E faatalofa atu i le paia ma le mamalu o si o tatou atunuu Samoa. E amata mai lava i mauga tetele e oo ifo i mauga iti, ou te talitonu o loo iai le manuia o le Atua mo i tatou uma i lenei vaiaso fou ua tatou laasia. Malo le galulue i faiva alofilima ua tofia ai i tatou uma e le Atua tatou te auauna ai ia te ia atoa ai ma isi uso a tagata a o tatou aumau ai i lenei olaga aemaise o atunuu ua tatou avea nei ma o tatou nuu.
Peitai e iai lava le masani a soo se Samoa ma o se faanaunautaiga foi ina ia mafai ona susue le faamalama ma toe vaai atu i lona nuu e pei ona fanau ai ma tofia ai e le Atua. O le nuu o loo iai lona faasinomaga ma lona taunuuga.
E masani lava ona ou faalogo i lenei fuaiupu o le Tusi Paia o taua i luga o le leitio pe a oo i taimi o sailiga tupe a afioaga ma nuu, aemaise foi o ekalesia. Ou te le iloa pe o le mea lea nai le manatu o le tusitala i le taimi na tusia ai le fuaiupu. Ae e iai le talitonuga e le o se suegatupe poo se tusigaigoa na faia i lea taimi.
Ae o le faanaunautaiga ina ia mafai ona toe manatua e le tagata lona nuu ma lona atunuu ma lona faasinomaga aemaise ai o mea ua faatauaina ina ia mafai ona lelei le soifuaga i le va nonofo ai o tagata aemaise o le va ma le Atua.
O i tatou ua iai lo tatou faasinomaga. Manatua foi oe, e le o se nuu moni lenei tatou te iai. O loo tatou faaaunuua. O lo tatou nuu moni o le lagi e pei ona e faafofoga ai i le tele o taimi e faia ai sauniga o maliu.
Ia manatua ma ia aua nei galo afai o oe ma au o le Isaraelu moni, ona susue lea o le faamalama ma vaai i le lagi o lo tatou nuu moni lea. Ia e manatua o lou faasinomaga lena, o lou nuu moni lena, o lou aiga lena ma o mea uma o loo tatou faia i lenei soifuaga ina ia mafai ona tatou toe foi atu i lea nuu.
O loo ou iai i Samoa i le taimi nei e auai i se faaipoipoga. O le toatele o e na malaga mai fafo o loo auai mai i lea faamoemoe. O nisi o se taimi muamua lea ua toe oo mai ai i Samoa talu mai le tele o tausaga. O le lagona fiafia ma le faamalieina i le toe foi ma taliu mai i nuu na ola ma soifua ae ai. E le gata i lea o le toatele o nisi o fanau na soifua ae i nuu i fafo, o le taimi muamua lea ua tulaueleele ai i Samoa. O loo matou nonofo foi i le faletalimalo faatasi ai ma nisi o alo o lo tatou atunuu mai Niu Sila o loo malaga mai ona o taaloga.
E vaaia lo latou fiafia i Samoa. Ua latou feiloai atu i le toatele o tagata ma aiga e lei feiloai muamua. O uo fou ua maua. Ua faataitai i taumafa e lei masani muamua ai.
O tafaoga ma maimoaga ma taelega i matafaga na nofoaga ma mataaga. Ua leva ona fia oo mai i Samoa nei. Ua leva ona fia tulaueleele. Ua leva ona susue faamalama ma moomoo i le taimi e toe foi ai le Isaraelu i lona faasinomaga. O lea ua taunuu ma o se lagona fiafia ma le faagaeetia.
Tailo foi i lenei lagona i le taimi tatou te oo atu ai i le lagi. E le mafai ona faatusaina le taunuu mai i Samoa ma le aso e feiloai ai ma le Atua. Susue lou faamalama ma vaai i le lagi. Le Ierusalema fou. Tapena ma sauni i le taimi tatou te tulaueleele ai i le ola e faavavau. O le a e feiloai i nisi o aiga o auga tupulaga ua mavae e te lei feiloai i ai. O aiga ma uo sa ola mo le Alii ma tuuina atu o latou soifua ia te ia o loo latou aeaeina le manuia poo le ola e faavavau.
O se lagona e faigata ona faamatalaina. Fai mai le aposetolo o Paulo e le mafai ona faamatalaina tiga i nei ona po ma le manuia atali o loo faatali mai mo i tatou.
O le a tatou vaaia mea e lei vaaia muamua e mata. O le a tatou faalogoina leo e lei lagonaina muamua e taliga. O le a tutupu ae i o tatou loto ni faalogona e lei oo muamua i o tatou loto.
Susue pea lou faamalama ma vaavaai atu i le Atua.
Na gata mai le tatou talanoaga i le vaiaso na tea nei i le amataga o le mataupu e sefulutolu i le tulai mai o le Manufeai
I le fuaiupu e 11-15 o loo iloa ai le isi manufeai ua sau mai le eleele. Manatua o le manufeai muamua na alu ae nai le sami.
O le manufeai lona lua lenei e tele lona faaaogaina e le tiapolo ina ia faataunuuina ai lona faaseseina ma le puleaina o tagata. O le Manufeai lenei o ia o le perofeta pepelo. Ua na o le Tusi lava a Faaaliga o loo talanoa i lenei perofeta pepelo e pei ona faamaumauina e Ioane.
O le perofeta pepelo o se tasi lea o taumafaiga a Satani e faaseseina tagata ina ia manatu o le toaga i tapuaiga o le auala lea e faaolaina ai ma maua ai le ola e faavavau. O le agaga lava lea e tasi o loo maua ai ma faapogisaina ai le toatele o tagata i nei ona po. O le manatu a alu lava i le lotu ua lava lea. Peitai ua tatou iloa e le o le finagalo lea o le Atua aua e tele foi isi tagata e lolotu. E tele foi tapuaiga eseese. O Tapuaiga o se taumafaiga lea a le tagata e saili lona auala i le Atua e ala i sauniga ma tulafono faatapuaiga. Peitai ua saunia e le Atua e ala i le ola e faavavau e ala i lona lava Alo Pele, o Ia o le Ala, Upu Moni, ma le Ola.
O le Perofeta Pepelo poo le Manufeai lona lua, e lua ona nifo e pei o se tamai mamoe. O Keriso o le Tamai Mamoe a le Atua e aveesea agasala a le lalolagi e pei ona molimau Ioane le Papatiso. Ae o le perofeta pepelo e foliga i le tamai mamoe. O se tasi lea o uiga o Satani, o mea uma na te faia e pepelo ma lē atoatoa aua o ia o le ‘Tama o le Pepelo’.
Masalo e faatatau tonu lenei ata o le tamai mamoe i le perofeta pepelo e foliga mai o se ekalesia e tapuai i le Atua ae ua na o ni foliga ae leai se talitonuga atoatoa i le tagata ma le Alii o Keriso e pei foi ona iai nisi o tapuaiga i nei ona po, e le talitonu ia Keriso o ia o le Alo o le Atua ae ua na o se perofeta.
E tatau lava ona tatou amanaia aoaoga a le Tusi Paia e pei ona fai mai Mataio le faievagelia ina ia aua nei o tatou talitonuina tagata o loo fai mai ‘o loo ua iinei Keriso, poo o loo i o foi. (Mataio 24:22-24) Aua o le a faapea ona toatele o Perofeta pepelo ma anetikeriso o le a latou faia vavega ma galuega tetele ma le ofoofogia e faaseseina ai le toatele. E oo lava i tagata Kerisiano.
O tagata faapenei lea e talanoa ai ma apoapoai ai Paulo ia Timoteo ina ia maitauina tagata faapenei e foliga mai e amio Atua ae ua teena lona Mana (2 Timoteo 3:1-5).
“A e ia e iloa e oe lenei mea, o ona aso e gata ai e oo mai ai aso faigata; auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena.”
O se tasi o vaega tatou te iloa ai lenei Manufeai poo le Perofeta Pepelo, fai mai Ioane a tautala o ia e pei o se leo o se Tarako. E foliga mai o ia o se tagata o le Atua peitai o ana saunoaga e iloa ai lava o ia o le Tiapolo.
O ia lenei o le ia taumafai ma faamautuina le tapuaiga i le Anetikeriso. E ala lea i lona faatonuina o le faia o se faatusa o le Manufeai ma tuuina i le mea e paia ina ia tapuai i ai tagata. Silasila i le lapataiga a Keriso i le Mataio e 24.
O lenei faatusa o le a tuuina atu i ai le manava. O i latou e le tapuai i lenei faatusa o le a faapena ona fasiotia. O le perofeta pepelo lenei o le a ia faia vavega tetele e ofo ai tagata (13 & 14).
O le ofo o tagata i faalioga ma vavega e mafua ai ona mulimuli isi tagata i nisi. E faaseseina ai foi. Manatua e mafai foi e le tiapolo ona faia vavega ma faailoga. E le o vavega uma e mai le tiapolo. O Ioane foi na lapataia i tatou ina ia “tofotofo uma i agaga” (Ioane 4:1-3).
E taua lo tatou faatauaina o le Tusi Paia ma malamalama lelei i ai aua o nisi ua latou faia vavega e faaaogaina ai le suafa o le Atua poo tapuaiga, e oo lava i tatalo. Peitai ua le talafeagai lea ma mea o loo faatinoina e pei ona aoao mai e le Tusi Paia.
Ou te manatua a o ou talavou sa ou alu ai i se tasi o fofo faa-Samoa ona o nisi o aiga sa mamai. O lenei fofo e fai lana tatalo ae tuu le ki o le faitotoa i totonu o le Tusi Paia, ona vili lea o le Tusi Paia i lona lima a o faia le tatalo ona ia tau mai lea o le mai ma le mafuaaga.
Ou te le o iloa poo faia lava nei ituaiga o fofo faapenei. Ae o le mea moni lava e leai se aoaoga o le afioga a le Atua i nei ituaiga o fofo faapenei. E foliga mai o se gaoioiga faaleagaga peitai ua le talafeagai ma le Afioga a le Atua.
O loo fautua mai Ioane ina ia tofotofo i agaga uma. O Luka le faievagelia ma le fomai o loo lapataia i tatou i le Tusi o Galuega ina ia o tatou suesue e pei o tagata Kerisiano i Perea na latou suesue i aso uma (Galuega 17:10-11)
Fai mai le tasi o alagaupu faa-Peretania e faapea “Aua nei faaseseina i tatou e le o mea uma e ilaila o se auro”. Ioe e ilaila foi le pepa lole ma le pepa sukalati. E faapena le faaseeina o i tatou e le tiapolo.
E le o Tapuaiga uma e talitonu ia Keriso Iesu, o le Alo o le Atua na afio mai mo le togiolaina o a tatou agasala.
Ia aumai e le Atua ia i tatou le mafaufau tonu tatou te iloa ai le Atua moni.
Soifua ona o Keriso
Lui Ponifasio
