E toe faafeiloai atu i le agaga faaaloalo i le paia ma le mamalu o si o tatou atunuu. Malo le soifua maua. Malo le onosai, malo foi tauatai i feau ma tiute totofi aua le tautuaina o aiga, aemaise o ekalesia.
E viia lava le agalelei o le Atua. E ui foi ua lagona le maatiati o le malulu i lenei vaitau, ae faafetaia e leai ni mala o aafia ai i tatou.
O le vaiaso na tea nei na amataina ai le tatou suesuega i le toe tusi o le Tusi Paia le tusi o Faaaliga. O lenei tusi o se tusi ua taua o se tusi o valoaga poo le faailoaina mai lea o mea o le a oo i ai le lalolagi.
Peitai e talitonu foi le toatele, o mea o loo taua i totonu o lenei tusi ua maea ona tutupu ae ua tusia lenei tusi ina ia avea o se aoaoga ma lesona ia i tatou uma. O lou lagona e taua lo tatou ola sauni, ma tapena aua tatou te le iloa le taimi e afio mai ai Iesu Keriso. E mafai ona faatalanoaina le ituaiga o tusi e pei ona tatou talanoaina i le vaiaso ua tuanai, e i latou e popoto i le Tusi Paia ae o le olaga ua le talafeagai.
O le a tatou taumafai i lenei vaiaso e oto mai na o vaega taua o mataupu o loo aoaoina i totonu o lenei tusi e maua ai se aotelega ina ia faigofie ona tatou malamalama.
O le Tusi o Faaaliga e mafai ona vaevaeina i ni vaega autu se fa.
1. O le amataga poo Upu Tomua. 2. O le faamatalaina o mea ua tuanai. 3. O le faalauiloaina mai o mea o tutupu i le ekalesia Kerisiano. 4. O mea o le a tutupu poo mea ua valoiaina.
Sei o tatou vaaivaai muamua i upu tomua (1:1-8). Tatou te iloa i lenei tusi o le Faaaliga, e le o Ioane e ona le faaaliga e pei ona sese ai le toatele. O le faaaliga o Keriso e ona. O le faaaliga na tuuina e le Atua ia Keriso ina ia silafia ai mea o le a tutupu mulimuli ane. O le faaaliga lenei na tuuina atu i le agelu, lea na ia momoli mai ia Ioane a o iai o ia i le motu o Patamo.
Tatou te iloa i lenei upu tomua le taua o le ola auauna. O Keriso na ia afio mai e auauna atu ae le ina ia auauna mai tagata ia te ia. O le agelu o ia o le auauna ma le ave feau. Na auina mai le agelu e tau ia Maria le afio mai o Keriso (Luka 1:21). O agelu sa o latou iai i le taimi na soifua mai ai Keriso i Peteleema (Luka 2:8). O agelu foi na leoleoina le tama meamea mai le pule saua a Herota (Mataio 2:13).
A o iai Keriso i le vao, sa anapogi o ia mo le 40 aso; sa o mai agelu ma auauna ia te ia (Mataio 4:11). O le agelu foi na fesoasoani ia Keriso i ona toe taimi a o iai o ia i ona puapuaga (Luka 22:43). Na iai foi agelu i le taimi na toetu ai Keriso (Galuega 1:10). A oo foi i le taimi e toe afio ai Keriso i lona mamalu, o le a iai faatasi foi ma ana au agelu e manomano lava (Mataio 16:27).
Ua ala ona ou taua le galuega a agelu ona o le a e silasila ai i lenei tusi o Faaaliga, o loo talanoa lava i le tele o agelu. Ou te manao e faamamafaina se tasi o latou tiute o le auauna, leoleo, o avefeau lea mo le Atua. E oo foi ia Ioane, o ia o le auauna a le Atua o loo ia tusia ma talaiina le afioga a le Atua. O ia o le molimau faamaoni i mea na vaaia i le faaaliga.
O le molimau lenei na ia faalogo e faapea, o soo se tasi lava e faalogo ma talia upu o lenei valoaga o le a faapea ona manuia.
I. O mea ua tuanai (1:9-20)
O le vaega lona lua o lenei tusi o le faamatalaina lea o mea ua tuanai. O mea na vaaia e Ioane a o iai o ia i Patamo, o se motu pe tusa ma le 60 maila le mamao ese i gatai o Efeso i le sami Akeana. O se motu e tele i le lava o mauga mu ma e tau leai foi ni mea e ola ai. O ina sa ave ai e fitafita Roma ia pagota e faafaigaluega ai i le eliina o le maa e faaaogaina e fau ai auala ma fale. O le mafuaaga o le faasalaga o Ioane ona o lona soifua molimau mo Keriso ma talaiina o le tala lelei. O ina na maua ai e Ioane le faaaliga na tuuina atu ai ia te ia ma tusitusia ai. O le aso o loo taua e Ioane na tupu ai le faaaliga lenei o le Aso ua taua o le Aso o le Alii. O loo faasino i le Aso Sa poo le aso muamua o le vaiaso sa, e pei ona maua i faamaumauga o le ekalesia Kerisiano i ona popo fou o le tala lelei. O le Aso Sa o le Toe Tu o Keriso.
Na segia o ia pe ave o ia e le Agaga o le Atua. Na faalogo o ia i le leo o le pu ma se alaga leo tele. O se vaaiga masani lea poo se mea lea e masani ona tupu i taimi e momoli aloaia mai ai se feau tau tupu. O se tagata e alaga atoa ai ma le pu o se faailo ina ia utagia ma faaaloalo uma tagata ma nofo uta i le aveai ma le malelega a le Tupu.
O le uluai malelega lava na faalogo i ai Ioane, o le faailoa mai lea o le Atua. O ia o le Alefa ma le Omeka. O le Muamua ma le Mulimuli.
Ona aumai lea o le faatonuga o le mea e tatau ona fai ma utagia. O Ioane lea ua avea nei ma avefeau a le Tupu i Ekalesia e fitu e pei ona faatonuina mai nei.
O le vaega lona tolu o le faailoa mai o mea o loo tutupu i le taimi nei, poo le taimi na tusia ai le tusi ma maua ai le Faaaliga. O mea o loo tutupu i ekalesia i le taimi a o iai Ioane i Patamo.
O Ekalesia la nei o loo finagalo le Alefa ma Omeka ina ia tau atu i ai se feau tusitusia.
O Ekalesia e aofia ai:
O le tusi i Efeso (2:1-7) O le tusi i Semurama (2:8-11) O le tusi i Perekamo (2:12-17) O le tusi i Tuatira (2:18-29) O le tusi i Sarataisa (3:1-6) O le tusi i Filatelefaia (3:7-13) O le tusi i Laotikaia (3:14-22)
O le vaiaso a sau o le a tatou matamata ai i feau mo nei ekalesia ma lo latou aoaoga mo tatou i nei ona po.
O le vaega mulimuli o le tusi o le faailoa mai lea o mea o le a tutupu, poo mea o loo valoia (4:1-22:5). O se faamatalaina nei o mea o le a tutupu o le mafai foi ona tatou silasila i ai i se taimi o i luma.
A. O taimi o Puapuaga (4:1-19:21)
1. O le nofoalii i le lagi (4:1-11) 2. O Tusi e fitu ua faamauina. O le Leona o ia foi lea o le Tamai Mamoe (5:1-14) 3. O le tatalaina o faamaufaailoga (6:1-17) 4. Faaolaina oe ua auauna i le Atua mai puapuaga (7:1-17) 5. O Pu e fa o le faamasinoga (8:1-13) 6. O Pu lona lima ma le ono ma ‘Aue’ e lua (9:1-20) 7. O le Agelu ma tusi taai itiiti (10:1-11) 8. O le malumalu, o molimau e toalua, ma le pu lona fitu (11:1-19) 9. O le Fafine na ofu i le la (12:1-17) 10. O le manu feai ma le perofeta pepelo (13:1-8) 11. O le Pau a Papelonia ma e au i le Tamai Mamoe (14:1-20) 12. Mea e tutupu ae lei oo mai puapuaga e fitu e faauma ai (15:1-8) 13. O ipu o le toasa (16:1-21) 14. O le faamasinoina o tapuaiga faapapelonia (17:1-18) 15. O le pau o Papelonia (18:1-24) 16. O le afio faalua mai o Keriso (19:1-21)
B. O le nofo Tupu o Keriso ma le nofoa faamasino sinasina (20:1-5) O e le talitonu i le Atua.
1. O le saisaia o Satani (20:1-3) 2. Le toe tutu o le au paia (20:4-6) 3. O le faasese i nuu e fa o le lalolagi (20:7-9) 4. O le lafoaina o Satani i le lepa afi (20:10) 5. Faamasinoina o tagata le faatuatua (20:11-15)
C. O le lagi ma le lalolagi fou (21:1-22:5)
1. O le aai paia o le Ierusalema fou (21:1-8) 2. O foliga vavaai o le Ierusalema fou (21:9-27) 3. O le matagofie o le Ierusalema fou (22:1-5)
D. O Upu Faaiu (22:6-21)
Ia faamanuia le Atua i lenei vaiaso. A mafai ona faitau lau Tusi o Faaaliga i lenei vaiaso o le a fesoasoani tele lea i le Malamalama i ai a o tatou suesueina lenei tusi.
Soifua ona o Keriso
Lui Ponifasio
