Talofa lava Samoa le atunuu pele. Malo le soifua maua ma le lagi e mama i le mamalu o le aufaitau. E momoli atu foi le faamalo i lo tatou folauga i lenei tausaga, o lea ua tatou laasia le ogatotonu lemu o le 2008.
Ia e viia ai pea le alofa o lo tatou Tapaau i le lagi. O nai vaiaso ua tuanai sa tatou talatalanoa ai lava i le Uluai tusi a Ioane.
E pei ona tatou aoaoina ai, e leai lava se umi o le va o nei tusi i le taimi na tusia ai. Na tusia lenei tusi i se vaitaimi o le 85-95AD. E le gata i lea, e leai foi se eseesega tele o feau o loo aumaia e Ioane i le tusi lona lua.
A tatou faatusatusa i le evagelia na tusia e Ioane, o loo iai foi le tele o aoaoga ma faaupuga talitutusa e atagia ai, o Ioane lava lenei o ia o le tusitala. A maua sou avanoa ona e silasila lea i tusi nei ma faatusatusa, ona e maua ai lea o feau uiga tutusa ma aoaoga. Silasila ma faatusatusa le 2 Ioane 5 i le 1 Ioane 2:7 ma le Ioane 13:34-35; 2 Ioane 6 i le 1 Ioane 5:3 ma le Ioane 14:23; 2 Ioane 4:2-3; ma le 2 Ioane 12 i le 1 Ioane 1:4 ma le Ioane 15:11.
O le amataga o lenei tusi o loo faaupuina faapea, “I le tamaitai ua filifilia ma ana tama” (1). O lenei fuaiupu e ono faatatau lea i se tagata, se ekalesia poo le ekalesia aoao. E le o mautinoa lea tulaga, ae e ono faauigaina le “tamaitai” o le ekalesia ma ana tama e faamatala ai le Ekalesia aoao (Universal Church) ua filifilia e Keriso, ma ana tama e faasino lea i ekalesia i pitonuu (local church).
O le mau taatele, o loo tusi Ioane i se ekalesia, o le tamaitai lea, ae o ana tama o tagata o loo lolotu ai poo le ekalesia. E leai se vaega o lenei tusi e faamanino atili ai lea tulaga.
Autu
O le manatu autu o le tusi o le apoapoai lea o le tusitala ina ia savavali le ekalesia i le mea moni, le aoaoga a le au aposetolo atoa ai ma le poloaiga ia fealofani (4-6). Ona o le toatele o tagata talapepelo ua o atu i le lalolagi, o i latou e le faatuatua ia Keriso, ua avea lea ma popolega o le aposetolo, ua mafua ai ona tusi Ioane e puipui Kerisiano nei aafia i talaiga sese (7), o e ua latou teena le maliu o Keriso i la le tino (9).
O se tasi o faatonuga malosi ua tuuina atu e Ioane ina ia puipuia ai le ekalesia mai le aafia i talaiga sese, o le faasaina lea o e talai, ona ulu atu i o latou fale. Aua foi nei ofo alofa atu i ai.
Upu Faatauaina
O le upu faatauaina o lenei tusi o le “upu moni” ma le “poloaiga” (x14). O le Upu Moni o Keriso. O Keriso o loo faailoa e Ioane o lona itu Atua lea atoa (3) ma lona itu tagata (7).
So o se tasi na te teena le aoaoga autu i le mea moni e uiga i le itu la le tino ma le itu la le Atua o Keriso, e le o ia te ia le Atua (9).
Sei o tatou matamata i nisi o mataupu o le tusi a Ioane.
I. Upu Tomua (1:1-3). E amata Upu tomua a le aposetolo e faautu i le ‘tamaitai filifilia’ le ekalesia ua latou mauaina ma ua iloaina le mea moni poo le upu moni. O lenei upu moni e le toe mafai ona aveesea ua ia te i tatou e faavavau.
II. Fiafia ina ua savavali i le upu moni (1:4). Ua faailoa atu e Ioane lona fiafia tele ina ua ia iloa o loo savavali lana fanau poo i latou i le ekalesia i le upu moni. O se vaega taua lenei o le ola faaleagaga i so o se tagata Kerisiano ma so o se ekalesia. O le ola poo le tuputupu, savali, ma alualu i luma le ola faaleagaga. O so o se Kerisiano poo so o se ekalesia e ola alulau i luma le ola faaleagaga, e mafua mai ona ua usitai se tasi o poloaiga taua e pei ona tuuina mai e Keriso, o le alofa lea, o le tasi i le isi poo le fealofani (5).
III. O le Poloaiga ina ia fealofani (5-6). O lenei poloaiga e le o se poloaiga fou. O loo poloaiga o loo faamamafaina i le tulafono a Mose. Peitai ina ua afio mai Keriso ma ia saunoa mai ou te tuuina atu le poloaiga fou ona o le auala na ia faatinoina ai lenei poloaiga. Ua siitia e Keriso le auala e faatino ai le alofa. Na faia e Keriso le taulaga i lona lava soifua e faatino ai le ituaiga poo le maualuga o le alofa e tatau ona iai. O se faatonuga ma se poloaiga mai le amataga (6), peitai ua tatau nei ona faatinoina e ala lea i le savavali ai.
IV. Faatonuga ma Lapataiga ia alo ese mai Aoaoga sese (1:7-11). O le vaega mulimuli o lenei tusi puupuu a le aposetolo, o le tuuina atu lea o lapataiga eseese e faatatau i anetikeriso ma i latou o loo taumafai malosi ina ia faasese le feau a Keriso ma le ekalesia. Manatua foi le aoaoga faanosisi latou te le taliaina Keriso i lona afio mai i la le tino. O so o se tasi latou te talaiina lea aoaoga e lei afio mai Keriso i la le tino, o tagata nei e taua o anetikeriso. O loo faamamafaina e Ioane le mataupu silisili.
O le mataupu e tausisi i ai so o se tasi e faatuatua ia Keriso. O Keriso o le Upu Moni, O ia o Le o loo Moni. E leai se upu tele faa-Samoa e faamatalaina ai Keriso i lona itu e leai se mea e sese ia te ia. Na ia fetalai, ‘O au nei o le Ala, Upu Moni ma le Ola’.
O le sao o le faamatalaina o le fetalaiga a Iesu Keriso e faapea, O ia o le Ala, O ia o le e Moni ma le Ola. Ae ua tuuina i ai le upu ‘Upu’. O le Atua o ia o le o loo Moni peitai e le lagona lelei i le gagana ma le faaaogaina o upu, peitai o le tulaga moni lava lena o le Atua. E mai le vavau e oo i le faavavau, e le suia o ia e leai foi se mea sese ia te ia. E moni atoatoa o ia. O le aoaoga la lenei i le Keriso, e ui ina o ia e uiga tutusa ma le Tama, peitai ua afio mai o ia o le alo o le Atua e maliu tino tagata aua le togiola o le lalolagi.
V. O nisi o talitonuga ma tapuaiga latou te le taliaina o Keriso e mai le Atua o ia. Ua manatu i latou o Keriso ua na o se perofeta. O loo ilitata Ioane le aposetolo i lenei aoaoga aua ua latou tineia le liutino tagata o Keriso le Upu (Ioane 1:1-3). O i latou nei o loo fautuaina e Ionae ina ia aua nei talaiina i latou i o outou fale. E le o le le talimalo, peitai o le puipuia o le ekalesia nei faaseseina i aoaoga sese.
VI. Upu Faaiu (1:12-13) O upu mulimuli a le aposetolo o loo faailoa atu ai lona naunau ina ia alu atu e vaai i latou ae le na o le tusi atu. E taua lea tulaga ia Ioane aemaise le ekalesia, ina ia faaatoatoaina ai le olioli.
O loo toe faamamafa mai e Ioane le taua o le moni ma le sao o lo tatou faatuatuaga Kerisiano. E faavae lea i le Atua, le aoaoga na tuuina mai e le au aposetolo, ma tusitusia i lana afioga. O le tagata le mauaa i le afioga a le Atua poo le mataupu silisili ia Keriso Iesu, e faigofie ona tosina lona loto i so o se talitonuga ma so o se tapuaiga aemaise lava pe afai e iai mea e faatosina i tagata nai lo le Upu a le Atua.
Ia faamanuia le Atua ia te oe i lenei vaiaso ma ia e mauaa i le Upu.
Ona o Keriso
Lui Ponifasio
