E faatalofa atu i le paia ma le mamalu o si o tatou atunuu i le suafa o Keriso lo tatou Faaola. Malo le soifua ma le lagi e mama. E iai le talitonuga o loo manuia oe i le alofa o lo tatou Tama i le lagi.
O le alofa ma alofa mutimutivale mai. E alofa fua, e telegese lona toasa ae tele lava lona alofa.
E faamalulu atu ona o le leai o se faaaopoopoga o le Malamalama i le vaiaso na tuanai nei ona o nisi o tulaga le maalofia. Sa gata mai le tatou Malamalama i le mataupu e 4 o le Tusi o Faaaliga lea na tatou vaaaia ai le lagi ma le nofoalii o le Atua. Sa tatou aoaoina meaola e pei ona vaaaia e Ioane ma o latou uiga poo le feau o loo aumaia ai mo i tatou.
O le Leona o loo faatusaina i le malosi ma le pule o le Tupu e pei ona faatauaina e Mataio Keriso o ia o le Tupu.
O le Povi Taanoa o loo faatusaina i le galue malosi ma ola auauna e pei ona afio mai Keriso ma faailoa mai ‘Ou te lei sau ia auauna mai tagata ia te au ae ia ou auauna atu’ (Mareko 10:45).
O le natura lena o Keriso, o ia o le tagata ola auauna. O Isaia o loo ia perofetaina ma faaigoaina le Mesia o ia o le Auauna. (Isaia 42:1) O le evagelia a Mareko o loo ia faatauaina lea itu o le soifua o Keriso o ia o le auauna.
O le meaola lona tolu o loo faamatalaina e pei o se tagata ona mata. O Keriso o ia o le Atua. Peitai o ia na liutino tagata ma soifua mai o ia o se pepe. O le Keriso o ia foi o le tagata. O le mau a Paulo ia Timoteo e faapea: “Aua e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea. (1 Timoteo 2:5). E faatauaina tele e Luka le faievaeglai lea tulaga ma itu o Keriso o ia o le Atalii o le Tagata.
Ma le vaega lona fa o le meaola e faamatalaina e Ioane e pei o se aeto ua lele. O le aeto o se manu malosi. O se manu e lele maualuga.
O se manu e mamao tele lana vaai. E ui i le maualauga o le Atua peitai na ia silafia mamao mai lava i lona nofoalii le moomia e oe ma au o le faamagaloina o a taua agasala, o lea na ia afio mai ai. O ia o le Lokou, ma ua liutino tagata foi le Lokou. O le matua tauavae lea o le evagelia a Ioane.
O le faamatalaina o le afio mai o Keriso. “Aua ua faapea ona alofa mai o le Atua i le lalolagi ua ia auina mai lona Alo pele e toatasi ina ia le fano se tasi e faatuatua ia te ia ae maua le ola e faavavau” (Ioane 3:16). Silasila i le lomiga i tua atu ma le faamatalaina atoa o nei vaega e fa.
I le mataupu e 4 o loo vaaia ai galuega poo mea o loo tutupu i le taimi o tapuaiga i le lagi. O meaola o loo latou tuuina atu le mamalu ma le faaneetaga ma le faafetai i le o loo tietie i le nofoalii. O Toeaiina foi e 24 o loo faapauu i ona luma ma tuuina atu o latou pale ma faapea atu “ Lo matou Alii e, ma lo matou Atua, e tatau lava ina ia tuuina atu ia te oe le viiga ma le faaneetaga ma le mana aua na e faia mea uma lava ona o lou finagalo foi e i ai i latou ma ua faia (11).
Ua e silafia ea e iai le taimi o loo loma o lo tatou taunuu ai i lea nofoaga. E iai le aso ma le taimi ua atofaina o lo tatou auai faatasi ma i latou i le lagi ma faataunuuina lenei tulaga. O se lagona uigaese e faigata e upu ona faamatalaina. O le tatou talanoa faafesagai ma tuuina atu lau tapuaiga a o silasila mai o ia. E te le toe pese i se falesa ae o le tuuina atu sao lava lau tapuaiga a o sasao mai ma afio mai le Tupu o tupu.
Na matua taia i taliga o Ioane le faaupuga, “E tatau lava oe ina ia tuuina atu o le viiga ma le faaneetaga ma le mana.”
E leai se isi mea o toe totoe. O faalagiga ma faalupega uma o le lagi ma le lalolagi ua aofia uma ma tuuina atu uma i le Atua. E pau le upu e pei e avea ma aotelega i totonu o lenei mataupu o le ‘Mamalu ma le Paia o le Atua’.
I le mataupu e 5 o loo talanoaina ai e Ioane le Tusi e fitu ua faamauina. O le tusi ua leai se tasi e mafai ona ia tatalaina. Ua saili i le lagi ma le lalolagi peitai ua leai se tasi na te mafai ona tatalaina le tusi, ona tagi ai lea o Ioane ona ua leai se tasi e mafai ona tatalaina pe tagai foi i ai.
O le tusi taai lea o loo vaavaai atu i ai Ioane i le itu taumatau o le nofoalii, e foliga mai o se tusi o loo iai se mealilo. O loo tumu i tusitusiga e le gata i totonu o le tusi ae faapena foi le patua o le tusi taai o loo iai foi tusitusiga. Manatua foi o loo iai le tusi faapenei ile tusi o Esekielu (2:9).
O le tusi taai i le Esekielu o loo iai i totonu le faamasinoga o Isaraelu, lea na faatonuina Esekielu ina ia lauina pe faailoa i tagata ina ia lapataia ai i latou ina ia salamo ma liliu i le Atua. Peitai o le tusi lea o loo talanoa ai Ioane, o loo iai le faamasinoga o le lalolagi atoa. O nei faamasinoga e amata ona faailoa mai i le mataupu e 6.
A o tagi lotulotu pea Ioane ona ua ia iloa le tulaga pagatia o le a oo i ai le lalolagi ma e o nonofo ai ona ua leai se tasi na te mafaia ona tatalaina le tusi taai ma le faamoemoe o loo iai, ae sa faailoa atu e se tasi o toeaina ia te ia e faapea, ua maua le e mafai ona tatalaina le tusi taai. Na vave ona uma le tagi a Ioane.
Ma iloa atu le Tamai Mamoe a le Atua i le nofoalii. O ia foi o le Leona o le Ituaiga o Iuta, e tupuga mai ia, poo le aa o Tavita.
O suafa nei o Keriso e ese lou fiafia i ai ona e loloto lona faamatalaina ma avea o se auala tatou te malamalama ai i le tele ma le matautia o le Keriso le Alo o le Atua. O ia o le Tamai Mamoe atoa ai ma le Leona.
O le Tamai Mamoe e tuu faafeagai pe e matua tele lava lona eseesega ma le Leona. E pei foi ona faamatalaina le Atua o ia o le ‘alofa ae o ia foi e fua’.
O le Tamai Mamoe ma le Leona o suafa ia o le Mesia. E mafai ona faamatalaina o ni suafa matai. E faailoa mai ai lona mana ma lana pule i le lalolagi.
O le Tamai Mamoe a le Atua poo Keriso le Leona o le Ituaiga o Iuta o le valoaga lea a Iakopo a o ia faamanuia i ona atalii, na ia valoia ai a o iai o ia i Iuta, o le a iai le tupu e maliu mai i le laina o Iuta.
“O le tamai leona Iuta, lou atalii e, na e alu ae nai le mea na saeia, na ia taoto, na ia faapuga pei o le leona e pei o se Leona fafine o ai se na te faaalili ia te ia. E le avea le tootoo ia Iuta poo le faipule ai ona vae seia maliu mai Sailo e usitai atu foi nuu ia te ia” (Kenese 49:10).
Ina ua soifua mai Keriso na maliu mai o ia o le Leona o Iuta, ma avea Sailo o se tasi o ona suafa. O le uiga o le Sailo, o le ‘malologa’. E faatoa mafai ona maua se filemu ma se malologa i le lalolagi pe a afio mai Keriso. O le 1000 tausaga o le Meleniuma o le nofo tupu a Keriso, o le a oo mai ai le filemu i le lalolagi atoa uma.
E leai se filemu e maua e le tagata i lona soifua sei vagana ua nofo tupu ai Keriso i lona soifua. O Ia na fetalai, “O au e malolo ai outou” (Mataio 11:28).
Ia manuia lenei vaiaso i le alofa o Keriso. Ia nofo tupu pea o ia i lou soifua.
Lui Ponifasio
