Ou te faafeiloai atu i le agaga faaaloalo i le mamalu o le au faitau o mafai pea ona malaga faatasi ma au i lenei tusitusiga ua faaigoaina o le Malamalama i le Tusi Paia.
E leai lava se isi auga ma se faamoemoe i lenei tusitusiga i vaiaso taitasi, o le aumaia lea o se fesoasoani ina ia mafai ona tau faapupulaina ai nisi o vaega o le Tusi Paia ina ia mafai ona maua se malamalamaaga. Mai lea silafia o le a mafai ai ona unaina i tatou e faalatalata atu ma alolofa i le Atua ma faaaogaina o tatou ola e auauna ai ia te ia i soo se tiute ua ia totofi ai i tatou.
O lea o loo tatou iai nei i le mataupu e sefulu iva. E pei ona maea le tatou suesuega i le vaiaso talu ai o loo tatou talanoaina le Tausamaaga a le Tamai Mamoe. O lenei faamoemoe o loo faapea foi ona taua o le ‘faaipoipoga a le Faatoafaiava ma le faatoanofotane’. O Keriso le faatoafaiava ma lana ekalesia lea ua faaigoaina o lana manamea e pei ona tatou talanoaina i le vaiaso ua tea.
O le ekalesia o loo taua e te le maua i ai se Katoliko, poo se EFKS poo se Assembly of God, PIC, Papatiso, Metotisi poo a lava ituaiga o ekalesia e pei ona tatou malamalama i ai.
O le ekalesia e le o le lotu ae o tagata. O tagata ua vavae eseina mai le lalolagi agasala e ala i lo latou salamo ma faatuatua ma mulimuli ia Keriso ma ana aoaoga e ala i le afioga a le Atua. O tagata ua talia Keriso i latou olaga ma ofoina atu i latou e ola mo le Alii i aso uma. E aafia ai soo se ituaiga o tagata ua faia lena tulaga.
O le lotu ua na o se nofoaga e fafagaina ai le ola faaleagaga ma galulue ai e atinae le malo o le Atua. E le fesiligia la le igoa o le lotu i le lagi ae o le olaga na ola ai. O le mafuaaga lena e tatau ai ona tatou faatauaina le malo o le Atua ina ia tele ma malosi ae le o le tausisi ma mapo lotu i le igoa o le ekalesia ae o loo leiloloa pea tagata i le lalolagi o le agasala.
Toe foi le faamatalaga i le Tausamaaga. Afai la o oe le tagata ua avea ma Kerisiano, ua ofoina atu lou loto mo Iesu Keriso (e pei ona ofoina atu o lou ola i le taimi o le tautoga i le faaipoipoga). O oe lea o le tagata o ekalesia a le Atua. O oe lea o le a avea ma ana manamea, o oe lea o le a faaipoipoina atu ia Keriso.
O loo iai la ma tagata ua valaauina e pei ona taua (9). E pei ona manatu le toatele o faiaoga o le Tusi Paia o i latou mai le Feagaiga Tuai aua e lei avea i latou nei ma ekalesia talu le taimi o le Penetekoso.
I se vaaiga e ono vaaia i lea aso o le a iai, Atamu ma Eva, Noa, Aperaamo ma Sarai, o Isaako, Iakopo, Repeka, Iosefa, Esekielu, Tanielu, Tavita (talosia e alu atu ma avatu lana naperi), o Iopu, Neemia, Esera, Mose, Iosua……………………
E fai lava si toatele o e ua valaauina i le Tausamaaga a le Tamai Mamoe.
E faaiuina upu a le agelu ia Ioane ina ua fai atu i ai “O Afioga moni ia a le Atua”. I se isi faauupuga o le mea moni lea ou te tauina atu ia te oe o le a tupu.
Ona faapau lea o Ioane ma ifo atu i vae o le agelu. Ua matua tele mea ua vaaia e Ioane ma faalogo i ai. Masalo ua le mafai e lona mafaufau ona tau faavasega le tetele o nei mea ua ia vaaia.
O nei lagona uma na oo ia te ia na sese ai lana mea ua fai. Ua ifo atu i le agelu ae faasao mai e le agelu lona sese. “Ia oe aua lava o au o lou uso a auauna o so lou au uso foi ua i ai le mau ia Iesu …(10).
Manaia le agaga maualalo o lenei agelu.
I le fuaiupu e 11 ua iloa atu nei e Ioane se vaaiga uigaese ina ua avanoa le lagi. Ua saunia le Alii o le Manumalo e afio mai. O le afio faalua mai lea o Keriso i le lalolagi.
O le taimi tonu lava e toe afio mai ai Keriso e pei ona aoaoina i le Faaaliga o le maea o Puapuaga Tele.
E afio mai ina ua maea ona faaumatia le Papelonia a le Anetikeriso.
O le taimi lea ua amata faapotopoto au a le Anetikeriso i sasae mo le taua e pei ona tatou talanoaina i le mataupu e 16. O le nofoaga ua taua o Amaketo o le a faapotopoto uma i ai o le autau a malo i lalo lava o le pulega a le Anetikeriso. O i latou nei e le taumatea le ulufia e le tiapolo. O loo iai le agaga faatautee atu i le Alii aua ua faaleagaina uma a latou mea totino ma aiga o fanau o aai ma fanua i le mala na sei liligi ifo mai le lagi e le Silisili Ese.
E pei ona taua i le mataupu e sefuluono, o i latou nei o malo ma tupu mai Sasae. O nuu nei e aafia ai malo mai le atu Asia, o Saina o le atu Initia ma isi atunuu mai Sasae.
O se fetauiga uigaese o le a oo i ai. Pe faapefea ona tau o le tagata ma le Atua? Pe faapefea ona faasagatau o le tagata na faia i le na faia o ia?
I le valoaga a le faisalamo o le a iloa atu ai le mamalu o le Atua i ao (Salamo 24).
Ina faaea ia i luga o outou ulu ……sei afio mai le Tupu Mamalu……O ai le Tupu Mamalu……
Ua vaaia e Ioane le pupula o le Alii o Iesu Keriso. E pei o le mumu o le afi ona fofoga. Ua i lona ao foi o palealii e tele, ua ia te ia o suafa ua tusia e le iloa e se tasi ua na o ia lava. Ua ofu foi o ia i le ofu ua fufui i le toto. Ua faasuafaina o ia “O le Upu o le Ola”.
O lenei vaaiga o Keriso o loo faapea foi ona vaaia e ona fili i le lalolagi aua ua avanoa le lagi ma afio e faaumatia i latou (17:14).
O le afio muamua mai o Keriso o le pepe. O le agamalu ma le loto maualalo. Na agai atu i Ierusalema i le asini. Na ia soifua i le pei o tagata uma aemaise lona mafuta atu i tagata uma. Na fasia o ia ma maliu i le Satauro e aunoa ma se tali atu poo se tetee atu.
O le afio mai lea o Keriso o le Tamai Mamoe e pei ona molimau Ioane le Papatiso na te aveesea le agasala a le lalolagi. Na afio mai o ia o le Faaola.
Peitai o lona afio faalua mai e matua eseese lava ma le taimi muamua. Ua vaaia nei e Ioane ma le lalolagi le afio mai o Keriso i lona mamalu. O le mamalu lea o le Alii e pei ona ia valoia i le Mataio e 24:29-30. “Ua mavae atu le puapuaga o ia ona aso, ona faapogisaina loa lea o le la e le susulu mai foi le masina e pauu foi fetu mai le lagi. E luluina foi au o le lagi. Ona iloa ai lea i le lagi le faailoga o le Atalii o le Tagata. Ua sau i ao o le lagi ma le mana ma le mamalu tele.
O se vaaiga ese o le a oo iai le lalolagi. O le pogisa o le lalolagi ae o le a vaaia le pupula ma le mamalu mai le lagi. E leai se tagata ola o le a le iloaina lenei taimi.
O se taimi e matua le fiafia i ai le tiapolo aua ua ia iloa nei lona iuga ua lata. O se taimi foi e le fia oo i ai i latou o loo faatautee atu i le Atua ma i latou o loo ola i le agasala.
Peitai o le tami lea ua loa ona faananau uma i ai le fanau a le Atua. O i latou e alolofa ia te ia. O i latou sa ola mo ia.
O fea vaega nei e tolu e te iai i lea taimi?
Ia manuia le vaiaso.
