Malelega a le Ao Mamalu o le Malo

O le matua o le tautalaga, ‘O Samoa e le se Malo, o Samoa o le Uso ma le Aiga.’ Mai le aso 1 o Iuni o le tausaga ua tuanai sa o tatou sauniuni ma faapolopolo i le tino le mafaufau ma le agaga mo le taeao lenei.

O le taeao e faamanatu ai le 50 tausaga talu ona tutoatasi le malo Samoa. Ua o tatou tuutuulaau, ausia le vasa, sopo mai le ala ina ia o tatou mafuta e molimau ma mafaufau malie i le feau o lenei taeao faitauina.

I le aso 1 o Ianuari i le 90 tausaga ua tuanai sa saunoa ai le afioga ia Tupua Tamasese Meaole i le malae i Tiafau nei i lona tulaga o le Ao Soofaatasi ma le susuga ia Malietoa Tanumafili le Lua. O le autu o lana lauga o le agaga faamagalo. I le aso ou te toe fia asiasi i le mataupu lenei o le agaga faamagalo.

I soo se faamanatuga o le malo tutoatasi tatou te manatunatu, e pei a ona saunoa le taitai o le sauniga i tuga, i le loto nutimomoia, i le agaga tauivi na saili ai e o tatou matua le malo tutoatasi lea ua tatou aeae ai nei. Tatou te manatua le vaega a le Mau ma le vaega a le Malo ma le latou agaga faitaulaga. E tele le taulaga a le Mau i lana mau ma le talitonuga, faapea ai foi ma le itu a le malo. Ma e ono mafai ona ou faapea atu, e lei mavae le eseesega o mau nei, mai le lagona o tagata.Ma o se tasi lenei o avanoa tāua e tuufaatasi ai mau nei. E maualafia pe a tatou talitonu, o le Mau ma le Malo sa latou saili le mea i lo latou talitonuga, e manuia ai Samoa.

Fai mai le tala, na faafaletui Aleipata, poo fea le itu e lagolago. Ona maua ai lea o le tasi, e o Tafua ma le Itupa i Lalo e lagolago le Malo, ae o Fuataga ma le Itupa i Luga e lagolago le Mau. E mafua le tofa ma le faautaga, poo ai lava e manumalo, e faamanuiaina Aleipata.Afai e manuia le Malo, foi mai Tafua ma le manuia auā Aleipata.Afai e manuia le Mau, foi mai Fuataga ma malo auā Aleipata. O le mea tāua, aua ne‘i aisi la Aleipata, poo fea lava le itu e manumalo.

I le tausaga e 1936ina ua manumalo le itu a Leipa i le faiga palota, ona faailoa mai lea e le malo Niu Sila, ua malie e felagolagomai ma le Itu a le Mau ma le Itu a le Malo, e sauniuni le atunuu o Samoa mo se malo tutoatasi. Ae ina ua momoli mai le finagalo faaalia o le Malo Niu Sila i Samoa nei, sa aliali mai se toatuga. Sa fono faipule o le Malo i Mulinuu nei, ae fono le Mau i Vaimoso. O le fesili tugā, poo ai o le a savali.Pe savali le Malo i le Mau, pe savali le Mau i le Malo.

Fai mai e umi lava o fālō, ona tulai ai lea o Timu Laufā, o le faipule mai Safotu ma ia faaolooloma‘au i le finagalo o faipule. Fai mai a Timu:‘O loo ua valaau le Atua. O loo faatali mai o tatou uso.

O ai lea tatou te faatali i ai? Tatou savavali i Vaimoso tatou faafeiloai ma o tatou faafealofani ma o tatou uso.” Fai mai o le lauga lea na tafa ai le finagalo o Faipule, ua o latou savalia le ala. Fai mai le tala, ina ua vaai mai loa le Maota o le Mau ua savalivali atu faipule o le Malo, e lei toe nofofale se isi.

Ua tutū mai i luga ma ua omai ma loimata, feasogi ma o latou uso. Tatou manatua le tofa ma le faautaga a Aleipata, ma le faaolooloma‘au a Timu i le aso lenei. Amata mai lenei faaleleiga ona felagolagomai Niu Sila, le Itu a le Mau ma le Itu a le Malo, seia oo ina tini taunuu le faamoemoe i le 1962.

I le asō tatou te manatua upu a Tupua Tamasese Lealofi III, “Samoa e, ia tausi le filemu, ma lo‘u toto ne‘i tauvalea, ia aogā lo‘u ola mo lenei mea.” Ae lē ‘anoa ia le mau i le maliu ma se mavaega a se toatasi, ae ‘anoa ona ua luagia nei upu ma le tofa alualumamao a ē na faaauauina le galuega, e iai le afioga ia Tuimalealiifano Si‘u, Taisi Nelesoni, Faumuina Mulinuū I.

I lenei taeao o faamanatuga, tatou te manatua ai le lototele o Sir Maui Pomare ma Sir Apirana Ngata, ia la lauga i le Palemene o Niu Sila, e tetee ai le malo o loo avea ai i laua ma minisita, ona o le lagolago ia Samoa.

Tatou te manatua ai foi le lagolago a faigamalo a Niu Sila, i le Labour ma le National i le sini o le faamoemoe, o se malo tutoatasi mo Samoa, mai le tausaga e 1936 seia oo i le 1962.

E ao foi ona ta‘ua i lenei avanoa le galuega mae‘a ma le sogasogā a Sir Guy Powles, Jim Davidson ma Collin Aikman. Tatou te manatua foi le tomai o Kovana Solofa ma le mau tusitusia i le gagana ma le tu ma le aga a Samoa, a Kovana Sulusi, faapea ai ma le atina‘ega o faatoaga ma pisinisi na avea ma taiala o faiga malo i luma mai o le pulega a le Malo Siamani. E ao foi ona tatou manatua le faautaga a Lauaki ma ē na lagolagoina, e lē mafai ona faamalieina e se atinae poo se tomai, le faoa o le tofi o se atunuu.

E tu ola i le mafaufau le malaga mai a Helen Clark le Palemia o Niu Sila, pe ā ma le sefulu tausaga ua tuanai, e molioo mai le faatoesega a le Malo ma tagatānuu o Niu Sila. E faamomoiloto le feau faaleagaga ina ua tuufaafeagai ai le salamō ma le faamagalo. Faafetai i le Atua i lau faasoa mai o ni taitai lelei e faatonutonu folau i le sa o Samoa.

I le tulaga o le Ao o le Malo, le Afioga Tupua Tamasese Meaole, ma le Susuga Malietoa Tanumafili II. Le taitai o le malo tumaoti, le susuga ia Eugene F Paul. Palemia o le Malo Tutoatasi o Samoa, Afioga Fiame Mulinuū II, Afioga Tupua Tamasese Lealofi IV, Afioga Vaai Kolone, Susuga Tofilau Eti Alesana, Susuga Tuilaepa Sailele Malielegaoi.

E ao foi ona ta‘ua faapitoa le galuega fitā a faigamalo a Tofilau ma Tuilaepa i le toe lalagaina o le malo ma le atunuu, mai afā o Ofa ma Valelia, aemaise ai le Sunami i le aso 29 o Setema, 2009. Tatou manatua ia ē na maliliu, ē na manunu‘a, ma le limafoai e laveai ai aiga ma toe faaleleia meatotino ua faatama‘ia. Tatou te manatua foi i lenei aso ma le agaga faafetai le galuega a taitai ma faifeau o ekalesia,faauluuluga o matagaluega, taitai o nuu ma taitai o aiga. Auā o i latou ia e fafaga, tausi ma faalaeiau le agaga e maua ai le toafilemu ma le nofolelei.

Auā a leai le galuega lea ma le agaga e fofoa mai ai, tatou te lē mafai ona faatino ma faataunuu ia sini o le faamoemoe.

O le agaga lelei e faaosofia ai le sāili malo; e maualafia ai le tatou talimalo i taaloga o le Pasefika i le 1983 ma le 2007. E mafua ai ona maua e le aulakapi toafitu le Ipu o le Lalolagi i le 2010, ma e mafua ai ona maua a tatou pineauro i le siisii mea mamafa i taaloga a Malo o le Taupulega i Initia.