E faatalofa atu i le suafa o Keriso lo tatou Alii Faaola. Malo le soifua maua ma le lagi e mama i le mamalu ma le paia o si o tatou atunuu.
Alo maia o le faaauauina lenei o le tatou suesuega i le Tusi o Faaaliga.
E amata le mataupu e 12 i le faamatalaina mai o le fafine na ofu i le la atoa ai ma le Tarako. O le faaaliga lea ua vaaai atu nei i ai Ioane, o le fafine ua to ma o loo alaga ma le tiga a fanau. A o alaga lenei tina o loo faapea ona tu le tarako lanu mumu tele lava ma e fitu ona ulu ua sauni atu na te aina le pepe a fanau mai.
E taua tele le ata poo le faaaliga o le fafine lea o loo vaai atu nei i ai Ioane. O loo vaaia e Ioane le fafine o ofu i le la, o le masina foi o loo i lalo o ona vae, o i lona ulu foi le palealii fetu e sefulu ma le lua.
E vaega taua nei e tolu o le faaaliga na vaaia e Ioane na faapea foi ona iloa e Iosefa i lana miti.
O le la, o le masina atoa ai ma fetu e sefulutasi na ifo atu ia te ia. E manino i le tala o le aiga o Iosefa, o Iakopo o loo faatatau lea i le La, o lona toalua o Lasela o le masina ae o fetu e sefulutasi o uso ia e toasefulu ma le tasi o Iosefa.
Na suia e le Atua le igoa o Iakopo ia Isaraelu ma avea ai ona atalii e toasefulu ma le toalua o ituaiga o Isaraelu.
O le fafine o loo iloa e Ioane i le faaaliga o le faailoga lea o le nuu o Isaraelu lea na afio mai ai Keriso.
O le Tarako o loo faatatau lava lea ia Satani (9). Na sau le tarako ma le faamoemoe na te aina le pepe a le fafine. i se isi faaupuga o le taumafaiga a Satani ina ia fasiotia le pepe o le faaolataga o Iesu Keriso mai le taimi na fanau ai. Silasila i le Mataio e 2 o loo iai le tala i le taumafaiga a Herota e fasiotia le pepe o le Kerisimasi e ala lea i le fasiotia uma o pepe tama i lalo o le lua tausaga.
E lei manao o ia e faaolaina tagata. Na amata mai lava i le faatoaga i Etena ona tau pulepule ma saili e Satani se auala ina ia aua nei taunuu le faaolataga e ala i le afio mai o Keriso.
O Satani o le fasioti tagata mai lava i le amataga (Ioane 8:44). Faafetai i le Atua e lei mafai e Satani ona faataunuuina ana fuafuaga, ae na tu lava le pule tutasi ma le finagalo o le Atua ina ia afio mai Keriso. (Kalatia 4:4)
Mai lava i le amataga o loo faasagatau lava le tiapolo i le Atua. O loo taua e Ioane le tau o le taua i le lagi. O Mikaele ma ana agelu, o le tarako foi ma ana agelu o loo tau ma au o le lagi.
E le manumalo le tiapolo. E fiu lava ana togafiti ae o Keriso lava o le Alii ia o le Manumalo, o le toto o le Tamai Mamoe (11)
I le Mataupu e sefulutolu o loo iloa ai e Ioane le isi faaaliga. O le tulai mai o le Manufeai (1-10) nai le sami, e fitu ona ulu, e sefulu ona nifo, ua i ona nifo foi o palealii e sefulu, ua i ona ulu fou o igoa faifai.
Ae tatou te lei oo atu i le suesueina auiliili o lenei manufeai e ao ona tatou manatua e tele ituaiga a auala e faamatalaina ai lenei manufeai na alu ae nai le sami. E le gata o le ata o le Anetikeriso ae o malo o le Anetikeriso.
Ua tatou iloa o Satani o le agaga, ma e faatoa iloa le tino mai o ana gaoioiga i le taimi na te ulutinoina ai se tagata poo meaola e ala i ana temoni.
O meaola i totonu o lenei mataupu o loo ulutinoina e Satani. O le manufeai na vaaia e Ioane e pei o le nameri, o ona vae foi e pei o vae o le urosa ma lona gutu e pei o le gutu o le leona. Ua tuuina atu foi ia te ia e le tarako lona malosi ma lona nofoalii ma lona pule tele.
O le faamatalaina o nei manu e faatusaina lea i faigamalo ma atunuu.
O le Leona ua faamatalaina o le Malo o Papelonia. O le urosa o loo faatusaina lea ia Metai / Peresia. O le Nameri o loo faatusaina lea i le faigamalo a Eleni.
Atonu e faafaigofie ona faamatalaina pe a faatusa i le aeto o le faailoga lea o Amerika. O le Urosa poo le Pea, o le faailoga lea o le malo o Rusia, o le tarako o le manu lea ua fai ma faailoga o le malo o Saina.
I le Tusi o Tanielu o loo faatusaina faavaloaga ai le faigamalo a le taitai lauiloa o Alesana i le manu o le nameri poo le leopard i le faaperetania. (Tanielu 7:6) O uiga o lenei manu e vavave ma sili ona saoasaoa ae faaleiloga ana gaoioiga i le taimi e osofai ai. Na faapea ona faamatalaina le malosi faafitafita a Alesana e ala lea i lona puleaina o le tele o malo i lea vaitaimi. E faaleiloga ae vave. O le manufeai o loo vaaia nei e Ioane e fitu ona ulu. O le numera fitu i le Tusi Paia o le numera atoa. E mafai ona faamatalaina lenei manufeai ua atoatoa lona malosi ma lona poto. O ona nifo e sefulu o loo faatusaina lea i faigamalo e sefulu. I le Tanielu e 7 o loo faamatalaina ai lenei foi faaaliga. O taitai poo tupu o malo e sefulu o le a i lalo uma o le pule a le Anetikeriso.
Sei o tatou see ese ma le faamatalaina o le manufeai ae sei o tatou talanoa i le tiapolo aua o ia lea o loo ulutinoina lenei manufeai. E pei ona taua i le fuaiupu e 2 e faapea ‘Ua tuuina atu foi ia te ia e le tarako lona malosi, ma lona nofoalii ma le pule tele’.
O Satani ma lona natura o le faasagatau i le Atua. E fia pule ma ia manao e pulea le lalolagi uma e pei o le Atua. Ua loto o ia e faoa le pule a le Silisili Ese. Peitai e le mafai. Na pau le auala e mafai ona soso i ai o lona taumafai lea e faia se auala e pei ona tatou talanoa ai nei e ala i le ulutinoina lea o se tagata poo se meaola.
O le tagata la o le a ulutinoina e Satani ma ia faaaogaina e faatinoina ai lana pule, lea ua tatou faaigoaina nei o le Anetikeriso. O le Anetikeriso lea na lapatai ai Ioane i le Ekalesia Kerisiano (1 Ioane 2:18) o le a oo mai i le itula mulimuli. Faatusaina lea i ona aso e gata ai.
O le Anetikeriso o le itu tagata lea o le Manufeai lea na vaaia e Ioane. O ia lea o le a tulai mai e avea ma taitai na te puleaina le lalolagi atoa i le taimi o Puapuaga Tele.
O le faamatalaga lenei a Tanielu e uiga i le Anetikeriso.
“A oo i le gataaga o latou malo, pe a faaatoatoaina agasala a e agasala, ona tu mai ai lea o le tupu mata saua, na te iloa foi upu e faigata. E tele lona malosi, a e le o lona lava malosi; e faasilisili lava ia ona faaumatia, e manuia ia, e fai foi lona loto, na te faaumatia i e malolosi, atoa ma le nuu paia. O lona faautauta foi na te faamanuia ai ana sauniga pepelo; e faasilisili o ia i lona loto, na te faaumatia foi tagata o toatele, a o maninoa; e tulai atu foi o ia i le Alii o alii; e olopalaina, a e le se lima e olopalaina ai. O le faaaliga o le afiafi ma le taeao sa ta‘ua, ua faamaoni lea; ia e pupuni foi le faaaliga, aua e tele ona aso. O a‘u o Tanielu, sa ou vaivai, na ou ma‘i foi i isi aso; ona ou tulai lea, ma a‘u faia le feau a le tupu; na ou ofo tele i le faaaliga, a ua le iloa e se tasi”. (Tanielu 8:23-28)
I le Feagaiga Fou i le 2 Tesalonia 2:3-8 o loo faamatalaina ai e le aposetolo o Paulo le Anetikeriso. O se lapataiga ae le gata i lea o le taunuuga e oo i ai le Anetikeriso i le taimi e faaali mai ai lo tatou Alii manumalo o Iesu Keriso.
“Aua ne‘i faasese se tasi ia te outou i se togafiti e tasi; aua e le oo mai lena aso, seia muai ona taunuu o le tete‘a ese, ma ia faaalia mai o le tagata o le amio leaga, o le tagata lea o le malaia, o le tetee atu, ma faamaualugaina o ia e ia e sili i mea uma lava ua tauatuaina, ma mea uma ua ifo i ai tagata; o lea ua tietie ai o ia i le malumalu o le Atua, o loo faaali mai o ia, o le Atua lava o ia. Tou te le manatu ea, na ou fai atu ia mea ia te outou, a o tatou i ai ma outou? O lenei foi, ua outou iloa le mea o loo faalavelave nei lava ina ia faaalia mai o ia i ona lava aso. Aua o loo galue nei lava le mea lilo i le amio leaga ae lilo ai na ona seia aveeseina le o faalavelave. Ona faaalia mai ai lea o le ua amio leaga e fano o ia i le Alii o Iesu i le manava mai o lona fofoga ma faaumatia i le faaali mai o lana afio”.
O Keriso o ia o le Alii o le Manumalo. E ui i le taumafai malosi mai o Satani i lona poto ma lona malosi, peitai e matua le tutu lava i le Pule fai toatasi a lo tatou Atua. Ia viia o Ia ma ia faamanuina pea lona suafa.
Ia faamanuia le Atua ia te oe i lenei vaiaso.
Lui Ponifasio
Pastors
