I le suafa pele o Keriso le Nasareta e faafeiloai atu i le mamalu o Samoa i soo se tulimanu o lenei kelope o aumau ai. Faafeiloai atu i le agaga maualalo. E iai le talitonuga o loo manuia outou uma i le agalelei ma le faamaoni o lo tatou Tapaau o i le lagi. Faamalo atu le soifua laulelei.
O se vaiaso ese lenei i totonu o Niu Sila nei i le malulu, atoa ai ma le timu ma matagi. E ui lava i lea, ae le mafai ai lava ona aveesea le alofa o le Atua mo oe ma au.
E pei o upu a Paulo i le Eklaeisa i Roma e leai lava se mea tasi na te mafai ona faateaina ese i tatou mai le alofa o le Atua. Roma 8:38. “Aua ua ou mautinoa e le mafaia e le oti, po o le ola, poo agelu poo alii, poo e malolosi, poo mea i nei onapo, po o mea atali, po o mea maualuluga poo se tasi mea na faia, e le mafai e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii”.
E le o iina e sapi ai le tagata Kerisiano aua ua mautinoa ua matu mea uma i le Atua. Aua foi o ia o le Atua o ananafi, o nei ma taeao. E manuia le aso, e manuia foi a taeao aua o loo soifua le Atua ma o loo ua uumauina i tatou i ona aao.
O loo faasolo pea le tatou suesueina o le Tusi o Faaaliga. E faamalulu atu ona o le le maua o se sosooga i le vaiaso na tea nei, ona e lei maua foi le malosi o le tino. Ae soso maia ta o i le Afioga a le Atua.
Na pau mai le tatou talanoaga i le ekalesia o Semurana. O le ekalesia lona tolu o loo ai i le mataupu lona lua o le ekalesia lea i Perekamo.
O le Tusi i le ekalesia i Perekamo (2:12-17)
O Perakamo e tusa lona mamao ma le 89 Kilomita i matu i sisifo o Semurana. O se tasi o aai o Roma i luga o le mauga ma na faaigoaina lea nuu o Perekamo ona o le ituaiga o pepa sa gaosia i totonu o lea aai. O le aai foi lenei sa fiafia ia Kaisara Aukuso e nofo faavaitaimi ai mo malologa. Sa iai se falemai i totonu o lea aai ma e tusa o le 700 tausaga o autovaa iai tagata mo le togafitia o gasegase. Sa faapea foi ona iai aoga faafomai.
O lenei aai sa faapea foi ona lauiloa ona o le tele o tapuaiga faapaupau sa faia ai i le Atua o Akelepio. O ia o le atua o faamalologa faapea ai ia Zeus, o Athena ma Dyonesis. Sa tofu lava le atua ma le malumalu.
E amata le tusi a Keriso i lenei Ekalesia e ala i le faalauiloa atu iai o le pelu faaleagaga e maamaamai ona itu uma. Peitai o Perekamo ua le maai le pelu. Ua tele na o latou taliaina soo se ituaiga o aoaoga i totonu o le ekalesia.
Na amata lava i le faailoa atu foi e Keriso i le ekalesia lo latou pisi ma le galulue malosi i le galuega. E pei foi ona faalauiloa e Keriso ia Efeso ma Semurana sa faapea foi ona faailoa atu e le Keriso a latou galuega lelei. O se itu taua tele ma e tatau ona faafetaia.
O galuega lelei e pei ona aoaoina ai e Tito ina ia faia 2:13-14; 3:8,14
Sa faamalieina le finagalo o Keriso i le ola galulue o le ekalesia i Perekamo e ui na iai se faalavelave na tupu i totonu o le ekalesia na maliu ai ma fasiotia ai Anetipa (13) Peitai sa tumau pea le ekalesia.
Ae sa iai lona pona i Perekamo. O i e tusa ma le mau a Keriso sa mau ai Satani. (13). O le nofoaga o loo ia le nofoalii o le Tiapolo.
Ona o le tele o malumalu ma tapuaiga faatiapolo, masalo o se mea faigata tele i le eklaesia Keriso. O loo aoao le Tusi Paia o Satani o ia lea o le atua o lenei lalolagi. O ia o loo pule i malo uma o le lalolagi ma o lona malo o le malo lea o le pogisa o lea ia matua galue malosi i le faaseseina o tagata. Silasila i le Luka e 8:12; Mataio 4:8-9; 1 Peteru 5:8-9 atoa ai ma le Efeso 2:2.
Ia tatou mautinoa ma manino o Satani e le i Seoli. O loo iai o ia i le vanimonimo atoa ai ma le laueleele faatasi ai ma ana temoni.
O se tasi lenei o aoaoga taua tele i totonu o le Tusi Paia i le mataupu silisili. O le faamalamalamaina o le Tiapolo ma agaga leaga. O loo taumafai e faasese ma faaleaga i tagata e ala i le ulutinoina o tagata. Manatua foi le tala i temoni lea na tutulieseina e Keriso ma i le tagata i Katara i le Mareko 5. Na latou augani ia Iesu ina aua nei aueseina i latou ai lea nuu. O le mafuaaga ona ua uma ona vaevaeina e satani ina ia tofu le pitonuu ma temoni. Ona auina ai lea o i latou i le lafu puaa. O Temoni e le na o ni tala aitu.
E iai temoni ma le tiapolo. Silasila i le Efeso 2:16. O i latou nei o loo tatou tau ma faasagatau mai i aso uma.
Sa faapea foi ona faailoa atu e Keriso i le Ekalesia lona fiafia ona o lo latou tumau ma le le faagaeetia i le taofimauina lea o lona suafa (13)Peitai sa iai vaega sa faapea ona le tau ai le silasila o lo tatou Alii i le ekalesia.
Muamua ua iai tagata i totonu o le ekalesia o loo latou taofi i le aoaoga a Palaamo. “O ia le na aoao ia Palako e tuu atu le mea e tausuai ai i luma o le fanauga a Isaraelu ona ia aai i mea ua fasia mo tupua ma ia latou faitaaga”. (14)
E le gata o Palaamo ae o loo iai foi ma aoaoga a Nikalaitai.
O nei aoaoga o lo faaseseina tagata i tapuaiga faapaupau i le ifo lea i tupua faapea ai le olaga faatalitane ma le faitaaga. Silasila o nisi i le Numera 22-24; Galuega 15:28 faapea ma le 1 Korinito 10:27-29. I le tusi o Numera e 22-25 ma le 31, o loo iai le perofeta e igoa ia Palaamo sa avea ma fautua o le tupu o Moapi i auala e mafai ai ona faatoilaloina le fanauga a Isaraelu. Sa tele se tupe na totogi ai o ia. O lana fautuaga na ave i le tupu e faapea e tatau ona faatosina tagata Moapi ina ia faiaiga ma tagata Isaraelu aua o le mea lea e faasaina e le Atua. Na iloa e Palaamo o le a mafai ona tosina mai tamaloloa Isaraelu e ifo i tupua Moapi ona toatamai ai lea o le Atua ma ia fasiotia i latou.
O le aoaoga lava lea e tasi sa faapea ona tausisia e nisi i totonu o le ekalesia Kerisiano i Perekamo. O lo latou manatu e leai se afaina o le tapuai i le Atua o Isaraelu faapea foi atua ese.E leai foi se mea e leaga ai le faiaiga ma tagata nuu ese.
E oo lava i nei onapo o loo iai lava aoaoga faapena i totonu o le ekalesia aemaise i latou ua le manatu e tatau ona faaipoipo ma e leai foi se afaina o le tapuai i le Atua atoa ai ma isi tapuaiga eseese. O le tala a Paulo i le Ekalesia i Korinito “Aua le amo faalegatasi……………..” 2 Kor 6:14-15
E taua tele le tauusiusi i le Afioga a le Atua. O iina e mautinoa ai le le see ese atu o le ekalesia Kerisiano i aoaoga o manatu o tagata ma le poto faaneionapo, ae ia tumau pea i le Upu. O le tapasa ma le faafanua o le tagata Kerisiano.
Ua tatou iloa nei le poto tele o le tiapolo. Ua le mafai ona ui mai i fafo o le ekalesia e ala i sauaga ma isi tulaga faapena peitai ua sau lava i totonu o le ekalesia faasalalau ai ana aoaoga sese ma talia e tagata ua taua o tagata Kerisiano. Faamata e fia ni aoaoga a le tiapolo o loo talitonu iai a tatou ekalesia e le o i totonu o le Tusi Paia ae ua tatou talia lava ona o le mea na masani mai ai. Fai mai le fetalaiga a Keriso ia Perekamo “o mea ia oute le fiafia ai ia te oe” (14).
Ia fesoasoani mai le Atua iai tatou uma ina ia aloalo ese ma ia malamalama i aoaoga e le finagalo ai le Atua. Tatou tumau pea i le Tusi Paia o le upu a le Atua o le susu e le suia.
Ia manuia lenei vaiaso
Ona o Keriso
Lui Ponifasio
