E faatalofa atu i le mamalu ma le paia o si tatou atunuu Samoa. E le faaitiitia pea le agaga faafetai i le Atua i lana tausiga ma lona alofa le faatuaoia mo i tatou uma. Ae alo maia o le faaauauina foi lenei o le tatou suesuega i le Tusi Paia i le Tusi o Faaaliga o loo ua tatou iai nei.
O loo tatou iai nei i le mataupu e 13 ma ua oo i le vaitau ua faigata ona toe ola pe soifua lelei se tagata o totoe i le vaitau o le Puapuaga Tele.
O le tulai mai o le manufeai ma lana pule saua i le lalolagi o le a le mafai ai ona toe iai se mea e faia e se tagata i lona loto faitalia. Ua pulepule tutu uma e le manufeai le lalolagi e ala lea i lana taitaiga, o lona tamaoaiga, o felauaiga ma femalagaiga e oo lava i mea taumafa o le a pule faamalosi i ai le manufeai ae leai se tasi e toe mafai ona toe faatau atu pe faatau mai e aunoa ma le numera poo le maka o le manufeai.
O le a faailogaina tagata uma e le Manufeai e pei o le faailogaina o meaola sei tulou. E masani ona faailogaina ma tuu le numera i taliga o povi e iloa ai numera atoa ai ma suesuega pe a faaletonu pe mai le povi ina ia mafai ona iloa e le fai lafupovi mea uma e uiga i lea manu.
Fai mai le Faaaliga 13:16 “ua faia foi e ia ona faailoa o tagata uma, o tagatanuu atoa ma alii, o e mauoa ma e matitiva, o e saoloto ma e pologa, ia faailogaina i latou i lo latou lima taumatau poo latou muaulu”.
Ona e fesili mai lea o le taua ma le aoga o lenei numera. O loo taua i le fuaiupu e 17. “Ina ia le mafaia ona faatau mai pe faatau atu e se tasi, tau lava o e ua iai le faailoga, poo le igoa o le manufeai poo le faitau aofai o lona igoa”.
Afai o oe e te faatautee i le manufeai ma lana pulega i lea vaitaimi, o lona uiga e le mafai ona e toe alu i le faleoloa e faatau mai se taumafa aua e tatau ona faaaoga le numera o loo taina i lou muaulu poo lou aao taumatau e faatau ai taumafa. O se faataitaiga, sa masani i tatou uma i le faaaogaina o tupe e faatau ai taumafa mai faleoloa. I le tuputupu o le malamalama o lea ua tau le faaaogaina tupe ae ua faaaogaina lava ia le card poo eftpos. O le a oo mai le vaitau e mavae atu ai foi nei faiga. O le a le toe iai ni tupe, o le a le toe iai ni card ae a oo ina tulai mai le manufeai ona taina lea o le numera i lima o tagata uma poo muaulu foi. A leai le numera lea o le a le mafai ona e toe faia se faatau.
O le a lenei numera? E iai le talitonuga o se tamai masini komepiuta laitiiti lava o le a sulu i lalo o le pa‘u o le tino. O lenei tamai masini komepiuta o le a mafai ona iloa ai mea o le a fealuai ai i taimi uma. O lenei ituaiga o loo ua faaaogaina i le taimi nei e mafai ai ona puipuia i‘a o loo faasaoina i le sami atoa ma manu felelei e pei ona faia e Niu Sila ina ia mafai ai ona iloa le ogalalolagi e lele i ai.
O le masini komepiuta foi lenei o loo faaaogaina i totonu o telefoni feaveai. E mafai ai ona iloa le itu o le lalolagi o loo e iai. Masalo o le toatele e le iloa lea tulaga ae o le mea moni o lau telefoni feaveai e le na o se telefoni ae o loo mafai ai foi ona sailia oe ma le vaega tonu o le paneta o loo e iai. Ou te manatua ina ua pau se tasi o vaalele a le Air New Zealand talu ai nei i atumauga o Niu Sila i le agai atu i Ueligitone, masalo o Palmerston North, sa mafai ai e se tasi o tagata na iai i totonu o le vaalele ona talanoa i lana telefoni ae o loo taumafai leoleo ma taavale a le falemai e saili tonu le vaega o le mauga o loo talanoa mai ai le tagata i le telefoni.
O nei ona po ua i totonu o taavale masini e taua o GPS. O lenei masini e na te iloa tonu lava le vaega o le lalolagi poo le auala o loo e iai e ala lea i le faaaogaina o le satelite.
Ua ala ona ou taua nei vaega ona o se tasi lea o vaega e iloa ai le vaitau o aso e gata ai, o le a tupu ai le malamalama e pei ona valoia e Tanielu. E le toe iai sou saolotoga aua o le a iloa uma e le manufeai au gaoioiga.
Ua tuuina mai foi e Ioane ia i tatou le lapataiga e faapea: “O le mea lenei e ao ona iai le poto. O le ua iai le mafaufau ina faitau ia o ia i le aofai o le manufeai. Aua o le faitau aofai lea o le tagata o lona faitau aofai foi e onoselau ma le onogafulu ma le ono.
O lenei lapataiga ua tuuina mai o tagata faatuatua i le Atua ina ia mafai ona latou iloa tonu lava le taimi o le oo mai o le anetikeriso, o le taimi e iloa ai lona numera ma lona faitau aofai o lona igoa o le 666.
I le Mataupu e 14 ua amata ai ona suia le foliga o le tusi o Faaaliga aemaise o mea o tutupu i le lumanai mai ata o seoli ma le manufeai ma mea leaga o le a tutupu ae o lea ua sui le vaaiga ina ua amata le mataupu e sefulu ae o loo vaaaia le tulai mai o le Tamai Mamoe i le mauga o Siona.
Manatua foi o le mauga o Siona e le o se nofoaga faatusa ae o le mauga moni. O le mauga ua vaaia ai le mamalu o Keriso. O loo faatasi ma Keriso o i latou e 144,000 ua tusia le suafa o lona Tama i o latou muaulu.
Masalo o le vaaiga lenei na iloa e le tiapolo lea na faataitai i ai. Manatua mai lava i le amataga, e leai lava se mea fou a le tiapolo. E na o le faataitai i mea e amataina e le Atua.
O le 144000 lea na fasiotia faamaturo lea ua i le lagi nei e pepese i viiga o le Atua. E ese lava leo o lenei aufaipese, e faatusa i aufaipese ua tatou masani ai. E foliga mai o o latou siufofoga e pei ona ni vai e tele. Manatua i le amataga o le tatou suesuega i le tusi o Faaaliga, na tatou iloa ai le siufofoga o le Alo o le Atua e pei o ni vai e tele (1:15). Na faalogoina foi e Ioane le kitara ua taina.
O le toatele o nisi tagata e le fiafia i le taina o le kitara i totonu o falesa aemaise o taimi o sauniga. Fai mai i latou e le mamalu. O le fua lena ma manaoga poo le lagona o le tagata ia. Peitai i le lagi o loo taina ai le kitara. O le mea moni lava o le uluai mea faaili lea o loo taina i le lagi.
O le 144,000 o loo pepese i le pese fou. (3) i luma o le nofoalii, i luma o meaola e fa atoa ai ma toeaiina.
Ua amata ona vavala mai ata o le lagi i le vaaiga a Ioane. O le nofoaga o loo tatou faananau atu i ai tatou te maua ai le ola e faavavau, ma le mafutaga ma le Atua e leai sona gataaga.
O le auala i le lagi o Keriso lea. O ia na fetalai. “O au nei o le Ala, Upu Moni ma le Ola, e le sao atu se tasi i le Tama pe a le ui mai ia te au”.
Ia manuia lenei vaiaso i feau ma galuega i le alofa o le Atua.
Soifua
Lui Ponifasio
Lui Ponifasio
Pastors
