E fia afea i se upu le vavaō i le suiga o le ituala e ō ai taavale. Sa umi ona avatu, aumai; sa alu solo tetee i le Palemene, sa fai faamasinoga.
E maeu le alofa o le Atua auā o mea e tutupu e iai ma lona a‘oga aogā. Auā ua avea le faitio i faafitauli e ono tulai mai, ua matuā mataalia ai le malo, le Ofisa o Galuega, le Ofisa o Femalagaiga ma le Ofisa o Leoleo, ina ia puipuimalu i ni faalavelave e ono aliali mai.
Ma ua avea le latou pulunaunau, ua oo ane ai le lagona i ē sa faatautee, e lē mala‘ese i latou ma i matou.
Ua alo mai felagolagomai ma le Ofisa o le Malo, aemaise ai foi le taulalata mai i le Kerisimasi, ma ua faamalieloto ona ua faamaumauina ua faaitiitia faalavelave faafuasei e maliliu ai tagata.
Poo ā eseesega, ae a oo i ooooga, ona tatou manatua lea o le mau tuufaasolo, O Samoa e lē o se malo, o le uso ma le aiga.
E fia afea i se upu le Galulolo poo le Sunami o Setema 29, 2009.
O le feau aupito i tāua o le Sunami, ona ua faamaonia ma fai tino o le mau faavae a o tatou mātua, O lē lave i tiga, o le ivi, o le toto, o le aano.
Poo fea lava o le lalolagi e iai Samoa, aemaise ē faasino i aiga ma nuu na afaina i le Sunami, sa tilitili alualu mai.
Auā e te lē Samoa i le gafa, pe e te Samoa i le faalupega, e te Samoa i le alofa tulai i le taimi o faalavelave.
E ui i le matuitui ma le tiga, ae amuia fanau ua vaai i le tino o le alofa tulai, e ganea ai le tofi ma le faasinomaga.
A o o‘u i le mataupu o le Sunami, e fia afea i se upu Lologa o loo lofia ai nei Ausetalia.
Ou te fia faaopoopo atu i le faamaisega a le alii Palemia i lo‘u faapea atu i le Malo ma le atunuu o Ausetalia, o loo manatua outou i o matou mafaufauga ma talosaga.
O loo matou manatua outou i lo tou lavelavetū ia Samoa i le Sunami. Ma e matou te manatua outou i upu ua fai ma upusii mai le tusi a Thornton Wilder “The Bridge of San Luis Rey”, e uiga i ni tagata se toalima na pa‘ū‘ū i le tofē ina ua malepe le alalaupapa ma maliliu ai.
Ua lata mai foi ona tatou feoti lea, ma o le a galo ia i tatou le toalima lenei, ma e oo foi ia i tatou, e au foi ona alofagia i se taimi, ona galo lea. Ae ui i lea, ua faamalieina ona sa iai le alofa. Ma, o lagona uma o le alofa, e toe foi i Lē na afua mai ai.
E lē manaomia foi e le alofa le manatua. E iai le nuu o ē ola ma le nuu o ē oti, ma o le alalaupapa e fesootai ai, o le alofa. Auā pau lea o le mea e tumau ma ‘anoa.
O le isi feau tāua o le Sunami, e lē gata i le pale mai o atunuu o le Pasefika, ae faapea ai ma Malo ma tagata o le lalolagi. O se molimau lea, o i tatou uma o loo alaala i le lalolagi, o le fanau a le Atua.
