Avea ia le Suafa mamalu o Keriso lo tatou Alii e faatalofa ma faafeiloai atu ai i le paia ma le mamalu o Samoa le atunuu pele. Malo le soifua lau lelei. Malo foi le tauatai i feau ma tiute totofi aua manuia o aiga aemaise o le Atua ma lana galuega i ekalesia eseese.
O lenei ua tatou oo mai i le mataupu e sefuluiva o le Tusi o Faaaliga. O le mataupu lenei ua loa ona moomoo mai i ai, ina taunuu maia i ai le tatou folauga ona o le mataupu e laualuga ai Keriso ma lona toe afio faalua mai.
Sa ou faaaogaina i tusitusiga ua mavae atu le faaupuga faapea ‘e pei le Tusi o Faaaliga o ata tifaga’. E iai le sifi ma le tama e autu i ai le ata e pei o ata karate ma ata kaupoe.
E amata le mataupu e sefuluiva i le faaupuga e faapea, ‘Ua mavae nei mea’, o lona uiga ua uma atu le isi vaega o le faasologa mai o mea tutupu ae lumanai le afio mai o le Alii o Iesu Keriso. Ua mavae atu le vevesi na tatou vaaia i mataupu ua tuanai ma le faaleagaina o le lalolagi uma i puapuaga ma mala o le toasa o le Atua.
I le mataupu e sefulu iva, e matua ese lava le vaaiga. E mafai ona faaigoaina lenei mataupu o le mataupu o ‘Viiga’. E faaigoaina e nisi o le mataupu o le ‘Aleluia’. O le upu Eperu, o lona uiga o le vivii atu ia Ieova. O se upu o loo taua tele i le Tusi o Salamo e faailoa atu ai le agaga vivii o le faisalamo i le Atua. E sefulu lima salamo e amataina i le upu ‘Aleluia’.
O lea foi le upu o loo lautomua i le fuaiupu muamua o lenei mataupu.
O le mau a Ioane e faapea ua ia faalogo i le leo o le motu o tagata e toatele o i le lagi o loo faapea ‘Aleluia ua i le Alii lo tatou Atua le Faaolataga ma le viiga ma le faaneeneega ma le mana, aua e faamaoni e tonu foi ana faamasinoga aua ua faasalaina e ia le fafine talitane e sili, o le na faaleagaina le lalolagi i lana faitaaga. Ua ia taui atu ia te ia lava le toto o ana auauna. Ua latou fai atu ‘Aleluia! Ua alu ae le asu e faavavau faavavau lava’.
Masalo e pei o le mau a Ioane o le motu o tagata, o agelu ia o le lagi o loo vivii i le Alii.
O le Aleluia lona tolu na alagaina lea e toeaiina e lua sefulu ma le fa ma meaola e fa o loo ifo i le Atua o le e tietie i le nofoalii.
Na suia le faalogo a Ioane ina ua lagaina le Aleluia lona fa. Na faamatalaina e Ioane e faapea e pei o le taalili o vai e tele, e pei foi o le taalili o faititili e tele. Ou te talitonu e leai se tasi o soifua mai ua faalogo i nei leo. Pau le mea e mautinoa o le matua leo tele lava aemaise o le faamatalaga faapea e pei o ‘le taalili o faititili e tele’.
O nei leo, o viiga ia i le Atua e tali atu ai i le leo na tuuina mai i le nofoalii o loo faapea mai “Ia vivii atu i lo tatou Atua, o outou o ana auauna uma, ma outou o e matatau ia te ia, o tagata nuu atoa uma ma alii”.
Tatou te maua mai i nei fuaiupu le finagalo o le Atua pe a oo i le taimi tatou te avatu ai lona viiga. O le ata foi lea tatou te vaaia i le tele o salamo. O viiga o le Atua e ‘leo tele’. O le finagalo o le Atua ia leo tele ona viiga. E le afaina i le Atua le leo tele o viiga, le leo tele o a tatou pese ma le leo tele o mea fai faaili tatou te faaaogaina.
O nisi a leo tele pesega ae faitio fai mai ‘E le logonoa le Atua’. Ioe e sao, peitai o le finagalo o le Atua ia avea ona viiga e faailoa atu ai i atua uma o le lalolagi aemaise o le tiapolo ma ana temoni, ua na o le Atua lava e toatasi e ao ona viia’.
O le mea malie i lenei mataupu, poo le a lou le fiafia i viiga leo tetele, ae a oo i lea aso e le gata o le a e faalogoina, ae o lou siufofoga foi o le a faalogoina i ona viiga.
O le leo o lou fofoga o le a faaopoopo i nei viiga. Manatua o lea e faamatala e Ioane o mea o le a tutupu i le lumanai. O viiga nei o loo faia ae lumanai ai le Tausamaaga o le Tamai Mamoe.
O oe ma au o tagata faatuatua i le Alii o Iesu Keriso poo i latou ua taua o lana ‘ekalesia’ o loo iai i totonu o lenei viiga. O le ekalesia o loo faamatalaina e Ioane ‘o le faletua’ o le tamai mamoe, ma o loo sauni atu e feiloai ma lona Alii poo le faatoafaiava o Iesu Keriso (9).
O se tasi nei o vaega taua i le Tusi o Faaaliga, o le taimi o le ‘Tausamaaga o le Tamai Mamoe’.
O le taimi tonu lava e tupu ai lenei aiga tele o le taimi ua uma ona faaleagaina Papelonia. O le tele lava o fiafiaga ma talisuaga ia poo se pati foi e fai ina ua maea mea faigata. O le maea o se taaloga, poo suega, poo se galuega mamafa, e faaiu lava i se fiafiaga ma se tausamiga.
O le Tausamaaga o le Tamai Mamoe o loo faapea ona faia ae o loo alu a‘e pea le asuasu o le mu o Papelonia i le lalolagi.
I se isi faaupuga, o lenei Tausamaaga e faia i le va o le faaleagaina o Papelonia ma le afio faalua mai o Keriso i le lalolagi.
I le Mataio e 9:14-15 o loo faamatalaina ai e Keriso le tala i le faatoafaiava.
O le aposetolo o loo ia faamatalaina le ekalesia o le manamea a Keriso, ia poo le faatoanofotane (2 Korinito 11:2).
Ou te le iloa pe faapei ona faatautaia lenei sauniga o le faaipoipoga i le lagi ma le tausamaaga. Ailoga e faia faasamoa le faaipoipoga. Masalo o le a faatautaia faaeperu. Ae manatua foi o le lagi lea e tupu ai lenei faamoemoe.
E tusa ma le tulaga e masani ai, o le tausamaaga o se faaipoipoga e faatoa tupu ina ua maea le faaipoipoga.
O loo faapea le tala a le agelu ia Ioane ina ia tusi i lalo, “Amuia e ua talaiina i le tausamaaga o le Tamai Mamoe”. O le fesili tele lea o loo le mautinoa ai lava e popoto i le Tusi o Faaaliga poo ai i latou nei. Manatua o oe ma au o le ekalesia lea poo le faatoafaiava lea.
E manatu nisi o i latou nei ua valaaulia i le tausamaaga, o i latou nei o le au faatuatua i le Atua i le Feagaiga Tuai, aua e lei ‘Papatisoina i latou i le tino e tasi’ (1 Korinito 12:12-13, Kalatia 3:27-28), muamua ae lei oo mai le Aso Penetekoso.
Taatia ia faapena lea tulaga aua e tele lava mea e le manino i le taimi nei sei vagana ua tatou oo i le lagi. Pau le mea taua ia mautinoa lou auai i lenei sauniga taua i le lagi e ala lea i lou taliaina o le Alii o Iesu Keriso i lou olaga, ona avea lea o oe ma ana manamea.
A oo i le taimi e toe afio mai ai le faatoafaiava ae ua tatou sauni e pei o le tala i taupou e toasefulu.
Ia manuia lenei vaiaso i le alofa o le Atua.
