E faafeiloai i le suafa o Iesu Keriso, I le paia ma le mamalu o le aufaitau i lenei itula o le aso. Malo lava le soifua.
Atonu ua le po se lilo i lou silafia le faalavelave na tulai mai nei i totonu o Manurewa i le vaiaso na tea nei. Ua logo i tulimanu uma o Aotearoa faapea le lalolagi ia talaave o le faalavelave aemaise o le aafia ai o alii talavou.
Ua iai le manatu e fia fai foi se faamatalaga i lenei tulaga ona ua ogaoga le faalavelave. Ua masaa le toto, ua toeesa le toalua o si tina. O nai fanau teine e toatolu o le a tutupu ae e aunoa ma se tama.
E lagona le loto faanoanoa ma le faamomoi loto i le vaai atu i lenei aiga ua matua lailoa lava ona e le gata o le maliu o le tama o le aiga ina ua tagatavaleina ae ua maliu ai foi ma le tuaa ona ua ia maua le tala faanoanoa.
Sa tele se taimi sa ou iai i Manurewa i le vaiaso ua tuanai. Sa ou maitauina uiga ma lagona o tagata. O a latou faamatalaga ma moomooga mo i latou na faatupuina le faalavelave. Ou te molimau atu e le o ni lagona lelei.
Sa ou auai atu i le toe sauniga o le tama na tagata valeina. Sa ou vaaia ma faalogoina ia faamatalaga faasea i tatou tagata Samoa ina ua maua e leoleo i latou i lea taeao na faaoolima i si alii initia.
Taluai ona o le matuia ma le ogagoa o lenei faalavelave, na le mafai ai ona iloa le tele o isi faalavelave na tutupu i totonu o Manukau nei i le vaiaso na tea nei. O nisi foi osofaiga ma gaoiga o isi faleoloa e faaaogaina ai laau malosi ma agaese sei tulou.
I le tele o nei mea ua tutupu mai sa iai lava le lagona lemu i totonu o lota loto e faapea ‘Talosia e le o ni o tatou tagata Samoa o loo aafia ai” O le lagona lotonuu lea o le Samoa.
O le lagona puipui mo o tatou tagata aemaise ai o le tau leleia o i tatou ao tatou aumau i nuu ese.
Peitai na faateia uma le toatele ina ua faailoa mai suafa o le fanau na faatupuina le faalavelave e foliga mai o suafa Samoa e ui e lei faailoa mai aloia e le ofisa o Leoleo o latou tupuaga poo atunuu.
O le lagona alofa ma le mafatia. E le gata i le tina initia ma si ana fanau ae faapea foi nai matua ma aiga o alii talavou na faaooina le faalavelave.
E mautinoa e le o mapu foi le tiga ma maasiasi o matua ma aiga o nei alii talavou. Tatou tuu atu i le Atua e maua mai ai lo tatou fesoasoani. Ia iai le filemu i o tatou loto. Tatou tatalo ia avea i tatou ma faatupuina le filemu atoa.
O loo tatou faasolo pea le suesueina o le finagalo o le Atua e ala i lana afioga.
O le tusi a Iuta lea ua tatou oo mai iai. O le tusi o Iuta o se tasi lenei tusi pito itiiti i totonu o le Tusi Paia.
Peitai o loo iai se feau taua mo le ekalesia Kerisiano aemaise o le ola faaleagaga o tagata.
O le tusitala o lenei tusi o Iuta lava lona igoa. E toafitu ia i latou e suafa ia Iuta o loo i le Feagaiga Fou. O Iuta lauiloa o ia lea o le Faalata. O le isi Iuta o le uso lea o Iakopo lea o loo igoa ia Tataio. O le tasi o le au aposetolo. O le isi Iuta o le faatuiese lea ma Kalilaia. O se isi Iuta e mai Tamaseko lea sa nofo ai Paulo ina ua liliuina o ia i le ala. O se tasi alii e suafa ia Iuta sa galulue faatasi ma Sila i Anitioka. O le Iuta o loo tusia lenei tusi o ia lea o le uso o Iakopo ma Iesu Keriso (Mataio. 13:55 ma Mareko 6:3). E ui o Iuta o le uso o Iesu Keriso e lei manatu Iuta e taua faatasi o ia ma Keriso.
O le mafuaaga lena e taua ai e ia Iakopo o lona uso, ae o le auauna a Keriso Iesu. O Iuta o se igoa taatele i le senituri muamua.
E foliga mai i le tusi, e leai se tasi o tusi patino iai le tusitala. Peitai o loo tusi o ia “I e ua valaauina”…(1)
Ma e ua alofaina e ia poo ..”Le au pele e,….” (3). O faaupuga nei o loo faatatauina lea i tagata ua filifilia poo le ekalesia. O le uiga o le ekalesia i le gagana na tusia ai le Tusi Paia o tagata ua vavaeeseina pe ua valaauina ese. O tagata ua latou mauaina ma taliaina le meaalofa o le alofa tunoa, lea e mafua ai ona faapea Iuta ‘o e ua alofaina’.
O tagata o le ekalesia a le Atua, o i latou ua vavaeseina mai le lalolagi poo le soifuaga o le agasala ae ua naunau atu ma tuuina atu le ola mo le Atua. O tagata Kerisiano o tagata ua valaauina mai le malo o le pogisa, ma ua auai atu i le malo o le malamalama e ala lea i le galuega togiola a Iesu Keriso.
Na tusia lenei tusi i le vaitaimi o le 70-80 AD. E pei ona taua i tusitusiga ua mavae i isi tusi o le Feagaiga Fou, o le vaitau lea o le lalolalgi sa luitauina ai le ekalesia Kerisiano i le tele o faafitauli.
Muamua o fevaevaeaiga i totonu lava o le Ekalesia. Lona lua o aoaoga sese ua avaga atu iai loto o nisi o le au Kerisiano lea e talanoa ai Ioane ma Peteru o perofeta pepelo. Atoa ai ma sauaga ua amata nei ona aafia ai le ekalesia.
O se tasi o mataupu autu o loo faamamafaina e Iuta e tali tutusa lava ma le tusi na tuuina atu e Peteru. O le lapataiga lea e uiga i Perofeta pepelo poo i latou ua faasese i le mataupu a le au aposetolo e uiga i le tala lelei ia Keriso. E pau lona eseesega ona o le tusi e 2 a Peteru o loo tusi atu o se lapataiga le oo atu ia perofeta pepelo. Peitai o le tusi a Iuta o loo tau atu ua iai ma matua lapataia le ekalesia, o perofeta pepelo. “Ua o ane faaleiloga” (4).
O lona uiga o loo iai nei i latou i totonu o le ekalesia. O a latou aoaoga ma talaiga e foliga mai ua aafia ai le ekalesia ae o loo pouliuli pea iai le ekalesia ma le malamalama i le afaina ua iai nei.
E foliga mai o se gaoi ua sau lava i le po sii le TV ae o loo momoe pea lava le aiga. Faatoa iloa lava ua leai se TV ina ua toe foi mai i le fale i le afiafi o le ki le TV ae ua leai se mea. Na manatu ai na gaoia i le ao ae leiloa na gaoia i le po ae leai ma se tais na iloaina.
E le o se tala faatusa ea lena i le tele o mea o tutupu i totonu o le ekalesia Keriso. Faatoa tatou toe iloa mulimuli ane ae ua tuai. Ua sau lava le tiapolo faatupu le maseiga ma le fevaevaeaiga i totonu o le ekalesia e ala i ana togafitiga ae leai ma se tasi e iloa e oo lava i taitai.
O le tele o taimi o togafiti a le tiapolo e ese le matagofie ma lagona lelei i le faalogo. E ui mai i manatu o nisi atoa ai ma aoaoga.
E tatau ona tatou mataala ma ia aua nei faaseseina i tatou.
O le 2 Peteru na tusia ma tuuina mai le lapataiga i le vaitau o le 66AD. A’o Iuta ua aliali mai ai ua iai le faafitauli o aoaoga sese i totonu o le ekalesia o lona uiga o Iuta na tusia i le vaitaimi o le 70-80AD.
Ua afaina tele faatuatuaga Kerisiano ona o le aoaoga faanosisi. Ua latou talai o mea uma faitino e leaga ia ao mea uma faaleagaga ua lelei uma ia. O lea ua mafua ai ona tausisi ma atina’eina le ola faaleagaga ae faatalale i le ola faaletino. Ua avea lea ma mea ua soli ai le tulafono faalemalo ma agasala faaletino ona ua manatu latou e lafoai mea faaletino e leai se aoga. O lona uiga a soli se tulafono ia afaina lava tau o le tino ae le afaina le agaga.
O lenei aoaoga o loo faasagatau iai Iuta: (1) Ia tineia lenei aoaoga ua afaina ai ekalesia kerisiano. (2) Ma faamanatu i Kerisiano ia le faaolaina e le Atua o lona nuu ao iai i Aikupito atoa ai ma le faatafunaina o Sotoma ma Komoro ona ua ola i le tuinanau o le tino.
E faauma e Iuta ana tusitusiga e ala lea i lona tatalo ina ia aua pauu le fanau a le Atua poo le ekalesia. Ia tuuina atu le ekalesia i le Atua e le pona. O se ekalesia e mama ma le afaina ia aoaoga sese a lenei lalolagi.
Ia fesoasoani mai le Atua ia avea pea lava ekalesia o se manamea saunia mo le faatoa faiava. E le pona i aoaoga sese ma manatu sese o tagata.
