O le autū lea o le Taiala mo le Aoaoga o Tagata Pasefika i Niu Sila o loo galulue malosi ai le tamaitai fomai o loo avea nei ma taiulu o le matagaluega o Pasefika i le ofisa o aoga, Dr Lesieli Togati‘o ma lana matagaluega faapea le Komiti o le aufaufautua a le Pasefika.
I se saunoaga a le tamaitai fomai, sa ia ta‘ua ai o le autū o le Taiala, o le mautinoa lea o tamaiti Pasefika o loo “auai i aoaoga, aofia ma aafia ai i aoaoga, ma maua ni aoaoga.”
O le matafaioi faitele la a tatou o mātua, aiga, tagata lautele ma soo se tasi, o le mautinoa lea o loo auai, aofia ma aafia, ma o loo maua ni aoaoga a le fanau. Mo le faamautuina o lenei mau a le ofisa o aoga, o loo ua fuafuaina nei ni faafouina mo faiaoga ina ia mautinoa le faaaogāina e faiaoga o ni alagaoa talafeagai ma ni metotia saunia lelei, e faamalieina ai manaoga o fanau Pasefika.
Ua mataituina le tāua o le galulue vavalalata o pulega, komiti faafoe, faiaoga ma mātua ma aiga, ina ia mautu le femalamalamaai, ina ia saunia ma tapenaina ni polokalame talafeagai ma le anagata e siitia ai le tulaga o le aoaoina o alo ma fanau a le Pasefika. O loo faamalosia le tāua o faafouina a faiaoga ae ia filifili tatau ina ia talafeagai mo le fuafuaina tatau o polokalame.
O se tasi vaega o lenei taiala, o le faamalosia lea o auala o fesootaiga a faiaoga i laasaga eseese ina ia faigofie Malaga faaleaoaoga a le fanau mai Aoga Amata seia oo ina ulufale atu i iunivesite ma matata eseese, aemaise foi le ulufale atu i fale faigaluega.
O loo ua iai nei se polokalame ua ta‘ua o le Youth Guarantee o loo galulue faatasi ma le Careers New Zealand e lagolagoina tupulaga Pasefika ina ia sololelei le Malaga mai aoga maualuluga mo iunivesite, matata eseese ma galuega.
O se tasi vaega ua matauina le tāua o ni taitai lelei i totonu o potu aoga e fesoasoani i fanau Pasefika. I se lipoti mai le TeachNZ, o le 52,000 o faiaoga i Niu Sila, e na o le 1,368 faiaoga Pasefika ua lesitalaina.
Ua manino mai ai i nei fuainumera le manaomia o le faateleina o le numera o faiaoga Pasefika.
O le isi vaega tāua lea o le taiala ua fuafuaina e le ofisa o aoga, o le unai lea o alo ma fanau ina ia taumafai e faauma tausaga ma pasi le NCEA i aoga maualuluga, ma tausinio mo ni tusipasi maualuluga ina ia faamanuiaina i ni galuega totogi lelei auā se manuia o latou ma o latou aiga.
O loo tele pea ni polokalame o loo ofaina e le tele o iunivesite ma matata eseese, aemaise matagaluega tuma‘oti, e tapena ai i latou e fia avea ma faiaoga e lē gata foi i lea, o polokalame e avea ai ma faiaoga i tupulaga talavou.
O nisi o nei matagaluega, o loo iai le Workforce Development Ltd, na amata ona ofaina a latou polokalame i Aukilani i le 2011 i le tapenaina lea o i latou e fia avea ma faiaoga i aoga amata, faapea foi i latou e fia galulue i polokalame mo tupulaga.
O nisi o i latou sa auai i nei polokalame i le tausaga ua mavae (2011), ua oo atu nei i iunivesite e faaauau le taumafai, a o nisi o loo ua faigaluega nei i totonu o Aoga Amata.
Na amataina ia Fepuari polokalame i le Level 3 ma le Level 4 mo Aoga Amata i le tausaga nei 2012, ae ua toe fuafua e amataina ia Aperila ma Iulai o le tausaga nei lava isi polokalame, ae o Me e toe amata ai le isi polokalame mo tupulaga talavou.
Mo nisi faamatalaga, faafesootai le Workforce Development i le: 0800 833 5581.
Ua lē toe faigofie avanoa mo alo ma fanau i le 21 seneturi lenei ua tatou iai. Ua manaomia lo tatou galulue faatasi ina ia faamalosi ma faalaeiau i le fanau ina ia latou maua ni lumanai manuia.
“O lou ANANAFI, e fausia lou TAEAO”
(Rev. Saletaulua Autagavaia – 2004)
O au galuega lelei e faia mo le fanau i le taimi nei, e fua mai ai ni fua lelei i le lumanai.
E avea ai i latou o ni tagata aoaoina lelei o le 21 seneturi, e iai le tomai e fetuutuunai ai o latou manatu, ina ia mafai ona latou faia ni faaiuga lelei, e avea ai i latou ma ni tagatānuu lelei. Manuia tele fuafuaga o lenei vaiaso.
