E faatalofa atu i le suafa o Keriso lo tatou Alii, le Ao o le Ekalesia. Malo le soifua ma le lagi e mama. Atonu sa manuia le alo atu i le faamamaluina o le Aso Sa faapitoa mo tatou tama uma o aiga taitasi i le aso ananafi. E ese le taua o tama i totonu o tatou aiga uma.
O le vaiaso na tea nei na tatou talanoa ai i le ekalesia i Laotikaia e fitu i ai ekalesia ia na tusi i ai Keriso ma tuuina atu le faaaliga poo lona finagalo e auala atu i le aposetolo o Ioane.
I le Faaaliga 3:17 o loo tuuina atu ai e Keriso se lapataiga i le ekalesia ona o le tulaga e pei ona tatou vaaai i le vaiaso na tea nei. O se ekalesia faaleogalua. Ua le vevela, le maalili.
E pei ona ou taua i le vaiaso na tea nei o le ata foi lea o le tele o ekalesia i nei ona po aemaise foi le ekalesia aoao a le Atua i soo se fata faitaulaga. Ua leai se vevela faaleagaga ae ua maalili le alofa i le Atua ma leai se naunau i mea tau i le Atua.
O le faaleogalua o le ata lea o le tagata e foliga mai e auai i mea faaleagaga ae leai se naunau i le Atua. O se faataitaiga, o le tagata e auai o ia i le aufaipese, o se galuega faaleagaga o loo lagiina ai viiga o le Atua. Peitai o le soifuaga ua leai se taumafai ina ia ola faamamaina pe ola paia i luma o le Atua.
O nisi ua iai le manatu a tele lava le lafoga poo le taulaga i le vaiaso ma tupe e foai, ua lava lea atonu e fiafia mai i ai le Atua. Manatua o le ola usiusitai o loo naunau mai ai le Atua ia te oe ae le o taulaga o loo faatusaina i le gao o le mamoe poa.
A o tatou talanoa i tupe, o se tasi lea o vaega sa tautaua ai Laotikaia o le maua o mea ma iai tupe i lima o tagata. E le o se poto le faasausili i mea ua maua.
O le manatu lea sa i le ekalesia i Laotikaia. “Aua ua e fai mai ou te se mauoa, ua faatamaoaigaina au, ou te le mativa foi i se mea e tasi…….(3:17). E ese le papau o le tofa. O le agasala ua aafia ai Laotikaia o le manatu faasausili i le tamaoaiga ia maua. O se ekalesia atonu e tele le foai ma maua tupe ma tele faaputugatupe i vaiaso taitasi i le faletupe.
Manatua foi o lea e inoino i ai Keriso ona o le faaleogalua.
Soo se ekalesia e faamuamua tupe nai lo le ola faaolaina o tagata e tatau ona faaeteete. O le ekalesia e le o se kalapu faaputu tupe. E le o se fale tupe. E iai vaega e tatau ona faamuamua i le ekalesia nai lo tupe. E masani ona fua e nisi le malosi ma le lelei o le ekalesia e ala i tupe maua. E tele tupe e maua i saoga tupe, ma taulaga faapitoa ona faapea lea o le ola galulue o tagata. Manatua foi e mafai lava ona galue ma le malosi i la le tino ae o loo oti pea faaleagaga.
E le o se faaleaga ia tatou ekalesia ae sei toe silasila ifo lava i le tele o saoga tupe o loo fai atoa ai ma le tele o teugatupe ma tusi tupe.
O nisi o ekalesia ua fai faleaiga ma sailiga tupe a le mafutaga a tama, faapena foi le mafutaga a tina, o loo saili tupe foi le aufaipese mo se toniga, ae o le malaga foi a le autalavou o loo faia ai a latou faleaiga atoa ai ma le aoga Aso Sa foi latou ia.
Ae a tatou toe tagai totoa lava i ai, ua aofia uma lava le aiga i le sailiga tupe. E oo ae i le taimi e fai ai le taulaga o le loto malie o loo fetalai ai le Atua ae faia ma le oi.
O tagata uma o le ekalesia e tatau ona foai, e tatau ona aoaoina e foai ae le o le faamalosia e ala i lafoga. Manatua o loo aoao le Tusi Paia e foai i le loto malie ae le o le faatauanauina e pei ona faatonuina ai e Paulo le ekalesia i Korinito.
O nisi la o ekalesia ua iai manatu e faatauaina mea e maua aemaise o tupe. Ua tutu galuega tetele ma lelei le tamaoaiga i faletupe, o se mea lelei tele lea peitai afai ae afaina le ola tapuai, le ola naunau, le ola alofa i le Atua, le ola faamamaina ae silisili ai le fanau fouina o le agaga, o lona uiga ua tatou misia le mea e sili ona taua.
O loo iai le mativa faaleagaga i le ekalesia ma tagata ona ua sili atu galuega faaletino nai lo le ola faaleagaga. Ia manino mai le tulaga lenei Samoa, e leai se faasea poo se faatauagavale i le galuegafai i totonu o ekalesia, o le finagalo lea o le Atua peitai o le upu e masani ai Samoa ‘aua nei avea le naunau i le ia ma mea e masae ai le upega,’ nei avea le naunau i le mea e maua mai ma tulai mai ma auala o le iai o se masae faaleagaga i le soifua tapuai.
Ia leoleoina e le Agaga o le Atua lana ekalesia Kerisiano mai le faaseseina o latou loto e pei o Laotikaia na fai mai, “Aua ua e fai mai ou te se mauoa, ua faatamaoaigaina au, ou te le mativa foi i se mea e tasi…………..(3:17).
Silasila foi i le fetalaiga a Keriso i le Ekalesia, “a ua e le iloa e oe le malaia, ma le pagatia ma le mativa, ma le tauaso ma le le lavalava” (3:17).
Ua iai se malaia i luga ia i tatou, se mativa faaleagaga, se tauaso faaleagaga, se le lavalava faaleagaga. O lena e ia te oe le tali o lena fesili. I susuga i faafeagaiga ma taitai o ekalesia, e le aoaia e laupua tamafaiga i sou finagalo, ae sei toe tagai ane ‘e afua mai mauga le manuia o le nuu’.
Tagai ane i totonu o le ekalesia pe o le a le tele o le taimi o le ekalesia o loo alu i sailiga tupe. O le tele o folafolaga i totonu o le ekalesia e faatatau i tupe, o le umi o fonotaga a le ekalesia e faatatau i le tala o le tupe. O le fua lena e iloa ai le mea o loo faamuamuaina i le ekalesia.
Manatua ua aoao le Tusi Paia i le Mataio 6:24 ‘…e le mafai ona tatou auauna i ni matai se toalua…’
Na tusi Paulo ia Timoteo a o avea o ia o le faifeau o le ekalesia i Efeso ma lapataia le faifeau e faapea “o le alofa i le tupe o le faapogai lea o mea leaga uma. 1 Timoteo 6:8-10.
Ia fesoasoani mai le Atua ia i tatou ina ia sao le mea e faamuamua e tusa ai ma le agaga lotu ma le nofo tapuai.
Soifua ona o Keriso
Lui Ponifasio
