila, peta’i na teena mai e le malo o Niusila le avatu o Miracle ona faapea, e le ose togafitiga e manuia, pe a faatino i Niu Sila nei, faatasi ai ma le talitonuga o fomai Niu Sila ma fomai Samoa, e le aulia e baby Miracle le lua tausga o lona soifua.
Ua oo loa ina taumafai sailigatupe mole aveina lea o le pepe i Amerika. Na aapa mai loa le Susuga Papalii Carol Ah Chong ma le pulega o le TV3 ilea taimi, Joe Keil, e fesoasoani mo le avatua lea i Amerika.
Ma faamatuu atu loa iai tupe uma na maua mai sailiga seleni a le TV Samoa Niusila, e lagolago ai le taotoga o baby Miracle i Amerika.
E ala ise fesootaiga faapitoa a le Susuga Papalii ma le misiona a le tamaitai palagi Amerika Susuga ia Tooa Christine Taylor. O iina na amata ai ona faitau aso fanau o le tamaitai, ua avatu i Amerika mo togafitiga, na malaga ai ma ona matua ma le Susuga Papalii Carol Ah Chong. Na umi se taimi o nonofo matua ile falema’i i Florida i Amerika e tapua’i togafitiga ma toe foi mai ua manuia. Ma faaauau ai lava ona tausia e le Susuga Papalii Carol ma lona aiga baby Miracle.
Ua faamanatu lea aso fanau, ma toe faamanatu lesi aso fanau, ma faapena ai lava se iai oo mai i lona aso fanau mulimuli o le tausaga talu ai.
O le tausaga talu ai, na faato’a toe avatu ai i ona matua, i Falelatai. Ma o latou mafuta mai ai e oo mai ile ta o le lima ile afiafi o le Aso Sa 10 Iuni 2018, lea na taumafai ane ai i Apia mose togafitiga.
E maliu nei Baby Miracle, ae o le aso 1 o Setema e atoa iai le 11 o ona tausaga.
O le Aso Faraile o le vaiaso nei lea ua atofa mo lona Misasa Paia e faamavae atu ai ona aiga i le malumalu o le ekalesia Katoliko i Falelatai.
