O le tusi mulimuli lenei a le Aposetolo poo le Toeaina o Ioane. Na tusi i le vaitausaga o le 85-95AD.
E pei lava o le Evagelia a Ioane ma le Tusi muamua ma le lua, e tele lava eseesega i aoaoga ma faaupuga.
O le tusi lona tolu o loo aveina atu lea ia Kaio (1), e fesoasoani ai ia te ia i faafitauli faale-Ekalesia o loo feagai ma ia. O Kaio e masalo o se tagata e lauiloa i totonu o Asia Laiititi lea na nofo ai Ioane mo le tele o tausaga ae lei maliu o ia. O loo silafia foi o ia e le toatele o tagata aemaise lava Efeso (1, 3, 5-6).
O Kaio o se igoa e taatele i totonu o le Feagaiga Fou. I le Roma 13:23 (o Kaio o Korinito), Galuega 19:29 (o Kaio o Maketonia) ma le Galuega 20:4 (o Kaio o Teipe).
O le autu o lenei tusi puupuu o se fesoasoani a Ioane i le Ekalesia ona ua amata foi ona tutupu nai pefea i totonu o le ekalesia. E pei lava o le tulaga e masani ai, e solo lelei i isi taimi, ae iai lava taimi e iai nai vesiga i totonu o le ekalesia.
O Kaio o se tasi o sui o le ekalesia, o le ua faaigoaina e Ioane o le pele (1:1). O Tioterifi o se tasi foi o le ekalesia o le ua avea nei ma faafitauli ona ua ia faia nisi o faamatalaga ma le amanaiaina le pule faaaposetolo a Ioane. O se tasi nei o faafitauli e ese le matuia ma le ogaoga i totonu o le ekalesia. Ou te talitonu o se agasala mamafa ma le matautia, o le le amanaiaina lea o le pule ua tuuina i taitai atoa ai ma le faia o faamatalaga faatuaupua atoa ma upu leaga ma manatu faasausili i nisi o le auuso (9).
O loo iai le naunautaiga o Ioane e fia oo atu e faasao le mataupu, peitai ua le mafai i lea taimi (10, 14). O le mafuaaga lea o le tusi o Ioane ia Kaio ina ia faalototele ia Kaio ina ia mafai e ia ona fofo le faafitauli (11).
O loo faapea foi ona tusi atu Ioane ia Kaio e tausi ma agalelei i tagata o loo latou talaiina le upu, aemaise lava i latou mai nuu ese (5-8). Ua faailoa i lenei tusi le eseesega o le galuega lelei a Kaio ma Tioterifi e fiasili ma faatuaupua.
O nisi o fuaiupu autu o lenei tusi o loo maua lea i le fuaiupu e 6-8, o le taua o le alofa i tagata ese. O le fuaiupu 11, o le lapataiga ina ia faailoa le amio lelei e avea ai ma faaaoao i isi.
Sei o tatou vaevaeina lenei tusi i ni nai vaega ina ia faigofie ai ona malamalama ma e fia faaaogaina le mataitusi o le F, ina ia faigofie ona taofi, ma e 4 ia F.
O le F muamaua o le Faafeiloai: O loo faafeiloai e Ioane Kaio, o le e pele ia te ia atoa ma le alofa faamaoni i ai. E ese le manaia o lenei tulaga, e lei nanaina e Ioane lona alofa ae sa faailoa. O se tulaga taua lea aemaise i le va o taitai matutua ma taitai laiti poo i latou ua tuuina atu i ai le galuega.
O le F lona lua o le Fiafia. O loo faaaliali atu le fiafia o le Aposetolo ona o Kaio (2-8). Ioe e le o ma foi Ioane ae o loo faailoa atu le mea moni ma se mea lelei o loo ia silafiaina. O se tasi lenei o auala e faamalosi ai i latou o loo galulue faatasi ma taitai, o le tau atu i ai o mea latou te lelei ai, e avea lea ma ala e faatupu malosi ma iloa ai le amanaiaina o i latou e taitai.
O loo faailoa atu le Fiafia o Ioane ia Kaio ona o mafuaaga nei. Muamua, o lona Amioatua (2-4). Ua aavae atu tala ia Ionae i le faamaoni o Kaio i le galuega. E le gata i lea, o lona ola poo le savali i le Upu. E leai se mea e sili ona nanau i ai le taitai na i lo le vaai atu i tagata o savavali i le amiotonu ma ola ai. Ua matua faailoa mai e Ioane lona fiafia i le fuaiupu o sosoo ai.
“E leai sou fiafia e sili i lenei pe a ou faalogo ua savavali lau fanau i le upu moni” (4). Ioe, o se fiafiaga tele lena i se taitai, poo se faifeau ina ua vaai atu ua ola tagata i le Upu.
O le vaega lona lua o le faailoa atu o le fiafia o Ioane ia Kaio, ona o lona Agalelei (5-8). O le agalelei o Kaio e lei faapito ae na faailoa ma iloa uma e le ekalesia. I se isi faaupuga, o se tagata e faatino le upu alofa ma le upu lelei. E loto alofa ma agalelei. O le loto o le lagona lea e mafua ai mea uma. O le aga o le amio lea. O le loto ua tumu i le alofa e mafua ai ona faatino pe faia aga ua lelei. O le lagona ma le amio.
E ui i le fiafia o Ioane peitai sa iai foi itu sa faafatuulu i lona mafaufau. O le F lona tolu o le Faanoanoa. Sa matua lagona le Faanoanoa o Ioane ona o Tioterifi (9-11). O Itu nei na faanoanoa ai le aposetolo. Muamua, o lona Fiasili (9). O le manatu faamaualuga. O le fia tagata poo isi tatou te faamatalaina ai nei ituaiga o uiga. Fai mai Ioane, ua ia le fia ‘talia i matou e ia.’
E iai foi tagata faapenei i totonu o ekalesia, e manatu faasausili lava o ia e sao. E iai foi taimi e le talia ai se fautuaga aemaise o se tala a le taitai. E le gata i lana amio faasausili, peitai ua faailoa foi e Ioane o lenei amio e leaga (10-11). O le faatuaupua.
O lenei amio o le faia lea o tala uiga lua pe faamatalaina e i tatou, e pei o le fugafuga e gutulua. O le faatuaupua o le ese le tala e fai mai i luma, ese foi le tala e fai i tua. O nei ituaiga o uiga e ese le faatupu vevesi ma maseiga i totonu o se ekalesia. E le gata o le uiga faatuaupua, ae o upu o loo faaaogaina e Tioterifi, fai mai Ioane o upu leaga (10).
E faauma le tusi a Ioane i le F lona 4, o le Fiafia. O loo tau atu e Ioane lona fiafia ia Temetiu (12).
O Temetiu. E foliga mai o Temetiu o ia lenei o loo alu atu ma le tusi e ave ia Kaio. O loo faailoa atu e Ioane ia Kaio, o Temetiu o se tagata lelei. O ia e logoleleia e tagata uma lava, atoa ma le upu moni lava, atoa ma le molimau ola a Ioane mo ia (12). Afai o Temetiu lea o loo alu atu ia Kaio ma le tusi, masalo o loo iai le naunautaiga o Ioane e faatea ese Tioterifi ma le ekalesia (10), ona avea lea o Temetiu ma taitai e suitulaga ia Tioterifi.
Ona faauma lea o upu a Ioane i le faailoa ona lona fia oo atu ia Kaio ina ia la fetautalatalai (14).
O se aotelega o lenei tusi puupuu ma se feau taua o loo aumai ai, o le faia lea o faaiuga e tatau mo le manuia o le ekalesia. Ia aua le tuuina umi se faafitauli e alu i totonu o se ekalesia, aua e atili ai ona taa le tiapolo ma faaseseina ai tagata i le tala lelei.
O se faalototele foi lea i taitai ma faifeau ina ia aua nei fefe e faia faaiuga talafegai, aua o le lago mate lava e tasi e faaleagaina ai le suauu atoa.
E le gata i lea, o tagata lotu foi ina ia puipui i le nofo lelei i le va o uso ma aua le faatupu vevesi ma amanaia i latou ua tuuina i ai le pule ma le taitaiga o le galuega.
