Talofa lava Samoa le atunuu pele. Faamalo le soifua lau lelei. Faafetai i le Atua ua toe aulia mai lenei aso fou aemaise le alo atu i faiga malologa o le faaiuga o le vaiaso. Talosia sa maua se taimi ma aiga aemaise le fanau ae lei amataina foi aoga o lenei tausaga.
Na tatou talanoaina i le vaiaso talu ai, Molimau e toalua e pei ona tuuina mai i le Faaaliga e 11.
O le vaiaso nei o le a tatou vaavaai ai i le tagata ua faaigoaina o le Manufeai poo le Anetikeriso lea e taua faatolusefulono i lenei mataupu.
O le a faapea foi ona e faafofoga soo i lenei igoa Anetikeriso aua o lea ua amata ona taualuga le tusi o Faaaliga faatasi ai ma le taualuga o le ola o le Anetikeriso.
I le Tusi e lua a Paulo i le ekalesia i Tesalonia, o loo ia taua ai o le Anetikeriso o se tagata. Silasila i nisi nei o mau e fesoasoani ai i uiga o lenei tagata poo le Anetikeriso.
Tanielu 7:25-26; 11:31-39; 2 Tesalonia 2:2-10; 1 Ioane 2:18.
E le gata o Paulo ae faapea foi le aposetolo o Ioane, na ia matua lapataia le ekalesia Kerisiano i le oo mai o le Anetikeriso i totonu o le ekalesia. O loo talanoa ia i latou e tetee atu ia Keriso ma lana aoaoga.
E pei ona taua i lenei mataupu le galuega a Molimau e toalua e faapea, a uma ona sii taua lea o le manufeai ma fasiotia lea o i laua e toalua i le mea na faasatauroina ai lo latou Alii. O lona uiga o totonu o Ierusalema e tupu ai lenei taua.
A maea ona fasiotia o molimau e toalua, fai mai le fuaiupu e 8 ma le 9 o le a taatitia o laua tino i le magaala o Ierusalema ma o le a fai ma mataaga o tagata mo le tolu ma le afa aso.
Manatua foi o le taimi o le molimau a i laua nei, e tolu tausaga ma le afa, ae 3 ma le afa aso e taatitia ai o laua tino i luga o auala o Ierusalema. O se taimi o fiafiaga a i latou uma ua i lalo o le pulega a le Anetikeriso ma temoni lea taimi.
Peitai e le iloa e le Anetikeriso o loo galue pea le Atua, ma o le a vaai le lalolagi atoa i se mea ese. I le fuaiupu e 11 e faapea, a mavae le tolu ma la afa o aso a o iai i laua i luga o auala i Ierusalema, ona oo mai lea o le mānava o le ola mai le Atua ma uluitinoina ai i laua. Ona tutu lea o i laua i luga ma aveolaina i laua i le lagi.
O se mea o le a faaofoina ai le toatele o laua fili ma o le a oo foi le matau ma le fefe ia i latou atoa ai ma le lalolagi atoa uma.
Sa ou manatunatu i nisi o mea o le a tutupu e pei ona tatou talanoaina i lenei tusitusiga i taimi ua mavae i le tele o mala ma faigata o le a oo mai. O le a mafai ona iloa uma e le lalolagi atoa. E le toe iai se mea e gole aua foi ua saoasaoa tele le poto faanei ona po aemaise lava i TV ma Satelite ma le Upega Tafailagi ua faaaogaina e fesootai ai komepiuta uma o le lalolagi.
O lea faatoa uma ona faatauto le Peresitene fou o Amerika. O mata uma o le lalolagi sa i le TV i lea taeao. Ae ou te manatu i le mea o le a oo i ai le lalolagi a o faia le fiafia i Ierusalema ma faaali e le TV tino o Molimau e toalua o taatitia i le ala, ae oo mai le mānava o le Atua ma toe faatutuina i laua, o le a avea o se mea matautia i le lalolagi atoa. O le a maua uma e le TV le vaai atu ua aveina ae tino o i laua nei i le lagi aemaise o le faalogoina o le leotele mai le lagi o loo faapea mai “Ina o maia i luga nei” (12)
O le vaega o le a oo atu nei i ai la tatou talanoaga, e faamatalaina e faapea o le ‘Pu lona Fitu’ pe faaupuina foi faapea o le ‘Amataga o le Gataaga’.
O le iliina o le pu lona fitu e faailoa ai le amataga o le Pule a Keriso i le lalolagi. “O le malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau lava” (15)
O le taimi lea o le a le toe iai se taofiofi o le Atua ae o le a faaauau loa le taualugaina o ana fuafuaga mo le lalolagi. O le taimi lea e oo ai le iuga i le Anetikeriso ma ana pulega faalemalo poo le lalolagi lea ua ia puleaina. O le a faapea foi ona faaumaina le malosi o lona tamaoaiga atoa ai ma tapuaiga faatemoni. O le a faapea foi ona lafoina le Anetikeriso ma lana perofeta pepelo sa la vaavaalua, i le lepa afi e faavavau.
O le a tatou vaaia le toe afio faalua mai o Keriso ma ana au mai le lagi. O le a faapea ona latou faaumatia fitafita uma a le Anetikeriso i le taua ia Amaketo e pei ona tatou faalogo soo i ai.
O nisi o vaega o le a tutupu i lea lava vaitau, o le toe faatuina o Isaraelu, o le nuu o le Atua, i o latou eleele ma faasolo atu ai i le faamasinoga o nuu uma e pei foi ona valoia e Keriso i le Mataio.
Ona pulea lea e Keriso o le lalolagi uma ma nofo tupu ai o ia mo le 1000 tausaga. Peitai e le o le gataaga lea o mea uma.
O loo mulimuli le faaumaina poo le taua faaiu a Koku ma Makoku (mataupu 20). Ona lau loa lea o le iuga o Satani i le Lepa Afi e faavavau. Ona faatoa oo mai lea o le Faamasinoga o le Nofoa Sinasina.
O se auivi lena o mea o le oo mai i le lalolagi pe oo ina iliina le pu lona fitu. O le pu taua lenei o le a faafefe uma i ai le lalolagi aua e lagona loa le leo o le pu lona fitu, o lona uiga e le toe iai se ki taofi o mea faigata o le a oo i ai le lalolagi.
O se tasi o vaaaiga matautia o le a iai pe a oo ina iliina le pu lona fitu, o le vaaia lea o le malumalu o le Atua i le lagi ua faaavanoaina, ona iloa atu lea o le atolaau o lana feagaiga i le malumalu (19). O le taimi lea o le a faapea ai ona feemo uila ma leo ma faititili ma le mafuie ma le uatoa tele.
Masalo o le taimi lea faatoa talitonu ai le toatele o tagata e moni e iai le lagi aua o lea faatoa o latou vaai tino i ai. O lea ua latou iloa atu le atolaau moni, aua o atolaau ia na faia e Mose i le vao ma le malumalu o Solomona ma isi, ua na o ni faatusa o le atolaau moni i le lagi.
Manatua o le faatusa o le atolaau lea sa faia e Mose i totonu o le malumalu sa tuuina i le Paia o Paia. Ae o le a matala le lagi ma iloa uma e tagata le atolaau moni i le Paia o Paia moni i le lagi ae le o se faatusa. O se vaaiga matagofie lea taimi. Ae talofa e, ia i latou e lei taliaina le faaolataga na afio mai Keriso e faia. O le a o latou tau ina matamata ma moomoo.
E iai le manatu, o lenei faaaliga e mo tagata Isaraelu, ona o i latou nei na osi feagaiga faapitoa ma le Atua.
O le atolaau e pei ona silafia e foliga o se meaafale faapitoa faa-Isaraelu. A o tatou faitau i le Esoto ma le Numera, tatou te iloa ai le faamatalaina o le atolaau o le feagaiga.
O le nofoaga pito i luga poo le ufiufi e faaigoaina o le Nofoa o le Alofa, e faia lea i le auro malosi atoa atoa ma Serafi e lua o loo faalava o laua apaau i luga.
O totonu o le atolaau o loo iai papa maa na tusia i le aao o le Atua, atoa ai ma le tootoo o Arona. O loo iai foi ma le ato e pei ona faatonuina e Mose Arona e tuu i ai le tumu o le omera o le manai mai le taimi o iai i le vao. (Esoto 40; Numera 17; Esoto 16).
O nei mea uma e taua tele i tagata Isaraelu aua o mea nei e paia, o faailoga o le osiga feagaiga ma le Atua. E iai le talitonuga atonu o le mafuaaga o le faailoa mai e le Atua o le atolaau mai le lagi, o se faailoilo i tagata Isaraelu uma aemaise i latou e le talitonu ia te ia aemaise o le afio mai o le Mesia mo le togiolaina o agasala.
O le vaiaso fou o le a tatou talanoaina ai le mataupu e sefulu ma le lua. O le Fafine na ofu i le la atoa ai ma le Tarako.
Ia faamanuia le Atua ia te oe i lenei vaiaso.
