Ua sainia e le Malo o Ausetalia ma Samoa se maliega o le a faatino ai fefaatauaiga ile va o Malo e lua i lalo o aiaiga o le faalapotopotoga o fefaatauaiga saoloto a le lalolagi, le World Trade Organisation poo le WTO ao talia ai le aso e avea ai lo tatou atunuu ma sui o lea faalapotopotoga. O le afea o Samoa ile asiasiga a le minisita o fefaatauaiga a le Malo o Ausetalia le alii o Simon Crean na ia sainia ai lea maliega ma le sui palemia le afioga Misa Telefoni. Sa afea e le asiasiga le kamupani oe Yasaki i Vaietele lea na faamautu ai e le alii minisita mai Ausetalia le fia lagolago mai pea o lona Malo i le faatumauina o galuega a lea kamupani ina ia maua ai pea avanoa faigaluega oo tatou tagata. E $320,000 se foai tupe na tauaao e lea aumalaga mo le aoga mo fanau e iai manaoga faapitoa le Senese o loo i Vaitele uta, o le a faatupe ai se faleaoga lelei ma nisi o meafaitino mo le aoaoina o fanau e le atoatoa le malosi o le tino.
O le mataupu lea e faatatau i le ofi atu o Samoa i le faalapotopotoga o fefaatauaiga a le lalolagi sa umi foi se taimi o faatalanoaina ma faaalia iai finagalo o le atunuu ma iloiloina foi nisi o itu lelei ma faale lelei o le iai o Samoa i lea faamoemoe. O se tasi lava o itu faapitoa e manuia ai le atunuu pe a oo ina faataunuuina lenei fuafuaga o le tele lea o faitotoa e matala mai i atunuu i fafo poo sui o le WTO e faatau atu ai ana oloa faatusa atu i le taimi nei e nao ni nai maketi o loo iai ma nisi o loo tau sailia pea. Peitai e manatu nisi o le ofi atu o Samoa i lenei faalapotopotoga o le a avea foi ma ala e ao ona finau malosi ai ina ia ausia le tulaga e tatau ona faamalieina o ituaiga faalapotopotoga tetele faapenei. O Fiti le atunuu e foliga mai sa muamua atu i luma o Samoa i le agai atu ai e avea ma sui o lea faalapotopotoga i le taimi na faatoa taua ai ma o loo faatali pea se tali o le mataupu lea. Mo le taimi na faaalia i nisi o finagalo i Aukilani nei le faamanuiaina foi o le avanoa ua maua e fefaatauai ai Ausetalia ma Samoa i ni nai oloa e mafai ona faia i lo tatou atunuu ma faatau atu i atunuu tetele poo maketi i fafo ina ia tele se vaegatupe e maua e o tatou tagata.
