“E le popole le Malo i soifua o tagata Savaii”…Levaopolo Talatonu
“Ua tiga fofoga (taliga) i le alalaga pea o le Palemia ma le HRPP, o le mea e lelei i Apia e lelei foi i Savaii, ae o fea le faamaoni o ia faaupuga ae e le o lelei falemai, ma leai ni fomai i Salafai”, o le finagalo le fiafia lea o le sui faipule, le afioga Levaopolo Talatonu, i le faaletonu o le tali atu a le aufaigaluega a le matagaluega o le soifua maloloina i Tuasivi i le tina maitaga o lona nuu ma lona aiga, lea na iu lava ina maliu ma uma ai ma le ola o lana pepe e lei faia se togafiti a fomai.
Ua lua nei vaiaso talu ona tulai mai lea faalavelave e pei ona suesueina nei e leoleo.
E le o mafai ona tuuina mai se faamatalaga mai le pulega o le vaega o togafitiga faafomai i le matagaluega o le soifua maloloina e tusa ai o lenei mataupu, ona ua tapena nei le aiga o le tina na maliu faatasi ai ma lana pepe e tuuina atu le mataupu i le faamasinoga.
Ua faaalia e Levaoplo Talatonu, na faailoa ane e le falemai i Tuasivi i le siiga mai a le tina maitaga ma lona toalua, e faatali se fomai e alu atu mai Apia e faia le taotoga, peitai e ta ane lava le 2 i le aoauli o le Aso Lua 9 o Fepuari 2010, na maliu ai le tina e lei oo atu lava se fomai.
“O le mea la lea ua ou fesili atu ai i le Palemia ma le faigamalo, poo fea faamatalaga ma folafolaga fai soo, o le a faaleleia falemai ma le auaunaga a le soifua maloloina i le motu i Savaii ae foliga e le popole i le soifua o tagata i Salafai”, na saunoa mai ai Levaopolo.
Faaalia foi e le sui faipule o loo iai foi faaletonu i le leai o ni fomai i falemai faaitumalo ma o nisi taimi ua le lava fualaau ma vai ma leai foi se taavale ave ma‘i poo se ambulance.
E le fou tuuaiga faasaga i le matagaluega o le soifua maloloina i le lē lelei o nisi o a latou auaunaga i falemai i tua, ma ua toe valuvalusia ai e le sui faipule o Levaopolo le Minisita ma le matagaluega ina ia toe silasila ane i le tāua o le soifua o tagata o alala i Savaii aua e tutusa lelei lava ma le soifua o tagata i Upolu.
Na faaalia e le tasi o faipule tutoatasi le afioga Palusalue, ana ua lelei faamanuiaga e ave e le Malo i se fomai mo Savaii, semanu e le tupu soo lea faletonu.
“O se taavale, se fale e nofo ai, ma se totogi ma alauni”.
O le faamatalaga a Levaopolo na faatonu e tausimai le toalua o le tina ua maliu e sue atu se tapu, ma le manatu o le tamaloa ua ola lona toalua, ae na tei le tamaloa ina ua alu atu ma le tapu fou, ae faaaoga e asu i ai le palapala o le mai o lona toalua.
Na faailoa ane foi e tausimai e le mafai ona faia i Tuasivi le taotoga o le tina seia vagana ua ave i le falemai i Motootua.
