Ou te faafeiloai i le agaga faaaloalo i le paia ma le mamalu o Samoa le atunuu pele i ona tulaga faalupe.
Faamalo le soifua laulelei i lenei foi vaiaso fou ua tatou aulia mai i le alofa o lo tatou Tama i le lagi.
Tatou te faafetai pea i lana tausiga ia i tatou i aso uma. O ia o le muaau ma muliau i mea uma tatou te faia.
O le Atua e le mafai ona faateaina lona alofa ia i tatou, e ui lava i le mataga o a tatou amio ma le faigata o o tatou loto ae ua naunau mai o ia ia te oe ma au ina ia o tatou maua se mafutaga faifai pea e le motusia. O lea mafutaga e gata i lalo nei ae o le ola e faavavau ua ia saunia.
E iai le upu e masani ona tatou faalogo i ai e faapea, “e tauaso le alofa”. A oo ina matua ulu le alofa i se tagata aemaise o se faigauo a se tama ma se teine, poo le a le faigata, ma le feai o maile a le aiga o le teine, ma tele ona tuagane ma le tama e ese le saua, e mafai lava e le taulealea ua ulu i ai le alofa ona maua le auala ma le lototele e oo ai i le fale o le teine e ui ua ia iloa faigata o ono tutupu.
E le mafai ona faatusaina le alofa lena o le tama i le teine i le alofa o le Atua. Ae o se faatusaina lea o le alofa ua tauaso i mea faigata ma mea e lamatia ai le ola. Ua tauaso ona o le alofa ina ia maua le uo ma ia mafuta mo se taimi umi lava.
Na silafia lelei e Keriso le tulaga o le a oo i ai lona afio mai. O le a ia soifua mai i le fale o manu, taumafai Herota e fasioti, inosia e tagata, sauaina, faasatauroina, atoa ma le oti, ae na tauaso uma na mea ona o lona alofa ia te oe ma au ina ia maua le mafutaga e faavavau lava.
Fai mai le tautinoga a Paulo e uiga i lenei alofa “Aua ua ou mautinoa, e le mafai e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia e le mafaia e ia mea uma ona faateaeseina mai i tatou i le alofa o le Atua, o loo ia KerisoIesu lo tatou Alii.” Roma 8:38
O se lagona e ese le manaia o le alofagia e se tasi. Faafetai Keriso i lou alofa mai ia te au, ua e faatauasoina ou fofoga i le satauro ona o lou alofa ia te au ina tele. Faafetai.
O le alofa lea o Keriso na mafai ai ona ia ola manumalo. O le alofa na le toilalo ai. O le alofa na le ainumea ai o ia ma togi le solo. O le alofa lea na ia le manatu ai ia te ia lava (Filipi 2).
Na tauia e le Atua e pei o le Filipi e 2. Na tuuina atu ia te ia o le ‘suafa e silisili i suafa uma lava’. Ina ua manumalo Keriso mai le oti ona o lona alofa i le lalolagi (Ioane 3:16) na faasuafaina e le Atua Keriso i se suafa maualuga ‘ina ia tootutuli o tulivae uma lava i le suafa o Iesu, o e o i le lagi ma e o i le lalolagi ma e o i lalo o le lalolagi ma ia tautau atu e laulaufaiva uma lava o Iesu Keriso o le Alii lava ia……” (Filipi 2:10-11)
O lea foi le mea e faia e le Atua ia te oe ma au pe a tatou ola manumalo ma tumau ia te ia. O le fetalaiga tuusao lea mai le nofoalii o le Atua. “O le manumalo e maua e ia o mea uma, e fai foi a‘u mona Atua, e fai foi o ia mo‘u atalii”. (21:7)
O loo faapea foi ona lapatai mai mo e ola faiaina ma e ola toilalo i le agasala. Silasila i le lisi o ituaiga o agasala o loo faapea ona inosia e le Atua. O agasala nei poo le ituaiga o olaga e oo ai i le faafanoga e faavavau.
O e loto vaivai, ma e le faatuatua, ma e fai mea e inosia, ma e fasioti tagata, ma e faitaaga, ma e faataulaitu, ma e ifo i tupua, atoa ma e tala pepelo uma, e fai ma o latou tofi le lepa e mu i le afi, ma le teio, o le oti faalua lea. (21:8)
Siaki ane oe i lena lisi. Afai o iai se mea o lavea ai oe, fai loa sau fuafuaga manu o maua le avanoa, valaau i le suafa o Keriso e faamagalo au agasala i lona toto.
E faapefea ona e iloa le tagata e le faatuatua e pei ona taua i le fuaiupu i luga? O le tali e maua i le saunoaga a Keriso, “E iloa le laau i ona fua”. (Luka 6:44)
O le tagata e le faatuatua i le Atua e ola o ia i le soifuaga e pei ona taua i le lisi i luga. Peitai o le tagata faatuatua e le ola i ia mea, ae o le ola amiotonu poo le taumafai ina ia ola e aunoa ma ia mea. O le upu e faaaogaina e le Tusi Paia mo lea olaga e taua o le ‘Ola Faamamaina’ poo le ‘Ola Faapaiaina’. O le olaga lea e finagalo i ai le Atua. Peitai e toatele e le fia ola ai aua e le faigofie ma e inosia foi e isi tagata.
Na faateia Ioane ina ua faapea atu se tasi o agelu o agelu e fitu, manatua foi lea na iai ipu o mala e fitu e pei ona tatou talanoaina muamua. Na faapea ane le agelu ia Ioane ‘Sau ia ou te faaali atu ia te oe le faatoanofotane, o le faletua lea o le Tamai Mamoe’.
Ua faaali e le agelu ia Ioane i luga o le mauga maualuga lava le aai o Ierusalema, le aai tele ma le paia ua alu ifo mai le lagi ua iai le pupula o le Atua.
O se matua vaaiga matautia ma le ofoofogia ua vaaia ai nei e Ioane le matagofie o lenei aai. Le aai ma le nofoaga na saunia e Keriso mo oe ma au le tagata ua talia ma ola mo Keriso. Le tagata ua taua o le ekalesia a le Atua poo le tagata ua ola vavaeeseina mai le lalolagi ma ona tuinanau ma le agasala. O le tagata ua faamaligiina ana agasala e ala i lona faatuatua i le maliu o Iesu Keriso, o le tagata na salamo i ana agasala ae tuuina atu lona loto mo Keriso.
O tagata nei o loo aoao le tusi paia o le ekalesia lea a le Atua. Manatua foi e leai ma se taua o igoa o tatou lotu i lea taimi pau le mea o le mautinoa o le igoa i le Tusi o le ola.
O i latou uma nei lea ua taua o le faatoanofotane poo le faletua o le Tamai Mamoe lea o loo i totonu o le aai ua vaaia nei e Ioane.
O i latou nei o le au faatuatua ua sao i le ola e faavavau.
O se vaaiga uigaese e pei ona vaaia e Ioane o le Ierusalema fou ua sausauina i le mamalu o le Atua. O le mamalu lenei e lei vaaia e mata.
O loo talanoa Ioane i le mamalu ma le pupula o le paia o le Atua. O le mamalu e faailoaina e ala i le malamalama, peitai o le malamalama e le o le mamalu lea.
O le mamalu lea na tatalo ai Keriso i lona Tama lea na ia te ia a o lei faavaeina le lalolagi (Ioane 17:5, 24)
O se tasi nei o vaega o le a faapea ona maofa ai le tagata pe a oo ina tatou vaai tino i ai.
O le fesili e tulai mai, faamata e avea oe ma au ma se tasi o le a vaai tino i le mamalu o le Atua ma iai i totonu o le Ierusalema Fou?
Ia manuia
