Ia maualauga pea le viiga o le Atua le Tama, Alo ma le Agaga Paia. Faafeiloai atu i le mamalu o Samoa i ona itu e fa o le lalolagi o mafai ona maua ai lenei avanoa tatou te fetufaai ai i le afioga a le Atua, lona finagalo tusitusia mo i tatou.
Amuia i tatou e mafai ona tatou malamalama i le finagalo tusitusia o le Atua e aunoa ma se faasaina poo se lamatiaina o le soifua. Na o le pau le vaega o loo lamatia ai lo tatou iloa ma le faatuatua o le le talitonu ma le le suesue. O le mafuaaga lena o lenei tusitusiga ina ia avea o se fesoasoani ina ia faatupuina le naunau e fia iloa atili i le finagalo o le Atua.
I le vaiaso na tea nei na tatou iloa ai le saisaiina o le tiapolo ma lafoina i le to e le uma. Mai le fuaiupu e fitu, mataupu e 20 o loo iloa ai le toe tatalaina mai o Satani i le mavae o tausaga e afe.
E iai le mafuaaga o lenei tulaga. O le alu ifo o Satani i tulimanu e fa o le lalolagi, Koku ma makoku ina ia mafai ona tuufaatasia o se autau e sili ona toatele ma le mafai ona faitaulia e pei o oneone o le sami. O se tasi nei o perofetaga poo valoaaga i le Esekielu 38-39. O loo talanoa lenei valoaga i le maea o le taua i le va o le Atua ma Makoku. O lenei aai o se nofoaga poo lauelele o loo i lalo o le malo o Rusia i le taimi nei.
A oo i lea vaitau, o le a toe faaolaolaina igoa o nuu na iai muamua ina ia mafai ona talafeagai ma valoaga a le Tusi Paia.
E pei ona taua e Esekielu, o le galuega mulimuli lava a Satani ae lei maua lona iuga o le taumafai lea ina ia osofaia le Nuu Paia. O le a faapea ona faatamaia le autele e ala i le afi mai matu e pau ifo mai le lagi. (9)
Ona fai mai lea o le fuaiupu e sefulu e faapea, ‘O le tiapolo foi o le na faasese ia i latou ua lafoina o ia i le lepa afi ma le teio (10) o loo iai faatasi ma le manufeai ma le perofeta pepelo, e puapuagaina ai i latou i le ao atoa ma le po e faavavau, faavavau lava.
O lona uiga o le a filemu uma le lalolagi mai lea taimi e le toe iai ni mea leaga e toe tutupu aua o le faapogai o mea leaga uma lenei ua faaumatia e faavavau lava.
Ina ua maea atu le vevesi na iai ona vaaia loa lea e Ioane le taatia mai o le matagofie o le lagi atoa ai ma le mamalu o le nofoalii o le Atua e faapea e sinasina. Ua matua sili atu lona paepae.
O le taimi lea ua faaigoaina e le Tusi Paia o le Faamasinoga i le Nofoalii Sinasina.
Ua mavae atu le lagi ma lalolagi e pei ona faamatalaina e Ioane e faapea “ua sosola ese le lalolagi ma le lagi i ona luma e le iloa foi se mea e tu ai i laua”.
Na faailoa mai foi e le Keriso i le Mataio e 24:35, ‘e mavae atu le lagi ma le lalolagi, a o au upu e le mavae atu lava ia’.
O le lalolagi ma le lagi o loo tatou nonofo ai e iai le taimi e mavae ai ma uma ai. A o le Atua e tumau lava o ia. O ana fuafuaga e tumau. O lona finagalo e tumau. O le Atua e le liliu lava ia.
O se mea matautia o le a oo i lea taimi e pei ona faamauina e Ioane, o soo se tagata lava poo fea na oti ai ma le vaitau na oti ai ma le itu lalolagi na oti ai o le a faapea ona toe faatuina mai e le Atua ina ia mafai ona tu i lona faamasinoga.
Afai na goto lou vaa ma e maliu i le sami i le tausaga 1766 poo 2008, fai mai le tala a le Tusi “o le a avae foi e le sami e na oti sa iai” (13) O se mea ofofogia lea tulaga pe taumafai le mafaufau e faavasega le tagata na malemo, aina e ia ma meaola o le sami le tino, o nisi vaega ua pala ma tafea solo. E le o taua mai e le tusi pe faapefea le tulaga e oo i ai lenei vaega ae e mautinoa tatou te o i le lagi ma o tatou tino augavale.
O lona uiga o le agaga o le tagata o loo talanoa i ai le Tusi Paia. Peitai o loo tautino le Tusi Paia e avae e le sami, le oti ma Seoli tagata na feoti ai. O le a faapea ona taitoatasi ma faamasinoina i latou i luma o le Atua. O le faamasinoga lea o loo taua o le Faamasinoga o le Nofoalii Sinasina. O i latou uma na soifua mai i lenei lalolagi latou te lei taliaina Keriso o le mautinoa le tulai i luma o le Atua i lenei faamasinoga.
O se tulaga faigata ma le faanoanoa pe a e tulai i luma o lenei faamasinoga. Aemaise i tatou ua faalogo i le Tala lelei ia Keriso ae tatou loto maaa pea ma le taliaina o ia i o tatou olaga.
O se tulaga faigata ma faanoanoa i le tagata sa lotu ma le manatu e maua le ola e faavavau e ala i le toaga i le lotu. Ua tatou mautinoa e le o le toaaga i le lotu e maua ai le ola e faavavau. E iai foi isi ituaiga o lotu ma tapuaiga.
O le maua o le ola e faavavau o lou salamo lea i au agasala uma ma valaau i le Atua ina ia faamagalo au agasala. Tatala atu lou loto i le Atua ma valaaulia Keriso e ulufale mai i lou olaga e avea o le Alii ma le Faaola.
O le tautinoga lena e faia. Ona e maua lea o le ola e faavavau e pei ona tusi Ioane e faapea “O le faatuatua i le Alo, ua ia te ia le ola e faavavau. Ao le le faatuatua i le Alo e le iloa e ia le ola a o le toasa o le Atua o loo tumau lava i ona luga”, Ioane 3:36.
O le ola e faavavau e amata i le taimi e te taliaina ai le Alo o le Atua i lou loto e ala i lou faatuatua e pei ona taua e Ioane.
O le taimi lava e faatuatua o le taimi lena e te maua ai le ola e faavavau e le taumateina. O le tagata faatuatua la i le Atua e iloa i lona soifua naunau mo le Alii ma ola faafiafia ia te ia ae le o tuinanau poo le ola i le agasala e pei sa masani ai.
O le tagata faatuatua poo le tagata Kerisiano ua talia Keriso e le tu o ia i lea faamasinoga, aua o loo ua i le lagi o ia ma nofo tupu faatasi ma Keriso, a o le taimi lea o loo faamasinoina i latou e le talia ma faatuatua ia Keriso.
Na vaaia e Ioane ia tusi ua fofola. O le faamasinoina o tagata uma e faatatau i mea o tusia i le tusi.
Ou te talitonu o nei faamaumauga e le aoga lea i le Atua aua o ia na te silafia mea uma. E leai se mea e misi, sina iota e le iloa ma maitauina e le Atua aua o ia e iloa ma silafia mea uma lava aua e ati lana silafaga.
Ou te manatu e ala ona faamaumau e le Atua nei mea uma e uiga i le soifua o le tagata aua o ia e tonu lana faamasinoga. Ia mafai e le tagata ona faitau i le faila o lona soifua i le lalolagi ina ia mafai ai ona ia iloa mea uma ma ioeina le tonu ma le moni o le faamasinoga a le Atua.
A o tatou ola ma soifua i lenei lalolagi e tatau ona tatou magafagafa i le taunuuga o mea ma lou soifua. Fai mai le saunoaga e a Keriso e faamasinoina i tatou uma i upu tatou te tautala ai. Mataio 12:36.
O upu e tauamiotonuina ai i tatou, o upu foi e faamasinoina ai i tatou.
I le fuaiupu e 14. “Ua lafoaina foi le oti ma seoli i le lepa afi, o le oti faalua lea. O le lepa afi lea”.
O le oti faalua e faatatau lea i le tagata ua oti i la le tino ae ua oti foi i la le agaga.
O i latou uma e lei maua o latou suafa i le Tusi o le Ola ua lafoina i latou i le lep afi.
Uso ma tuafafine. O le ā lau tali atu i le Atua e uiga i lenei mea ua tatou aoaoina mai lana Tusi Paia?
Talia nei Keriso o ia o le Ala, Upu Moni ma le Ola. E le alu atu lava se tasi i le tama pe a le ui atu ia te Ia”.
Faia nei loa lau filifiliga manū o maua lou avanoa.
Soifua ona o Keriso
