E muamua ona sii pea le viiga i le Atua lo tatou Tama i le lagi ona o lana pule faasoa i lo outou soifua ma se matou ola ua toe mafai ai ona tatou toe feiloai i luga o laupepa i lona agalelei.
Malo le soifua malo foi le fai o le faiva e pei ona feagai ai ma tiute tauave o aso taitasi.
Na gata mai i le vaiaso na tea nei le tatou talanoaga i le taimi na vaaia ai e Ioane le lagi i le fuaiupu e sefulutasi. Ua iloa atu e ia le solofanua sinasina, ma le o tietie ai ua igoa o ia o le Faamaoni ma le Moni, o le amiotonu foi na te faamasino ai ma tau ai le taua.
O Keriso lava lenei ua afio mai i lona mamalu ma ua sauni e tau le taua o Amaketo e pei ona tatou vaaia i le mataupu e sefulufitu, o le taua a le Tamai Mamoe. Peitai e le toe afio mai o ia o le Tamai Mamoe e aveese agasala a le lalolagi e pei ona molimau ai Ioane le Papatiso, ae o le a afio mai o ia o le Leona o le Ituaiga o Iuta.
O le a sau o ia i lona malosi tele ma lona matautia e tau ma i latou e faasagatau ia te ia aemaise o au a le Anetikeriso e pei ona tatou aoaoina i le vaiaso talu ai.
I lenei lava fuaiupu tatou te aoaoina ai se mea e uiga i le Alii o Iesu Keriso.
Muamua o ia e Faamaoni. E leai se mea faaletonu e te maua ia Keriso Iesu. E faamaoni o ia i le faia o le finagalo o lona Tama. “Na faamaoni o ia i le na tofia o ia……” Eperu 3:2.
O ia foi o le ositaulaga sili e Faamaoni. Eperu 2:17 “O le mea lea ua tatau ai ina ia avea o ia ia pei o ona uso i mea uma lava, ina ia faia o ia ma ositaulaga sili e alofa ma faamaoni i mea a le Atua ina ia faia e ia se togiola mo agasala a le nuu.
Lona Lua, o Ia e Moni. O ia na afio mai ma ia fetalai, O au nei o le Ala, Upu Moni ma le Ola….. Ioane 14:6.
A o maitauina e Ioane lenei vaaiga o le afio mai o Keriso, na faapea foi ona toe iloa e Ioane le foliga o le Alii o Iesu Keriso. E pei o le mumu o le afi ona fofoga, ua i lona ao foi palealii e tele. Ua ofu foi o Ia i le ofu ua fufui i le toto ua faasuafaina o ia o le “Upu a le Atua”.
O le Upu lea na liutino tagata poo le Lokou. E pei ona molimau Ioane i lana ‘Tala Lelei 1:1, Sa i le amataga le Upu. Sa i le Atua foi le Upu, o le Atua foi le Upu. O ia foi o le Atua sa i le amataga. Na ia faia mea uma lava. E leai foi se mea e tasi na faia e lei faia e ia.
I le fuaiupu e sefulufa ua vaaia e Ioane o au o le lagi ua mulimuli atu ia te ia. O le a afio mai Keriso e tau le taua ma ona fili. O le a afio mai o ia ma au o le lagi. O ana agelu faapea ma le au Kerisiano. Ae foliga mai o lenei taua e faigofie lava, e tusa pe na o Keriso e tauina le taua e aunoa ma au o le lagi, e manumalo lava o ia aua o ia o le manumalo.
O le pelu e alu ae mai lona fofoga ma taia ai le nuu. Manatua foi o le Suafa o Keriso o ia o le ‘Upu a le Atua’. E le tau faamatalaina le mea o le a tupu. Fai mai le Eperu 4:12 e faapea ‘O loo ola le afioga (upu) a le Atua, o loo matua galue foi o loo sili foi lona maai i pelu uma e faatau maai itu…….”
O le Upu o le auupega lea o le taua. O le fetalaiga poo le saunoaga a Keriso e faatoilaloina ai ona fili. O ia foi lenei e pei o le mau a Ioane e faapea, “e leai se mea na faia e lei faia e ia”. O le Iesu Keriso o ia o le Alii. O ia o le Atua. Na ia faia mea uma lava e ala i lona saunoa atu poo le fetalai. Na ia fetalai ‘Ia malamalama, ona malamalama ai lea…”.
E iai le mana i le Upu e saunoa ai le Alii o Iesu Keriso. O le a faapea foi ona faatoilaloina ai ona fili.
Na valoia e le Isaia 66:16 e faapea “Aua e faasala le Alii i tagata uma i le afi atoa ma lana pelu e tele foi le fasi a le Alii”.
O le a mamafa le toasa o le Atua e pei o le mau a Ioane aua o le Atua e ona le malosi uma lava.
Poo a le lē talitonu o tagata ia keriso ma le lē faatuatua ia te ia o le Tupu o le lagi ma le lalolagi, a o lea aso o le a faapea ona vaaia uma e mata lona suafa o le a tusia i lona ofu ma lona vae o ia o le “Tupu o tupu ma Alii o alii” (16).
I le fuaiupu e sefulufitu o loo lauina ai le iuga o le taua. Ua iloa atu e Ioane le agelu ua tu i le la ua alaga ma le leotele. Ua ia faatonuina ia manu o le lagi ua saunia le latou taumafataga. O loo valaauina ina ia o mai e faapotopto i le faigaai a le Atua Silisili.
O le a lenei faigaai? O se faamanuiaga i manu aua “o le a latou aai i tino o tupu, ma tino o taitai o au taitoaafe ma tino o tagata malolosi ma tino o solofanua ma e tietie ai ma tino o tagata uma…….”
E tau mai i lenei faaafe le faiaina poo o le taua na tauina e au a le Anetikeriso ma Satani.
E ui ina vaaia le matagā o le toilalo o le autau ae fai mai Ioane na vaaia le manufeai ma tupu o le lalolagi ua agai mai e tau ma lē tietie i le solofanua.
E lei maimaua le taimi o le Alii o Iesu Keriso e tau ai ma le manufeai atoa ai ma le perofeta pepelo. Na puea i laua ma lafo sao i le lepa afi ua mu i le teio.
Na valoia e Tanielu lenei mea atoa ai ma Isaia. O le mau a Isaia e le tanuina le tino o le Anetikeriso (Isaia 14:20). O loo faataunuuina e le Tusi o Faaaliga lea valoaga.
O le tuuina atu sao o le manufeai i le lepa afi o lona lea iuga. Peitai o au na totoe poo fitafita a le manufeai o le a faapea ona fasiotia i latou i le pelu e alu atu i le fofoga o lē ua tietie i le solofanua.
E faapea le faaumaina o Upu a Ioane “Ona maoona ai lea o manufelelei uma i o latou tino”.
O le a leai se faaletonu o le tamaoaiga mo manufelelei i lea vaitaimi aua e faitau afe ma afe fitafita ma i latou e tetee atu i le Alii o le a fasiotia uma i lea aso.
E moni lava o Iesu Keriso o ia o le Alii o le Manumalo!! Aleluia!
Ia manuia lenei vaiaso. Soifua
