O le agaga faafetai i le Atua e le uma ona o lona alofa tunoa mo i tatou. Malo le soifua Samoa.
Faamalo le onosai i le taumalulu o lenei atunuu o Niu Sila ma Ausetalia o loo tatou aumau ai. E le gata i lea o soo se Samoa i tulimanu e fa o lenei paneta o mafai ona tatou fesootai i lenei tusitusiga.
O le fuafuaga a le Atua mo i tatou e matautia ma e faigata tele i le mafaufau o le tagata ola ona malamalama ma faavasega pe aisea ea ua alofa mai ai le Atua ia te i tatou.
Aisea ua tonu ai i lona finagalo e afio mai Keriso e maliu mo le togiolaina o tatou agasala? E iai le upu e taua soo e tulatoa ma le au mau upu o le tatou atunuu e fai i paia o Samoa e faapea ‘e leai se tasi e mafai ona auauina aua o Samoa o le i‘a e iviivia’.
E moni o se faaupuga manaia ae a tatou nonofo lelei i lalo ma auau ivi o le i‘a ou te talitonu e mafai ona tatou faitauina. E oo lava i alii saienitisi ua latou faitauina ivi o i‘a ia latou suesuega ma faaigoaina ivi taitasi.
Aisea ua oo ai se manatu i ivi o i‘a sei tulou? E matua faigata lava ona tatou auauina, iloiloina, fefulisaiina, ma matua sailiili i le alofa tunoa o le Atua pe mafua aisea.
O le alofa ua matua loloto ua mafua ai ona tuuina mai lona Alo Pele e toatasi mo oe ma au.
O se fesili masalo a tatou taunuu i le lagi ona tatou fesili lea i le Atua. Pau o lenei ia tatou maua le agaga o le faafetai.
I le Tusi o Faaaliga o loo atagia ai lenei alofa o le Atua aua e tatou te fesili aisea ea ua tutupu uma ai le tele o nei mau mea e pei ona faaali mai e le Tusi o Faaaliga.
O le tali o loo taatia i le upu lenei o le Alofa. O lona alofa lea na ia laveai mai ai oe ma au mai lima o le Tiapolo. Na tauina ai le taua ina ia mautinoa e le toe iai se pule a le tiapolo ia te oe ma au e faavavau, faavavau lava.
E le gata i lea ina ia e toe maua le olaga sa uluai manatu le Atua mo oe ma au ina ia o ta ola ai e pei ona iai i le taimi o Atamu ma Eva a o lei agasala le lalolagi.
O le mafuta faatasi ma ia e faavavau, faavavau lava.
O le lagi ma le lalolagi fou ua vaaia nei e Ioane ma le ekalesia poo tagata ua faaolaina e ala i le galuega o le satauro lea ua iai nei i le lagi fou ua vaaia e Ioane ua alu ifo mai le lagi.
Ua taumafai Ioane e faamatala mai le Lagi ua vaai atu nei i ai.
- O lona Pupula: E faatusaina i se maataua. E le toe iai se pogisa e ufitia ai i tatou. (11)
- O Pa e tele ma maualuluga: O se faailoga o le malupuipuia ma le saogalemu o i tatou.
- O Puipui poo Faitotoa: E faitauina e Ioane, e sefulu ma le lua puipui e taitolu puipui i itu e fa o sasae, sisifo, matu ma toga.
- Ua tofu foi le agelu ma le Puipui e leoleoina. O agelu nei ou te talitonu o le a faafeiloaina i tatou.
- Ua i le pa foi o le aai faavae e sefulu ma le lua. Ua tofu ma le igoa o le au aposetolo e toasefulu mai le toalua ua tusia ai.
- Ua tusia foi igoa o le fanauga a Isaraelu e toasefulu ma le toalua i nei puipui uma. O se vaega taua lenei ina ia aua nei galo ia i tatou. O le faaolataga o le lalolagi na auala mai i le Nuu o le Atua poo le fanauga a Isaraelu. Manatua foi le talanoaga a Keriso ma le fafine utu vai i le Ioane e 4. Na saunoa ai Keriso ‘E mai ia Iutaia le faaolataga’. E le mafai ona soloia e le Atua le faatauaina o lona nuu.
O se tasi o vaega e taua i le mataupu lenei ona o le valoaga a Esekielu le perofeta e faatatau i le lagi ma ona faitotoa atoa ai ma le tusiaina o igoa o le fanauga a Isaraelu.
E iai le talitonuga e masalo foi o le auala lenei o le a faapea ona tusia ai igoa o ituaiga e sefulu lua i le lagi:
O puipui i le itu i matu o le a tusia ai Reupena, Iuta ma Levi. O le puipui i Sasae o le a tusia ai Iosefa, Peniamina ma Tanu. O le puipui i le itu i Toga o le a iai Simeone, Isakara ma Sepulona. I le puipui i Sisifo o le a iai Kato, Asera ma Nafatali. (Esekielu 48:31-35)
E tau mai i lenei le Atua ua uma ona ia tuu mavaevae mea uma ma e leai se nunumi i ana fuafuaga.
Ua faatauaina e le Atua ona tagata poo le fanauga a Isaraelu. Atoa ai ma i latou e toasefulu ma le lua o e na milotino ma Keriso ma tuuina atu i ai le galuega o le tala lelei. Atonu o i a taunuu ai se tasi muagagana a tatou ‘ua tietie i le maa salafa’. Ua tusiaina e le Atua suafa o aposetolu i le maavae ina ia mafai ona silasila uma i ai le mano, mano o tagata o le a oo atu i le lagi, aemaise o tagata o nuu ese na oo i ai le tala lelei ona o la latou galuega.
O se fesili e ono tulai mai i lenei mataupu e uiga i aposetolo e ao ona malamalama ai.
Muamua e toa sefululua le au aposetolo o loo taua i le tusi o Faaaliga.
Manatua na maliu Iuta ina ua sisi lona ua sei tulou. Ae o ia o le aposetolo filifilia.
Lona lua na tofia e le au aposetolo ia Matatia e fai ma sui o Iuta.
Lona tolu o Paulo na valaauina e le Atua e fai ma aposetolo o Nuu Ese. O le fesili e tulai mai. ‘O ai o le toatolu lenei o le a tusia lona suafa i le faavae e pei ona taua e Ioane. Aua e sefululua faavae ae sefulufa aposetolo.
E foliga mai o se faiga palota o le a faia.
E iai le lagona e faapea:
O Iuta ou te talitonu e le maua sona avanoa i le faavae e pei ona taua. E lē tau faamatalaina lea tulaga. O Matatia, e iai le talitonuga o ia o se tagata lelei ma faatuatua i le Atua. O lona tofiaga e le auposetolo o se manatu lelei ona ua avanoa le tulaga o Iuta. Peitai e iai le manatu e le o se filifiliga na faia faaleagaga pe taitaia foi e le Agaga lea filifiliga. E fesiligia foi le auala na faia ai le filifiliga ona na latou faia le vili e tofia ai Matatia e fai ma aposetolo. O le isi itu e lei toe iloa tele se tala ia Matatia ma lana galuega faatalai o le tala lelei.
Peitai e iai lou lagona o Paulo le aposetolo o Nuu Ese o le a tusia lona suafa i le faavae aua e le gata o ia na valaauina tuusao mai le lagi, na faalogo i le siufofoga o le Atua, na usitai i mea na faatonuina o ia e fai, na ia momoli le tala lelei i nuu ese, ma o le tele o le Tusi Paia i le Feagaiga fou na tusia e Paulo e ala i le mana o le Agaga.
E taua tele lo tatou valaauina ma tumau i le valaauina. E iai foi le talitonuga e tele tagata e manatu ua valaauina e le Atua, ae leai ua na o se lagona lelei poo se mea lelei e tatau ona faia e pei ona tupu ia Matatia.
Ia manuia lenei vaiaso i le alofa o le Atua
