I le agaga faaaloalo e toe faafeiloai atu ai i le paia ma le mamalu o Samoa lou atunuu pele i lenei aso. Faafetai i le agalelei o le Atua mo i tatou lana fanau.
O loo faasolosolo mai pea lona manuia mo i tatou i aso uma. Ua amata foi ona vaaia le susulu malosi o le la i lena vaiaso ua tuanai atu, ma e foliga mai ua amata ona faasolo mai le tau totogo atoa ai ma le tau mafanafana.
Ia viia pea le Atua.
E talu mai ona tatou talanoaina le Tusi o Faaaliga, e lei mapu i latou e valaau mai ma faailoa mai le agaga faafetai ona o le talanoaina o mataupu faatatau i ekalesia. Aemaise o le lagaina o nisi o vaega e tatau ona nofouta ma tagai totoa i ai ekalesia aemaise o taitai. Faafetai atu mo saunoaga matagofie. E le gata i lea o le tele foi o fesili e uiga lava i le Tusi o Faaaliga.
Manatua foi e pei ona ou taua i le tele o taimi ua tuanai, o le autu faamoemoe o le Malamalama i le Tusi Paia, o le taumafai e tuuina atu se aotelega o tusi taitasi e pei o se faafanua ina ia faigofie ai ona malamalama i le tusi atoa. Peitai o le a le agai le tusitusiga i le vailiiliina o mataupu ma fuaiupu taitasi, vagana ai nai vaiaso ua tuanai sa tatou matamata i ekalesia i le Tusi o Faaaliga ona e iai le lagona o tatou uma lava o tagata Samoa e o i le lotu ma o loo iai ni lesona taua mo i tatou uma lava, ma e le o faasino na o se ekalesia a o tagata lotu uma lava aua o le mea moni e leai se ekalesia e atoatoa. Sa ou mafaufau poo le a lau tali atu i se tusi e tuuina mai e Keriso mo le matou foi ekalesia. Faamata o le tatou tali atu i le Atua ae tofu ekalesia uma ma tusi i lenei vaiaso.
O le a tulai le faifeau ma lauina le tusi i le Aso Sa. O le a se tali atu a le tou ekalesia i lena tusi? Aua e pei o tusi i ekalesia ua mavae atu. E faailoa atu faaletonu ma lapataiga atoa ai ma faamanuiga ina ia filifili ai.
O le mea moni lava ua lava ekalesia nei e fitu i totonu o le Faaaliga e aumai ai se lesona mo tatou uma, aua o faafitauli lava e tasi e oo mai lava i le taimi nei o loo tutupu pea.
Laotikaia
O le ekalesia mulimuli o le Ekalesia lea i Laotikaia. 3:14-22
O Laotikaia masalo o le ekalesia lea e sili atu ona faamanuiaina i tulaga i la le tino nai lo isi ekalesia ua uma ona tatou talanoaina.
O loo taatia Laotikaia i le taulaiga o magaala taua i totonu o le atu Asia Laitiiti i le nofoaga tutotonu o pisinisi ma fefaatauaiga. Ina ua lulu mafuie tetele i le tausaga e 17, sa faapea ona fesoasoani le malo o Roma i nuu uma ma taualaga ina ia toe fausia, peitai ua na o Laotikaia lava na tago i lima le toe fauina o lona aai ona o le tamaoaiga o tagata aemaise o le aai atoa.
Manatua e foi i tala i isi ekalesia o le feagaiga fou na tatou talanoaina ai le tele o le aafiaga o le ekalesia ona o le siosiomaga o loo alaala ai tagata. E pei o Korinito, i le tele o le faitaaga i le aai ua oo atu lava i totonu o le ekalesia.
E le taumate o le tulaga foi lena o Laotikaia i le tulaga tau tamaoaiga atoa ai ma le maua o mea e tagata uma.
E tomua le tusi i le faapea atu o Keriso…“O mea nei ua fai mai ai le Amene (14). E pau lenei o le ekalesia o loo faaigoaina ai e Keriso le igoa lenei Amene e faatatau ia te ia. O le uiga o le upu Amene o le fai atu lea ‘Ioe e moni’. O loo faailoa atu e Keriso, ‘O au o le e moni’.
O lona uiga o mea uma o loo faailoa atu e Keriso i le ekalesia, e le o ni tala fatu, o mea o loo tau atu e le Keriso o mea moni. “O le molimau moni ma le faamaoni (14). E leai ni faaupuga e faatupu e Keriso. O le feau o loo tau faailoa atu e Keriso ona o le tulaga lenei o Laotikaia o se ekalesia piopio ma le faamaoni.
O Keriso o le Ao ia o le ekalesia, e le sao ai ni tatou mea faapiopio atoa ai ma le le faamaoni.
O le faafitauli tuga ua tupu nei i le ekalesia o loo taua i le fuaiupu e 15. “Ua ou iloa au galuega, e te le maalili, e te le vevela foi. Ou te loto ina ia e maalili pe vevela, o le mea lea ou te luai ai ia te oe i lou gutu”
E mafua ona teena e le manava se taumafa e te tausami ai ona ua iloa e le manava le le lelei o le taumafa mo le tino pe ona o le manogi foi o le taumafa. O nisi o taimi ona ua mai le tino ua le mafai ona toe talia se taumafa.
E foliga mai ua le taliaina e Keriso Laotikaia ona o loo iai se mea o faaletonu. Faaleogalua! Soo se ekalesia faaleogalua e oso ai le fia puai (sei tulou) o lo tatou Alii. O upu tuusao lava e le faaaloalo le finagalo o le Atua.
Afai o le faaleogalua o le ekalesia e le lelei, e tatau la ona tatou iloa pe faapei le vevela o le ekalesia o loo finagalo ai le Atua.
Ekalesia Vevela
A faamatala se taaloga aemaise lava se misa, e faapea uma e faamatala ai, “E matua vevela lava le taaloga a le au a Moataa ma Malisi, ia pe faapea foi, “E matua vevela lava fetauiga a David Tua ma Cameron. E faaaogaina upu vevela e faamatala ai se mea matautia poo se mea manaia o loo tupu.
Ai se manaia ae faamatalaina faapena o tatou ekalesia. Matua vevela lava le fono tatalo. Matua vevela lava le aoga Tusi Paia a le faifeau e fai i po o Aso Lua, e matua vevela i le fiafia o tagata e tapuai.
Matua vevela lava le molimau ma le le fefefe o le ekalesia e tautau Keriso. Vevela i le alofa i le Atua, vevela i le faia o galuega mo le manuia o tagata ae le na o latou lava.
O le ekalesia vevela, o le ekalesia o loo iai le afi o le Agaga o le Atua. Manatua foi ina ua afio mai le Agaga Paia i le uluai Ekalesia i Ierusalema, sa afio mai ma le afi i luga o le au soo.
Ekalesia Maalili
O le ekalesia maalili e faatusaina i le ekalesia e leai se mea o tupu ai. A oo ina e maalili na o lou nofo i le fale ma pulupulu lou ieafu ma faapupuu ai. O le ata lena o nisi o ekalesia. Maalili le alofa i le Atua, maalili le ola galue, maalili le fia saili i le afioga a le Atua. O mea o loo taua i luga o loo tupu i le ekalesia vevela, e le o tupu lea i le ekalesia maalili. Manatua na afio mai le Agaga Paia i le aso o le Penetekoso ma le laulaufaiva afi ae le o ni poloka aisa.
Ekalesia Faaleogalua
O le ekalesia faaleogalua, o se ekalesia lea e fai mea e foliga mai e vevela ae o loo maalili le loto e fai ai.
O loo fai mafutaga Tusi Paia ae leai nisi e fia o i ai, pe o foi ona o le faataunuu ae leai se naunau i le Upu a le Atua. O le ekalesia e tapuai ma o i le lotu i Aso Sa ona o le mea e masani ai ae leai se fiafia ma se naunau o tagata e tapuai ma feiloai ma le Atua i sauniga taitasi.
O le ekalesia faaleogalua e gata lava i totonu o le falesa le Kerisiano. E le iloa se Kerisiano i le aso o le vaiaso. O le Kerisiano e faatinoina i se nofoaga ae le o se soifuaga o aso uma.
I se faaupuga lata mai, o le ekalesia faaleogalua e fai ae fai augata. E fai ae faataga fai, e fai ona o le masani ai, e fai ona o le vaaaiga a tagata, e fai na ona faataunuu lava ae le o iai se loto, agaga, ma le faauuga ma le mana o le Agaga Paia o le Atua.
Oka le le fiafia o le Atua i nei ituaiga o lotu ma nei ituaiga o Kerisiano.
Samoa e, le atunuu pele, o le tagi a le pu mate, o oe ma au o tagata na tutupu ae i totonu o lotu. O lo ta olaga atoa o le lotu. Ae sei toe tagai ane poo e vevela, faaleogalua poo e maalili.
O se mea e inoino tele ai le Atua. Nei sasalu atu lava a tatou lotu ma le manatu o fiafia mai le Atua, ae ua leva ona inoino ma fia puai (sei tulou) lo tatou Alii ia tatou faiga lotu.
E pei o ana saunoga “Ua ava mai ia te au lenei nuu i o latou laugutu, a o latou loto ua taumamao ia te au. E tapuai fua mai i latou ia te au i lo latou fai ma mataupu o poloaiga a tagata”. (Mataio 15:8)
Siaki nei. Toe liuliu nei le tofa. Fai nei se suiga fou. Amata i lou ofoina atu o oe i le Atua. “…………Ia outou tuuina atu o outou tino i le Atua o se taulaga ola, paia ma le malie, o le mea lea e tatau ona outou faia. (Roma 12:1)
Faamanuia le Atua i lau filifiliga
