Malamalama i le Tusi o Faaaliga (38)

E muamua ona faafeiloai atu i le Suafa manumalo o Keriso le Faaola.

Malo le soifua maua ma le lagi e mama. E talitonu sa maua se Aso Sa faapitoa o Tina. E faamalulu atu ona o le le maua o se faaopoopoga o le Malamalama i le Tusi Paia i le vaiaso na tea nei ona sa tuuina le avanoa mo faamanuiaga o le Aso Sa o Tina.

Alo maia tatou savalivali atu i le Faaaliga, lea ua tatou oo nei i le mataupu e 20.

O loo tatou iloa i lenei mataupu le taualugaina o le taua ia Amaketo lea ua matua faiaina ai lava Satani ma ana au. Ona toe afio mai lea o Keriso ma tu laueleele o ia i le Mauga o Olive, ma agai atu ai o ia i Ierusalema e agai atu i le faitotoa i le itu i Sasae, lea o le a nofo tupu ai o ia i le laueleele mo le afe tausaga. O se perofetaga lea o loo faailoa mai e Sakaria 14:3-4.

O le mataupu e luasefulu o loo amata ai le faasalaina o Satani i le afe tausaga poo le meleniuma lea e fusifusi ai ia ma lafo i le to e le gata. O le a faapea foi ona pupuni ma tuuina atu le faamaufaailoga i ona luga ina ia le toe faasese e Satani o nuu uma seia atoa le afe tausaga. Na iloa e Ioane le agelu ua alu ifo i le lagi ua ia te ia ki o le to e le gata o i lona lima foi le maea uamea tele.

A o lei tupu lenei tulaga e muai saisaia Satani ma lafoina i le to e le gata. I le Faaaliga e 12 na lafoina pe tuliesea Satani mai le lagi faatasi ai ma ana au. E iai le talitonuga o le agelu lava e tasi na ia tuliesea Satani o le a faapea foi ona ia toe saisaia Satani ma tuuina i le to e le gata. O ia lea o Mikaele.

I le fuaiupu e fa o loo vaaia ai nei e Ioane le nofoalii ma i latou ua tietie ai. O i latou nei o le ekalesia lea ua tuuina atu i ai le faamasinoga ia i latou. E toalua ituaiga o tagata o le ekalesia poo le au paia o loo vaaia nei o loo nofoia le nofoalii.

Muamua

O loo manino lava le aoaoga a le Tusi Paia e iai le taimi e nofoia ai e le ekalesia poo le au paia le nofoalii ma faamasino le lalolagi.

O le mea lea na taumafai Paulo ina ia malamalama i ai le ekalesia i Korinito ia latou iloa le taua o lo latou galuega o le a faia ina ia nofo uta ai ma malamalama i ai a o lei oo mai lea taimi. Aua o le taimi lea o loo iai faaletonu i le ekalesia i Korinito peitai ua le mafai e taitai o le ekalesia ona faia se faaiuga poo se faamaninoga tonu.

“Tou te le iloa ea e faamasinoina le lalolagi e le au paia. Afai foi e faamasinoina le lalolagi e outou, e tusa ea ona fai o faamasinoga i mea aupito iti”. 1 Korinito 6:2.

“Ona fetalai atu ai lea o Iesu ia te i latou, ‘E moni, e moni ou te fai atu ia te outou, o outou ua mulimuli mai ia te au pe a tietie le atalii o le tagata, i lona nofoalii mamalu, i le toe fuataiga, tou te tietie foi i nofoalii e sefulu ma le lua, e faamasino atu i ituaiga o Isaraelu, e sefulu ma le lua”. Mataio 19:28

O le tasi vaega o loo vaaia e Ioane o agaga ia o i latou na vavaeeseina o latou ulu ona o le mau ia Iesu ma le afioga a le Atua. O i latou foi nei e lei ifo i le manu feai, poo lona faatagata. O i latou foi nei e lei taliaina le faailoga o le manufeai i o latou  muaulu poo alofilima.

O i latou nei o le faapea foi ona mau faatasi ma Keriso, tupu faatasi ma ia mo le afe tausaga. O loo iai la ma isi tagata o loo taua e Ioane e faapea o ‘tagata ua totoe’. O i latou e lei toe ola seia atoa tausaga e afe. O tagata uma nei na maliliu mai le taimi o Atamu seia oo i ona aso mulimuli, o i latou nei ua taua o le uluai toetu.

I le fuaiupu e ono, o loo aumaia ai le matagofie o le tagata ua toetu ia Keriso. Faafofoga foi i upu “Amuia mona ua paia le ua iai se tofi i le uluai toetu e le oo foi le pule a le oti faalua ia te i latou, ae avea i latou ma ositaulaga a le Atua ma Keriso, latou te fai ma tupu foi faatasi ma ia i tausaga e afe. O tausaga nei e afe o le a faapea ona oo ai le filemu tele i le lalolagi. O Keriso o le Alii ia o le filemu o le a ia pulea le lalolagi uma ma le filemu.

Peitai o lenei filemu e iai le taimi e motusia ai. O le maea o le afe tausaga o le a faapea ona tatalaina mai o Satani, ai le mea na puipuia ai o ia. Atonu o se tasi nei o fesili tele lava o loo tulai mai nei. Pe aisea e toe tatala mai ai e Keriso Satani. O loo iai le mafuaaga e tusa ma fuafuaga mamao a le Atua. O le a faapea foi ona toe faasagatau atu nei au i le Atua ma le Nuu Paia e pei ona molimauina mai e le Salamo e 2:

Se a le mea ua faanunununu ai nuu ese, ma mafaufau ai nuu i le mea e le aoga?  Ua tutu mai tupu o le lalolagi, ua pulega faatasi foi alii, e tetee atu i le Alii ma le na ia faauuina, Sei tatou motusi ese a laua noataga, ma lafoai eseina a laua maea ia te i latou. E soisoi le o afio i le lagi; e tauemu le Alii ia te i latou.

Ona fetalai atu ai lea o ia ia te i latou i lona toasa, na te faaatuatuvaleina foi i latou i lona toasa tele. A o au, ua ou faauuina lau Tupu i luga o Siona lou mauga paia.  Ou te tauina atu le tulafono; ua fetalai mai le Alii ia te au, O lou Atalii oe, o le aso nei ua ou fanauina ai oe. Ia e fai mai ia te au, ona ou foaiina atu ai lea ia te oe o nuu ese e fai mou tofi, ma tuluiga o le lalolagi e fai mou.

E te fasi gaugauina i latou i le tootoo uamea; e pei o le ipu a le fai ipu omea e te nutililii ia te i latou. O lenei, outou tupu e, ia outou atamamai; ia aoaoina foi outou faamasino o le lalolagi. Ia auauna i le Alii ma le matau, ia fiafia foi ma le gatete, ina sogi ia i ona vae, nei toasa mai o ia, ma outou fano ai i le ala; aua e faafuasei ona tupu o lona toasa.  Amuia i latou uma o e faatuatua ia te ia.

Ia manuia fuafuaga o lenei aso