Ou te faatalofa atu i le mamalu o Samoa i ona tulaga faalupeina i so o se vaipanoa o le kelope o loo mafai ona alaala ma papaaao ai. E iai le talitonuga o loo maualuga pea le alofa o lo tatou matai i le lagi i le soifua tului ma le manuia.
Faamalo atu le onosai aemaise le naunau mai pea ina ia faitau i vaiaso taitasi lenei tusitusiga ina ia mafai ona fesoasoani i le ola faaleagaga aemaise o le ola saili i le Atua ma lona finagalo e ala i lana Upu tusitusiga mo i tatou. E viia le Atua ua tatou taunuu mai nei i le toe tusi o le Tusi Paia, ma ua fai foi si umi o tatou suesueina ma talatalanoa ina ia mafai ona maua se Malamalamaga i le Tusi Paia.
O le tusi o Faaaliga, o le toe tusi lea o le Tusi Paia ma le faaiuina o le faailoa mai o le Atua e ala i tusitusiga. O Kenese o le tusi o amataga. O Faaaliga o le tusi o le gataaga ma le faailoaina mai o mea o le a tutupu i aso o totoe ma le toe afio mai o Keriso, o lona nofo tupu, ma le ola e faavavau.
E tele mataupu autu i le Tusi Paia e amata mai i le Kenese, e faailoa mai ai le:
Lagi ma le lalolagi
Le agasala ma le faasala
Tagata ma le faaolataga
Le tuliesea o Satani mai le lagi ma lona taunuuga
Isaraelu ma lona filifiliina, o ona faamanuiaga ma faasalaga
Atunuu o le lalolagi, o Papelonia ma amio faa-Papeloina
O malo eseese ma le Malo e maua uma o latou taunuuga ma iuga i le Tusi o Faaaliga.
Evagelia ma Tusi o loo taumafai e faailoa ma faamatalaina mai.
Peitai o le tusi o Faaaliga o loo manino mai ai le taunuuga o mea uma. O loo taua mai i le Kenese le amataina o le lagi ma le lalolagi i foafoaga a le Atua, ma amataga o galuega a le Atua Silisili. I le tusi o Faaaliga o loo toe taua mai ai foi le lagi ma le lalolagi i le faaiuina o galuega a le Atua Mamana.
E faapea foi i le Kenese ona taua ai le tagata ma le faasalaga ona o le agasala. E oo foi i le Faaaliga o loo taua ai foi le tagata ma lona iuga ona o le agasala. O loo taua mai e le Kenese le Tama na te tuimomomo le ulu o le gata poo le tiapolo. I le Faaaliga o loo faailoa mai ai foi le manumalo o le Keriso i le gata poo le tiapolo.
O loo taua mai i le tusi o Faaaliga le igoa o le tusitala, o Ioane. (1:4, 9; 22:8).
O ia o le perofeta (22:9), o se taitai ua iloga i totonu o Asia Laititi (1:4). O Ioane le tusitala o loo taua, o ia lea o le soo o Iesu. Pau lenei o le tusi a Ioane e ese mai lo le evagelia ma tusi e tolu. E ese le auala o loo tusiaina ai, lea ua faaigoaina o le tusi faavaloaga. O perofetaga o mea o le a oo mai.
O Ioane na nofo i Efeso, na pueina o ia ma taofia, ona faaaunuua ai lea i le motu o Patamo i le Sami Akeana (Aegean Sea) e galue o ia i le lua i le eliina o maa taua, i lalo o le pulega a le tupu o Roma o Tomitiana (Domitian) mai le 81-96 AD.
O le vaitaimi foi lea na tusia ai le tusi o Faaaliga. O le malamalamaga i le autu o lenei tusi e faatatau lea i le iloa o le tagata i lona faamatalaina o le tusi, po le ituaiga o suesuega ma talitonuga e faatatau i mea o loo tusia. O nisi nei o faamatalagaina poo talitonuga i auala e malamalama ai i lenei tusi. E 4 ituaiga o faamatalaina poo talitonuga e faamatala ai le tusi o Faaaliga. O le faamatalaina muamua poo le talitonuga muamua e faapea:
O le Tusi o Faaaliga ‘Ua Taunuu’ (Preterist) – Ua uma ona faataunuuina mea o loo taua i lenei tusi i le senituri muamua.
O nisi ua manatu e faapea o le tusi o Faaaliga ua na o se tala faasolopito – E faailoa ai le ekalesia e afua mai i le taimi o Ioane e oo atu i le aso gataaga (Historical).
O nisi ua latou aoao e faapea o le mataupu o lenei tusi ua na o ni aoaoga lelei e maua mai ai, ae le o ni mea moni e tutupu (Idealist).
O le vaega mulimuli o i latou ua ua manatu faapea o le Tusi o Faaaliga o loo faailoa mai ai mea e tutupu i le Lumanai. (Faaaliga 4-22). O perofetaga e lei faataunuuina ma e sau le aso e tutupu ai i le lumanai (Futurist).
E iai le manatu o le a le oo se lagona poo se sailiiliga i nei faaliliuina poo auala e faamatalaina ai lenei tusi, aua e tupu ai manatu eseese ma tele ai finauga. Ae ua iai le lagona e faapea, o le mea e sili ona laualuga o le manumalo lea o Keriso i le fili ma i latou e faatautee ia te ia ma ona tagata.
O le Faaaliga o le a manino ai le feteenaiga i le va o le tagata ua ulutinoina e Satani, o lona malo e tasi i le lalolagi atoa, ma le manumalo o Iesu Keriso e faatoilaloina ai le fili ma le faatuina o le Malo i le Meliniuma (Mataupu 20) ma le ola atali.
O le tusi o Faaaliga foi e iloa ai le mana o le Leona o le Ituaiga o Iuta, ma le aa o Tavita. O le Leona lava lea e tasi o le Tamai Mamoe ua fasia ae o loo soifua pea, na te aumaia le faamasinoga tonu i le lalolagi agasala ma le faatautee atu i le Atua. O Keriso e autu i ai le tala atoa o lenei valoaga. O ia o le manumalo ma o le tulaga lena e tatau ona faatauaina.
Mo le tusitala lava latou ia, o le a ou manatu e faasoa atu i le lagona ma le faamatalaina o le Tusi o Faaaliga o le vaai i le lumanai poo le ‘futurist view’. O le talitonuga maumaututu o mea o loo taua i le tusi o Faaliga e lei taunuu pe e lei taunuu foi. Afai e taua Keriso i totonu o le Faaaliga e tatau foi ona tatou malamalama ia te ia.
O Keriso i totonu o le Tusi a Faaaliga: O lenei tusi o le ‘Faaaliga a Iesu Keriso’ (1:1) ma o loo faaalia ai o ia i ala eseese: (1) O lona mamalu, poto, mana ma lana pule o loo faaalia i lenei tusi (2-3). O lona mana e mafai ai ona faamasino tonuina le lalolagi (5-19). Faamatalaina Keriso o le:
O le Molimau Faamaoni
O le Ulumatua o e ua oti
O le Pule i tupu o le lalolagi (1:5)
O le Muamua ma le Mulimuli (1:17)
O le E Ola nei lava (1:18)
O le Alo o le Atua (2:18)
O le Paia ma Faamaoni (3:7)
O le Amene
O le Molimau Moni ma le Faamaoni
O le Amataga o mea na faia (3:14)
O le Leona o le Ituaiga o Iuta
O le Aa o Tavita (5:5)
O le Tamai Mamoe (5:6)
O le Molimau Moni ma Faamaoni (19:11)
O le Upu a le Atua (19:13)
O le Tupu o Tupu ma le Alii o Alii (19:16)
O le Alefa ma le Omega (22:13)
O le Fetuao Pupula (22:16)
O le Alii o Iesu Keriso (22:21).
Tatou te iloa uma lava i lenei tusi o Keriso o ia lava o le Alii o alii. E auga uma mea ia te ia. A silasila foi i le lisi e pei ona taua tatou te iloa ai Keriso o ia lava o le Alii malosi, e mai le vavau e oo lava i le faavavau. Ia fesoasoani mai le Alii ia avea le talanoaina o le tusi o Faaaliga ma auala e mafai ai ona tatou iloa atili le Alii o Keriso ma talia o Ia e avea ma Faaola o o tatou olaga.
