Ou te faatalofa atu i le Suafa o Keriso lo tatou Alii i le paia ma le mamalu o Samoa. E amata mai mauga tetele seia paia mauga iti. Malo le soifua. Malo foi le tauatai.
O loo i le Atua lava le taui o le tagata ma lana mea na lulu.
Aua tatou te faavaivai e galulue mo ia manu o ao aua a oo mai le po ona tatou malolo ai lea. O lenei ua tatou faasolo atu i le tau mafanafana. Sa ou i Ausetalia talu ai nei ma ua amata ona vevela foi le tau. Ua mavae atu le timu tele sa feagai ai Niu Sila ae faafetai i le Atua i lona alofa le faatuaoia.
O lona alofa lea e aumai ai lava le timu ma le la, o le okesene mo i tatou i aso uma e ui ina tatou pauu pea i vaivaiga o lenei olaga.
Faafetaia foi aua o le toto o le Tamai Mamoe e pei ona tatou talanoa i ai i le vaiaso na tea nei e faamamaina ai i tatou uma lava ia tatou agasala, aua ana leai le faamiligiina o le toto po ua leai foi se faamaligiina o agasala.
Fai mai le mau a Ioane, na vaaitino i le mamalu o le Atua i le lagi ma lona nofoalii e faapea, na ia vaaia le Tamai Mamoe foi e fitu ona mata.
O le fitu o nifo e le o faamatalaina mai lona uiga. Peitai o le fitu o mata o loo faamatalaina mai e faapea, ‘O Agaga e toafitu o le Atua ua aauina atu i le lalolagi uma’ (5:6).
Manatua foi i le amataga o le tusitusiga i le Mataupu muamua o le Faaaliga na tatou talanoa ai i agaga e fitu atoa ai foi ma agaga o loo mumu i luma o le nofoalii (4:5).
O loo faatatau lea i le faamasinoga o le lalolagi pe a oo i le taimi e iliina ai pu e fitu (8:6).
Ona tatou iloa lea o le mea sa sili ona popole i ai Ioane lea ua faataunuuina e Keriso ua ia avane le tusitaai mai le aao o lona Tama ma ia tatalaina.
O le taimi lea na faalogoina ai e Ioane se tapuaiga ese i le lagi e lei lagonaina muamua e ona taliga poo taliga foi o se tagata ola. Na muamua ona faapau o meaola e fa ona sosoo atu ai lea o toeaiina e 24 ua faapauu fao i luma o le Tamai Mamoe ma pepese ia te ia. Ua latou pepese i le pese fou.
E ese le taua o le vaega lenei o le taimi e toina ai le tusitaai. Na faapauu toeaiina i Le o tietie i le nofoalii, ae o lea ua faapauu i le Tamai Mamoe. A o faapauu i latou e foliga mai e lua mea o loo uuina i o latou lima. Muamua e tofu i latou ma le kitara. O le kitara lenei fai mai nisi o le meafaili a le tiapolo.
E faasaina e nisi ekalesia ona taina Kitara. Ae ete silafia pau lava lea o le meafaili e taina e sili ona latalata i le Atua. Masalo a tatou taunuu i le lagi o le a tofu i tatou ma le kitara. E ui i le tele o le mau mea faifaaili, ae ua faaaogaina le kitara mo viiga o le Atua i le lagi.
Lona lua o mea o loo uuina i lima o toeaiina o ‘ipu auro ua tumu i mea manogi.’ Ua faamatalaina nei mea manogi e Ioane o ‘talosaga ia a le au paia’ (5:9). E leai ma se tatalo o au tatalo e galo i le Atua. E leai foi se tatalo e maumau. O loo faamaumauina uma e le Atua au tatalo ma manatua uma au tatalo e pei o se mea manogi i luma o le Atua.
O le taimi lea o le a tali uma ai talosaga ma manaoga a le au paia. Na faalogoina lea e Ioane o leo o se aufaipese sili ona toatele. O loo latou pepese faaeaea i le Tamai Mamoe. O le Tamai Mamoe na fasia ma ia faatauina tagata i lona lava toto. Soo se tagata lava, soo se ituaiga, gagana, nuu atoa ma atunuu. O le faaolataga o le lalolagi e lei faapito na o le nuu o le Atua o Isaraelu ae ua faasafua mo tagata uma lava.
A o pepese i latou sa alalaga atu e faapea, ‘……aua na fasia oe ua e faatauina foi tagata i lou toto…..” O le alaga o le manumalo. O le alaga o le faafetai aua e lei iai se isi lava mea poo se isi tagata na mafaia ona faia le leleiga i le va o le Atua ma tagata. O le mafuaaga lena ua faaigoa ai Keriso o ia o le Puluvaga. Na ia pupulu le va o le feitagai, le va o le Atua ma tagata. O Keriso foi lenei na tautau i le va o le lagi ma le lalolagi ma faia le sootaga o tagata. O Keriso foi lenei le Tamai Mamoe na fasia ma magalo ai le agasala i le taulaga na ia osia.
O le toto o le mea taugata. Ua masaa le toto. E faigofie ona maua le tupe, o fanua, o mea totino ma isi oa taugata. Ae o le toto o le mea e taugata aua a le masaa le toto e le maua le ola e faavavau o oe ma au.
E lei totogiina i tatou i ni mea e pala ae o le toto lava o le Tamai Mamoe.
O le vaaiga lona tolu e pei ona molimauina e Ioane, o le taua ma le faaaogaina o le musika i le lagi mo viiga o le Atua. O le musika na tupuga mai i le lagi i le nofoalii o le Atua, o ia na faia le musika mo lona viiga. Manatua foi le galuega a Lusifelo sa faia i le musika.
E taua le musika i le Atua. E le gata o pesega i leo o tagata ae o meafaili tatou te faaaogaina e avatu ai lona viiga. O a ni mea faifaili e mafai ona faaaogaina e ave mo le viiga o le Atua? E le na o piano e fia faafofoga i ai le Atua, e oo lava i pate ma le fala e malie uma i le faafofoga a le Atua pe a faaaogaina mo ona viiga.
O se tasi o vaaiga matagofie i le lagi o le taimi o loo tuuina atu ai le viiga. O loo pepese ma alalaga faatasi ma faapea atu, ‘ia tuuina atu ia te ia le mana ma le oa ma le poto, ma le malosi ma le faaneetaga, ma le viiga ma le faamanu. Na lagona uma e Ioane le viiga atoa, o e o loo i le lagi, ma e o i le lalolagi atoa ma e o i lalo o le lalolagi.
O se matua viiga leo tele.
O lenei vaaiga na oo ai se lagona ia te au e faapea, o le viiga lea o loo silasila i ai le Atua e le faia taumusumusua. Ae ia faia i le leo tele aua o se alaga ma se viiga o loo faailoa atu ai le Atua i le lalolagi uma ma mea uma na faia i paneta iloa ma paneta i fafo atu o le itu lagi o loo nonofo ai tagata.
Ta fia ola e, i le taimi na tau ai le upu ‘Amene’! Ai e tai pei o se pa a se faititili ona o le mau a Ioane e mano, ni mano, ma afe ni afe. I se isi faaupuga ua le mafai ona faitauina.
O se tasi o vaaiga tatou te iloa mai i le tusitusiga a Ioane, ua tau le faatinoina i totonu o Ekalesia i taimi o tapuaiga, o le faapauu fao ma ifo atu. O se tasi lenei o vaaiga matagofie. O se vaaiga maualalo ma se vaaiga o se faaeaea i le Atua.
Tatou ave nei vaaiga o le lagi ia tatou tapuaiga. Faataitai i ai. E le gata i totonu o a tatou ekalesia ae o aiga. E le tatau ona tatou maluia e alaga atu i le Atua pe matamuli e tootuli i ona luma.
Ou te talitonu o le a suia lau tapuaiga i le Atua e ala i le faaaogaina o le mataupu e 5 o le Faaaliga. Faitau i ai ma faataitai i ai, aua e iai le taimi tatou te faia ai i luma o le Atua.
Ia manuia lenei vaiaso ona o Keriso
