O le Ekalesia i Sarataisa. Faaliga 3:1-6
Faafeiloai atu i le suafa o Keriso lo tatou Faaola. E talitonu le agaga o loo e maua le manuia ma le soifua laulelei i lenei ituaso ona o le alofa le faatuaoia o le Atua.
Sa ou mafaufau i le alofa o le Atua ma lana amiotonu atoa ai ma le Atua e le faapito i se tasi ae ua ia tuuina mai le avanoa mo tagata uma lava. O le natura o le tagata o le alofa faapito poo le faailoga tagata foi. Peitai e leai se uiga faapea o le Atua. Poo le a le loloto o le agasala tatou te oo i ai pe leai foi so tatou amanaiaina o le Atua pe talitonu foi e iai se Atua. E le mafai lea ona avea ma auala e sasa ai i tatou e le Atua pe aveesea lona alofa mai ia te oe ma au.
Tatou te iloa le faapito o le Atua ona e oso pea le la i aso taitasi e sulugia ai ma faamafanafana ai tagata ua faatuatua ia te ia, atoa ai foi ma tagata e fai mai e leai se Atua. E sulugia ai foi tagata e talitonu i le Atua ae le fia ola i le soifuaga ua ia finagalo i ai (Mataio 5:45).
Sa ou mafaufau, pe faapefea ae tei ua faasusulu e le Atua le la na o i latou o loo savavali e tusa ma lona finagalo? O le a le tulaga o le a oo i ai pe afai e na o i latou lava e talitonu i le Atua ma ola mo ia, e maua fua le okesene i aso taitasi………Ae a taumafa ma isi mea o loo tatou maua fua?
Masalo o le luitau, ia aua nei o tatou manatu mama ma faaaogaina le Atua. Ia o tatou ave le ava i e tatau i ai. Pau lava le mea o loo fia silasila mai i ai le Atua o le tuuina atu o lou soifua.
Faafetai e le o se Atua e sasi lava ma fasioti, peitai ua ia tuuina mai le avanoa mo tagata uma lava “…….ina ia le fano se tasi e faatuatua ia te ia ae maua le ola e faavavau” (Ioane 3:16).
O le vaiaso na tea nei na tatou sailiili ai ia Sarataisa le ekalesia ua taua ua oti. Ma sa tuuina atu ia e Keriso lapataiga i lenei ekalesia.
Ia mataala. Ia faia se suega oloa i totonu o le ekalesia pe mafua aisea ona le tupu faaleagaga ma ola (Efeso 5:13-16).
Faatumauina mea o totoe. Tagai i mea lelei o le faatuatua o loo taofi mau i ai. O talitonu pea i mataupu e pei o le ‘faaolaina i le faatuatua’ (Efeso 2:8), le mataupu i le molimau o Keriso i nuu uma (Mareko 15:16).
Toe manatu lea i mea ua maua ma mea na faalogo i ai. (3:3) I se isi faaupuga, toe tagai i le amataina o le galuega ma le faatuatua i le Atua e pei ona sau ai. E taua le vaega lenei atonu ou te lei faamamafaina tele i le vaiaso na tea nei. Atonu e tau see ese foi ma le mataupu ae e taua le tulaga o le a ou taua ona ou te maitauina o se tasi lea o vaega o loo iai le oti faaleagaga i totonu o nisi o ekalesia.
O le faatuina o se ekalesia e tatau ona fuafuaina lelei ma tapenaina lelei ma faia i se loto lelei. Manatua o le ekalesia a le Atua. O nisi o Ekalesia ua faatutuina ona ua misa ma fevaevaeai. Ou te talitonu o se uiga vaivai ma le le talafeagai lea e faatuina ai ekalesia. O nisi ekalesia ua faatutuina ona o le faatautava.
O nisi ona ua leai se salamo ae ua faafefeteina. O nisi ekalesia ua faatutuina ona o le fia iloa ma le matapeapea. E ao ona tatou faaeteete, o le ekalesia e paia a le Atua, e le pei o le faatuina o se pisinisi poo se kalapu.
A tatou toe manatu i le amataina o se ekalesia e lelei ona faavae, e tatau ona faia i ai se fuafuaga. O le faavae e le mausali e le umi ona tu le fale. Afai na amataina se ekalesia ona o nisi uiga e pei ona taua i luga e tatau ona oo le ekalesia aemaise o taitai i luma o le Atua i le loto maualalo, faatoese ma fai se leleiga ma tagata o loo aafia, aemaise o le ekalesia sa lolotu muamua ai.
O ina e maua ai le faamanuiaga. Soo se mea lava e lelei lona amataga e le taunuu lelei foi. Manatua o le tala a le Tusi Paia, e tetee atu le Atua i le tagata faamaualuga ae foai atu lona alofa tunoa i e loto maualalo (Iakopo 4:6).
O le vaega mulimuli e pei ona faatonuina ai Sarataisa o le salamo.
4. Salamo.
O le salamo o se vaega e tatau ona faatinoina i totonu o le soifuaga o le tagata Kerisiano atoa ai ma le ekalesia. O vaega e iloa ai le salamo o le olaga suia. O le ola tatalo, o le anapogi, o le saili i le Atua. O le salamo e le o se faaiuga e faia ina ua maua, ae o le filifiliga o aso uma ina ia ola salamo. Ua faatonuina i tatou e le Tusi Paia ina ia fua mai fua o le salamo. (Luka 3:7-14)
Ua fetalai atu Keriso ia Sarataisa, a outou le mataala ou te sau ia te outou e pei o le gaoi. Soo se ekalesia e olaola ai pea i le tulaga o loo iai, leai se faamaualalo, leai se salamo, leai se mataala, leai se suiga…….O le a oo mai le faamasinoga a le Atua iai.
I le fuaiupu e 4 o loo iai nisi tagata o loo i totonu o Sarataisa e le o oti aua ua latou ola mo Keriso. O e ua le faaeleelea o latou ofu pe ua le ola i le agasala, o i latou ia o loo savavali ma Keriso i ofu sisina. O lona uiga, e faamanuiaina i le ola e faavavau.
O loo faalauiloa mai e Keriso faamanuiaga o le tagata e ‘Manumalo’.
1. O le a faaofuina o ia i le ‘ofu sisina’. O le ofu sisina poo le ofu mama o le faatusa lea o le tagata o loo ola mama, loto maualalo, ma le taaina i le agasala. O e o loo fua mai ai fua o le Agaga, ae le o galuega a le tino (Kalatia 5). O le a laei o ia i lenei ofu i le lagi. O loo iai isi ofu o loo taua e pei ona talanoaina i le mataupu 20 i le talisuaga a le Tamai Mamoe.
2. Tusia le igoa i le Tusi o le Ola. O le faamanuiaga lona lua o le tagata manumalo, ua mautinoa le tusia o lona igoa i le tusi o le ola, ma e le mafai ona toe soloiesea (5). O le Atua e le o se tagata e pepelo ai. Afai ua ia saunoa mai e le toe soloiesea, o le tulaga lena o le a iai.
3. Tautau i luma o le Atua. O le faamanuiaga lona tolu, o le faalauiloa atu e Keriso le igoa o lea tagata i luma o lona tama i le lagi. O le a tulai Keriso ma le lagona fiafia ma le faageetia i luma o lona Tama ma tau atu lou suafa. E le gata o lona Tama ae o le anoano o agelu o le lagi. A o iai Keriso i le lalolagi, na ia fetalai foi i lea tulaga i le Mataio 10:32-33. “O lenei ai se tautau au i luma o tagata, o au foi ou te tautauina o ia i luma o lou Tama o i le lagi. Ai se faafiti ia te au i luma o tagata, ou te faafitia foi o ia i luma o lou Tama o i le lagi.
fO nei faamanuiaga e mo oe ma au. Manatua foi o le Atua e le faailoga tagata. E le faapito foi na o nisi ae ua tuuina mai le avanoa mo tagata uma lava ina ia maua le ola e faavavau.
O le autu atoa lena o le afio mai o Keriso, ina ia le fano se tasi e faatuatua ia te ia, ae maua le ola e faavavau.
“O le ua iai taliga ina faalogo maia i le mea o loo fetalai mai ai le Agaga i ekalesia (3:6).
Fesoasoani mai le Atua ia te oe ma au ina ia lelei le ta faalogo i lona finagalo
Ia manuia lenei vaiaso,
Lui Ponifasio
