Malamalama i le Tusi o Faaaliga (43)

E fiafia le agaga ua maua foi lenei avanoa e faafeiloai atu ai i le suafa o Keriso lo tatou Alii i le paia ma le mamalu o si o tatou atunuu.

E iai le talitonuga sa manuia tapuaiga o le faaiuga o lena vaiaso ua tuanai atu. Na tofu le gogo ma si ana i‘a aua tausamiga faaleagaga ina ia mafai ona malosi lo tatou ola faatuatua ma agai pea i luma le savaliga faaleagaga.

Soo se savaliga lava e iai lona amataga atoa ai ma lona faaiuga. E masani ona talanoa mai le Tusi Paia ia i tatou ma faailoa mai e ao ona tatou savavali faaleagaga ia poo le savavali i le Malamalama (1 Ioane 1:7). O loo faailoa mai foi e le Tusi Paia o loo tatou tamomoe i le ala tanu (Eperu 12:1).

Soo se amataga e tatau ona iai sona faaiuga ma sona taunuuga. O le tu foi lea ma le aganuu a Samoa e masani ai. Tatou te faalogo i faaupuga faapea, ‘Na amata i le Atua e faaiu foi i le Atua’, o se isi upu e masani ona fai e faapea “o le a le tuua faapoevaga lo tatou aso’. O loo iai se lagona i lea faaupuga e tatau ona faaiu lelei se mafutaga.

O fuafuaga a le Atua e le tuua faapoevaga. Ua iai le taimi atofa a le Atua e taualuga ai mea uma, ma faia ai le saunoaga faaiu. O le Atua poto ma ana foafoaga e mamao ma loloto. E faigata i le mafaufau o le tagata ola ona faavasega peitai o loo ua maea ona tapena le taualuga.

Ua tatou taunuu mai nei i Siui o le Tusi o Faaaliga, le mataupu e 22.

I lenei mataupu o loo faaauauina ai le faamatalaina o le lagi. O le lagi o loo iai le vaitafe manino e tafe mai i le nofoalii o le Atua ma le Tamai Mamoe. O le vai lea o le ola, e manino e pei o le maa tioata. Soo se mea e iai le vai e iai foi ma le ola.

O le lagi o le nofoaga lea o le ola e faavavau. Soo se mea e iai le vai e iai foi ma ni laau e ola. O loo faamatala mai foi le lagi o loo iai le Laau o le Ola. O se laau matautia lenei e 12 ona fuata. E fua i masina uma. O lau o lenei laau e faamalolo ai nuu.

O le laau foi lenei sa i le amataga i le Tusi o Kenese (2:9), i le faatoaga o Etena ae o lenei ua toe aumaia i le faaiuga i le Faaaliga. Na faasaina Atamu ma Eva ona tago i lenei laau. Ina ua agasala i laua ona tofia loa lea e le Atua le agelu ma lana pelu e leoleoina lenei laau (Kenese 3:24).

I le lagi foi o le a le toe iai se toe faafano e tasi. Na oo mai le fano ma le faasalaga ona o le agasala (Kenese 3:17-19). Na faasalaina le laueleele ua mafua ai ona tatupu ae o vao leaga, ma vao tuitui. O le faasalaga foi lea e tasi e talitonu ua mafua ai ona feai o nisi o meaola.

O se tasi o vaega poo mea tatou te faia i le lagi o le auauna. Masalo o le manatu o nisi, a tatou taunuu loa i le lagi, ona pule lava lea o i tatou ma le nofoaga poo le tulimanu tatou te tafafao ai ma eva i le laufau malu. Peitai o le Tusi Paia o loo faailoa mai tatou te ola auauna.

A tatou taunuu i le lagi o le a o tatou vaaia foliga mamalu o le Atua. Ailoga e oo se le lavā i o tatou mata pe a tatou maimoa ia te ia. O le a o tatou vaaia ona fofoga alofa. O le a le toe iai se mea e ponati ai lea tulaga. Fai mai saunoaga a Keriso, “Amuia le loto mama aua latou te iloa atu le Atua” (Mataio 5:8).

E le toe taumatea poo ai e ona i tatou i le taimi tatou te iai i le lagi aua o le a tusi lona suafa i o tatou muaulu. E oso le fia ata pe a manatu i le taumafaiga a Satani lea na fai ina ia tusia lona igoa poo lana faailoga i lima ma muaulu o tagata. O le faailoga na tatou aoaoina e taua o le ‘faailoga o le manufeai’.

Na ia iloa lelei lava o le mea lea o le a faia e le Atua, ona ia taumafai foi lea e kopi ma fia atua ma ia faia lea tulaga.

E masani ona tatou faailogaina a tatou mea totino. A fai ni faigaai poo faiga toonai e masani ona faailoga e tina a latou ulo ma ipu e ave ai taumafa ina ia aua nei feleiloagai ma ipu poo ulo a isi, ina ia mafai ona toe foi mai lava si ana mea totino.

O tatou ua uma ona faatauina i le tau e le Atua, o le toto lea o Iesu Keriso. O i tatou foi o ana mea totino.

I le fuaiupu e lima, o loo toe faamanatu mai e Ioane le pulega o le lagi e le Malamalama. O Keriso lea, e le toe iai se aoga o se moli, e le toe iai se po poo se pogisa i le lagi.

O le vaega o le a sosoo ai o le mataupu e 22 o loo faailoa ai toe saunoaga a Keriso i lenei valoaga. E taua tele nei toe upu.

O aso ua mavae, soo se maliega ma ni tuutuuga e faaaogaina upu. Sa le faatauaina tele ni feagaiga tusitusia. O le upu e talitonuina ma ua lava lea. O nei ona po e taua tele pepa tusitusia aua e mafai ona faaaogaina i se faamasinoga.

O le saunoaga mulimuli o loo taua i le Faaaliga o toe upu a Keriso e faapea, “O upu e faamaoni ia ma le moni”. O lea saunoaga o se faamautuina o le mea o loo tusiusia e Ioane. O mea ua vaaaia ma faalogo i ai Ioane, ua fai mai le Atua, o mea moni ma le faamaoni.

E leai se mea e sese pe sasi. Talu ai o le sao atoatoa o lenei faaaliga, ua tuuina i ai ma se faamanuiaga.

E iai oloa a e faatauina, ua matua mautinoa lava le lelei atoatoa, ona tago lea o le faioloa ma tuu i ai le taimi a leaga ai, e mafai ona toe faafoi atu ma fesuiai ma se vaega fou pe toe maua mai lau tupe. O se faamanuiaga lea e maua e le tagata faatau. Ae le iloa mea e tutupu.

O le faamanuiaga o loo aumaia e Keriso poo le faaamuia e tuuina atu i le tagata e tausi i upu o le valoaga.

O lona lua o saunoaga a Keriso e faapea: “Faauta ou te vave alu atu” (7). O loo toe taua lenei lava saunoaga i le fuaiupu e 12 ma le 20. E ta‘u mai ai ia i tatou o loo manao ina ia faailoa mai le tāua o lenei tulaga.

E le faatuai mai Keriso. O loo ia faailoa mai lona toe afio mai e siitia lana ekalesia e pei ona taua e Paulo i le Ekalesia i Tesalonia 4:16-17. O le toe afio mai o Keriso e ono tupu i soo se taimi. E ono tupu i le isi 5 sekone o lumanai poo le 5 aso o i luma nei, poo le 5 foi tausaga o lumanai.

O le ola naunau i le faaali mai o Keriso ma lona toe afio mai e taua tele. E faatupuina ai le ola saili mo ia. E faatupuina ai le fia galue manu o ao, e faatupuina ai le fia ola mo Keriso i se olaga faapaiaina. E te le fia feiloai ma Keriso i lona toe afio mai ae o loo e soifua i se olaga e le fiafia i ai o Ia.

Ua e sauni ma lona toe afio mai? O le a sau tala e fai ia Keriso i le taimi e te lua feiloai ai ma ia?

Manatua e le faatuai mai Keriso. “Faauta ou te vave alu atu”. Tapena nei loa manu o maua le avanoa.

Faamanuia Keriso ia te oe i lenei vaiaso ma lau tapenaga faaleagaga.