E faafeiloai atu ma faatalofa atu ia te oe Samoa lou atunuu pele i le suafa Paia o Keriso lo tatou Alii ma lo tatou Tupu o loo soifua pea. Malo le soifua. Ia viia le Atua i lana tausiga mo oe ma au. Ia viia o ia i ana fuafuaga mamana ma lana faautaga loloto.
E maofa lava le mafaufau i le matautia o le Atua ma ana vavega ma mea mamana ua ia faia e pei o upu o le fai salamo ‘A ou vaai i lou lagi o le galuega a o tamatamai lima”.
E le o ni galuega a ona alofi lima poo ona tauau, ae o galuega a ona tamatamai lima. E tau mai ai le tele tele o le Atua. O le lagi ma le lalolagi e pei o se lalagaina o se ietoga i aao o le Atua. E faaaoga ona tamatamai lima, e leai tele se malosi e moomiia ai. E le gata i lea e tau mai ai le laiitiiti tele o le lagi ma le lalolagi pe a fuafua i le Atua, ua na ia faaaogaina ona tamatamailima e pei e ini pee u ai se mea laitiiti o taatia.
E matua matautia lou Atua ma lou Atua, e malosi, e mamana, e matautia lava o ia. Oute ofo i se tagata e le oo ane i lona loto lenei mea ese. E maofa ma ofoofogia.
O se vaaiaga foi lea o loo tatou vaaia ma tulimataina i le Tusi o Faaaliga. O le ofofogia o le Atua ma lona malosi ma lona mamalu.
O le mataupu e 21 o le Tusi o Faaaliga o loo vaaia ai le mamalu ma le matautia o le Atua.
Ao tatou matamata i le Ierusalema fou lea o loo tau faamatala mai e Ioane .
Ao taitaiina e le agelu Ioane i le Aiai Fou sa ia maitauina o ona auala e pei o le tioata manino ia le auro lelei o loo folasia ai.
Ua ia vaaia foi se isi mea ese, o le lagi e leai se malumalu e iai. Fai Ioane e leai se malumalu aua o lona malumalu o le Alii le Atua lea, e ona le malosi uma lava, atoa ma le Tamai Mamoe. E sili ae lena malumalu nai lo le mamalu o le Atua lea ua vaaia i le aai uma.
O lona uiga e leai se mea e toe moomia ai se fale tatalo aua o lea ua iai le mamalu o le Atua, i le lagi atoa. O le Atua foi ua aofia i mea uma poo le lagi atoa uma. O le mamalu o le Atua e le pa puiapuia lea e se fale e faua i lima. E le toe moomia se malumalu pe afai o lea o le tatou tumau faatasi ma le Atua i taimi uma.
O se tasi vaega i le aai fou e le toe iai se la. E le moomia se poo se masina poo ni fetu. Aua o le pupula o le Atua ua faamalamalamaina ai e ia, o le Tamai Mamoe o lona moli lea.
O le Tamai Mamoe o le Malamalama lea o le Ierusalema Fou.
Manatua foi o Iesu Keriso lava na fetalai o ia o le Malamalama. E le gata o le Malamalama o le Lalolagi ae o ia foi o le malamalama o le lagi.
Ae tago e faavasega ane le siosimaga lea o loo faamatalaina mai e Ioane ona faapea lea o se lagona “O le lagi ua matua pupula lava i lona malamalama o le mamalu o le Atua e leai se mea e lilo”.
O le tala a Ioane “O nuu foi o e ua faaolaina, latou te savavali i lona malamalama. O tupu foi o le lalolagi latou te aumai iai a latou malumalu ma viiga.
O se vaaiga matautia. O Tupu uma atoa ma o latou mamalu o le ifo atu i le Atua.
O nuu uma o loo taua o loo faatatau ia o tatou o tagata ‘Nuu Ese’. O loo aafia ai tagata Isaraelu ma soo se tagata na talia Keriso e fai ma ona Faaola.
O se tasi o uiga ese o le a vaaia i le lagi, o le tulaga lea, o na puipui e le punatia i le ao, aua e le toe iai se poo se po. O le lagi malamalama faasoloatoa.
O loo taua soo se Ioane Keriso o le Tamai Mamoe i le totonu o le Lagi e pei ona ia vaaia nei.
O le oga totonu lemu o mea uma i le lagi ma lona autu, o Keriso lava e toatasi. O lea foi le tulaga e tatau ona tatou faia, Ia avea o ia o le ogatotonugalemu o tatou olaga i mea uma tatou te faia. O manatunatuga ma filifilia o le loto e tatau ona faia faatasi ma Keriso, ma faaalugaina ma faasilisilina o ia i mea uma tatou te faia.
“O ia o le ulu o le tino,o le ekalesia lea o le mataga foi ia o le ulumatua o e ua oti, ina ia faia o ia ma faasilisili i mea uma lava. (Kolose 1:18)
I le fuaiupu e 27 o loo faapea ai Ionae “E le sao atu lava i se mea leaga e tasi poo se nate faia se mea e inosia, po o se pepelo, na o i latou lava e ua tusia i le tusi o le ola, a le Tamai Mamoe.
Ua na o Keriso lava na te mafaia ona ia tusiaina se suafa i le Tusi o le Ola. O le taimi lava e te salamo ai mai au agasala ma tuuina atu lou soifua ia te ia, o le taimi foi lea ua piimau ai lou igoa i le Tusi o le Ola e le mafai ona toe aveeseina.
O le vaega taua lena ia tatou tuliamataiaia. E le o le tusia o lou suafa poo lau matafale i lau ekalesia ona faapea lea ua tusia ai ma lou suafa i le Tusi o le Ola. E leai. O le suafa i le lagi poo le Tusi o le Ola e tusia e Keriso i lona lava toto na faamaligiina.
O Keriso na fetalai; “Ae peitai aua tou te olioli i lenei mea, ina ua usiusitai agaga ia te outou, ae ia olioli ina ua tusia o outou igoa i le lagi”. (Luka10:20)
O le fesili tele lava tatou te fesili ai ao maua le avanoa e faapea ‘Ua e mautinoa ua tusia lou suafa i le Tusi o le Ola’?
A mafai ona e taliina lena fesili, ua mafai foi ona e iloa le laasaga ma le taunuuga o lou soifua
Ia mautinoa lou filifilia ia Keriso.
Soifua
