I le suafa manumalo o Keriso le Nasareta, e faafeiloai atu ai i le paia ma le mamalu Samoa. I ou sa ma faiga, ou mamalu ma paia faaleatunuu, faalemalo ma le faaletalalelei.
Malo le soifua laulelei. Malo le tauatai, malo foi le onosai i feau ma galuega. O le soifuaga e le faigofie. E tele le mau mea e fetuleni faatasi mai, ma avea ma mea e faavaivai ai le loto ma le agaga, ae talosia ia avea lenei tusitusiga o se faasiliga malosi faaleagaga mo oe i vaiaso taitai, aua o le afioga a le Atua, o le areto ola e pei ona saunoa ai Keriso, e le na o meaai e ola ai le tagata ae o afioga uma e tulei mai i le fofoga o lo tatou Atua.
Ua maea ona tatou talatalanoa i ekalesia e fitu e pei ona tusia i le Faaaliga. O le a tatou faasolo atu loa i nisi o vaega o lenei tusitusiga faavaloaga.
Mai le mataupu e 4 e oo atu i le mataupu e 19, o le a tele lava ina talanoaina le mataupu i puapuaga.
A o iai lau Tusi Paia ona amata lea ona faitau mai i le mataupu e 4:1-11. Ua maea ona tusia e Ioane tusi i Ekalesia e pei ona fetalai mai ai le Alii, ona vaai atu lea o Ioane ua matala le lagi. O se vaaiga lenei i le nofoalii i le lagi e pei ona molimauina e Ioane.
Na faalogo Ioane i le leo o le pu ua tautala mai ia te ia. E faigata i le mafaufau ona malamalama i lenei ituaiga pu e tautala. O le pu lenei na fai mai ia Ioane, ina ia ‘sau ia i luga nei ou te faaali atu ai ia te oe mea e tusa ona tutupu amuli’ (1).
I le taimi o le siitiaga poo le taimi e afio mai ai Keriso e siitia lana ekalesia o loo faapea foi ona lagona ai le leo o le pu. “Aua e afio ifo mai le lagi le Alii lava ma le alaga, ma le leo o le agelu sili ma le pu a le Atua. E muamua foi ona toe tutu mai i e ua oti o ia Keriso. Ona faafuasei lea ona aveina ae o i tatou o loo ola ma totoe…………..(1 Tesalonia 4:16)
O lea ua vaaia foi ma lagonaina e Ioane le mea lea na talanoa i ai Paulo i le ekalesia i Tesalonia. O le pu e foliga mai o se auala e faafeiloai ai ma o se auala foi e amata ai se suiga mai le tino i le Agaga e pei ona iai Ioane i le Agaga ina ua maea ona ili le pu pe tautala mai foi le pu. E lei savali Ioane i faitotoa o le lagi.
Ua iloa nei e Ioane o le lagi o se nofoaga moni. E le o se tala faafagogo. O le lagi o loo iai agelu, o tagata, o leo o meaola ma tagata. Ua iloa foi e Ioane o le ogatotonugalemu o le lagi o loo tu mai ai le nofoalii ma o loo ‘tietie foi le tasi i le nofoalii’ (2).
Ua vaaia e Ioane o nofoalii e luasefulu ma le fa atoa ai ma toeaiina e luafulu ma le fa. E le gata o mea ua vaaia ae o mea o loo faalogo foi i ai o ia. O le uila ma faititili atoa ma le leo mai le nofoalii, e le o faamatalaina mai poo le a lea ituaiga o leo.
O se tasi o vaaiga uigaese i totonu o le lagi na iloa e Ioane, o meaola e fa. Ua tutumu i mata luma atoa ma tua, i se isi faaupuga o nei meaola e pipii ai mata i le tino atoa.
O nei meaola e fa o loo mafai ona leoleoina ai le nofoalii. E tofu le itu o le meaola ma le itulagi e na te vaaia.
E iai vaega taua o nei meaola e pei ona faamatalaina, ona o foliga nei e fa e atagia ai vaega e fa o le tagata ma le galuega a Keriso a o iai o ia i le lalolagi.
O le Leona
Fai mai Ioane o le meaola muamua e pei o se Leona. O le Leona o le ata lea o le malosi, o le pule. O le ata e faatatau i se tupu. O se tasi lea o autu ma matua tauave a Mataio le faievagelia, na ia finau i ana tusitusiga i tagata Iutaia o Keriso o ia o le Mesia, o le Tupu lea o tagata Iutaia. O le mafuaaga foi lena ina ua amata le evagelia a Mataio, na tatala lava i le tolaulauina o le gafa tautupu o Keriso e tau i le nofoalii o Tavita ina ia faailoa atu ai i tagata Iutaia o Keriso o ia o le tupu o tagata Iutaia.
O se tasi suafa o Keriso o loo i le Tusi Paia, o ia o le Leona o le ituaiga o Iuta.
O le Povi Taanoa
O le tasi meaola o loo taua o loo faatusa e peiseai o se povi taanoa. O le povi o se manu e faatusaina i ai le galue malosi. O Keriso o ia na fetalai ‘Ou te lei sau ia auauna mai tagata ia te au ae ia ou auauna atu’. (Mareko 10:45). O le natura lena o Keriso, o ia o le tagata ola auauna. O Isaia o loo ia perofetaina ma faaigoaina le Mesia o ia o le Auauna. (Isaia 42:1)
O le povi o se manu e faafaigaluegaina e sua le eleele. O se manu faigaluega mamafa. I le tatou suesueina o evagelia e fa i le tausaga na tuanai nei na tatou iloa ai o le evagelia a Mareko o loo faamamafaina ai Keriso o ia o le auauna. E le o faamaumauina e Mareko se tala i le gafa o Keriso aua e leai se tasi e amanaiaina se gafa o se auauna.
O le tagata
O le meaola lona tolu o loo faamatalaina, e pei o se tagata ona mata. O Keriso o ia o le Atua. Peitai o ia na liutino tagata ma soifua mai o ia o se pepe. O le Keriso o ia foi o le tagata. O le mau a Paulo ia Timoteo e faapea: “Aua e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea. (1 Timoteo 2:5) I le evagelia a Luka na tatou suesueina i se taimi ua tuanai na tatou iloa ai o le tele o le tusitusiga a le fomai e faatatau i le itu tagata o Keriso.
E faatauaina e Luka le talaaga atoa o Keriso i lona valoia, lona soifua mai, lona tupuaga a o tamaitiiti o ia sa ia usitai i ona matua atoa ai ma lona tupu ae ma avea o ia o se tamaitiiti poto ma alofagia e le Atua atoa ma tagata. (Luka 2:51-52) O le tele foi o tusitusiga a Luka e faatatau i galuega a Keriso i lona itu i la le tino ma ana galuega aua le itu i la le tino poo fesootaiga a Keriso tagata e pei ona ia tusia ai le tele o faamalologa a Iesu na faia. A oo foi ina taua e Luka Keriso, o le suafa e faaigoaina ai e Luka Keriso o ia o le “Atalii o le tagata”.
O le Aeto
O le meaola lona fa e faamatalaina e Ioane e pei o se aeto ua lele. O le aeto o se manu malosi. O se manu lele maualuga. O se manu e mamao tele lana vaai. Poo le a le maualuga o le vanimonimo e lele ai le aeto ae mafai ona ia iloa mamao mai lava le isumu, le moa ma meaola ninii faapena poo ana meaai. O le Atua e mamao ma maualuga lona afioaga. E maualuga o ia, e leai se tasi e mafaatusalia i ai o ia. Peitai e leai se mea e lilo i lana silafaga.
Fai mai le tala a Paulo i le ekalesia i Filipi ‘Ia ia te outou lenei manatu sa ia Keriso Iesu, o le sa uiga faatasi ma le Atua, e lei manatu o ia e uumau lona tulaga tutusa ma le Atua, ae ua sasaa atu e ia o ia lava e fai mona uiga le pologa i lona fanau mai e pei o tagata’ (Filipi 2:5-7) E ui i le maualauga o le Atua peitai na ia silafia mamao mai lava i lona nofoalii le moomia e oe ma au o le faamagaloina o a taua agasala, o lea na ia afio mai ai. O ia o le Lokou, ma ua liutino tagata foi le Lokou.
O le matua tauavae lea o le evagelia a Ioane. O le faamatalaina o le afio mai o Keriso. “Aua ua faapea ona alofa mai o le Atua i le lalolagi ua ia auina mai lona Alo pele e toatasi ina ia le fano se tasi e faatuatua ia te ia ae maua le ola e faavavau.” (Ioane 3:16)
E ese le tele ma le mataina o le alofa o le Atua mo oe ma au. Ua ia afio mai mo le faamagaloina o ta agasala. Na pau le mea ta te faia o le faamaulalo, ma talia o ia i o tatou loto o ia o le Alii ma le Faaola.
Ia faamanuia le Atua ia te oe
Lui Ponifasio
