E faafeiloai atu i le suafa Manumalo o le Alii o le Toetu, Iesu Keriso ia te oe i lenei aso. Faamalo le soifua laulelei, faamalo le onosai i feau ma galuega. E momoli foi le faamalo i tina ma tama matutua, o nai o tatou matua tausi o loo nofofale ma fai le faiva o Feepo o le pati taoto ma taputapuai i alofaiva o fanau i galuega ma aoaoga aua se manuia o aiga.
E lagona e le tino le fesuisuiai o le tau o le atunuu nei ona ua lata mai le taumalulu ae o le talitonuga o loo maualuga pea le agalelei o le Atua ma malutia o tatou ola vaivai i ona aao alofa.
Ua tuanai atu nei le vaiaso sa sili poo le vaiaso paia i le kalena faakerisiano na sei faamanatuina ai le maliu ma le toetu o Keriso. E ui e leai ni faamaumauga tutu o le taimi lea ma le aso na maliu ai Keriso, peitai o loo tatou o i le vaitau tali lalata e pei o tusitusiga a le uluai ekalesia ma faamaumauga a tusitala.
O loo finauina e nisi e faapea e le tatau ona faamamaluina le aso maliu ona e le o le taimi tonu lea. Ou te talitonu au e le taua tele le taimi ae o le uiga o le aso. E leai foi se tasi o tatou e faamanatuina lona aso fanau i le taimi tonu lava na ui mai ai i fafo mai le manava o lona tina sei tulou.
Avea lenei vaitau o se toe luitau ma se toe amanaiaina i o tatou loto le tele o le faaolataga ua saunia e Keriso mo oe ma au, e tusa lava pe e te lotu pe leai, pe e te talitonu i ai pe leai, ae ua lava tapena le taulaga e tasi a Keriso i Kalevario ina ia e maua ma ou maua le ola e faavavau, pe a tatou faatagaina o Ia i lou loto.
O le a faaauauina le tatou talatalanoaga i le tusi o Faaaliga. Faamalo le onosai o lea ua lata ina faaiu le tusi. O le mataupu e 18 o loo tatou iai ma o loo tatou vaavaai i mea o le a tutupu ma aumai ai se aoaoga mo i tatou e tapenaina ai le ola faaleagaga.
I nai vaiaso ua tuanai na tatou vaaia ai le ata matautia o Papelonia le aai tele ua faatafunaina.
Fai mai le mau a Ioane, o tupu o le lalolagi sa faitaaga ma faafiafia ma ia ua na o le tutu ma taufaitagi ia te ia ma taufaitagitui pe a o latou vaai atu i le asu o lona susunuina (9).
O tagata foi ua tutu mamao ma fefefe i lona puapuaga ma fetagisi e faapea ‘aue Papelonia, aue Papelonia le aai tele ma le aai malosi aua o le itu aso e tasi ua oo mai ai le sala.
I le fuaiupu e sefulu tasi o loo iloa ai le toe mafai ona iai ni fefaatauaiga.
Ua le toe iai se taua o mea sa masani ona faatauaina e le au fai oloa ma le au faipisinisi
I le fuaiupu e sefululua e oo i le sefulu fa o loo sau ai le lisi o le tele o mea o le a le toe taulia ma faatauina. E amata mai i auro ma ario ma maa taua e oo lava i mea taumafa, o vaiinu, o manu vaefa, o auala o loo faaaogaina mo femalagaaiga e leai se mea e toe iai sona tau i lea taimi.
Ua amata ona iloa e le tiapolo ua faitau aso ma itula ona toe taimi. I le mataupu e 13 na tatou aoaoina ai le pule tutu a le anetikeriso na le mafai ai ona toe faatau atu pe faatau mai e se tasi soo se ituaiga o oloa e aunoa ma le faailoga poo le igoa o le manufeai i le muaulu poo le lima taumatau.
Peitai o lea ua tatou vaaia tusa lava pe iai nei numera ua le aoga lava lana auala poo lana fuafuaga na fafau e faagaoioia ai le lalolagi.
A o maimoa le lalolagi ma taufaitagi i le faatafunaina o Papelonia le aai tele, ae aumaia e le agelu se faamatalaga e faailoa mai ai le leaga o le lalolagi i lea taimi ma le matagofie o le lagi.
I le fuaiupu e luasefulu o loo faapea mai le agelu; ‘Ia e olioli ona o ia, le lagi e, atoa ma outou aposetolo paia ma perofeta aua ua faasalaina o ia e le Atua ona o le faasalaina o outou e ia”.
E toatele le fanau a le Atua na fasiotia, e oo i ana auauna o aposetolo ma perofeta na aafia o latou soifua ona o galuega faapapelonia a le tiapolo i ona po ma taimi sa soifua ai. O nisi o i latou tatou te iloa e pei o Setefano le uluai maturo, o Iakopo na fasiotia i le pelu, o Peteru i faamaumauga na faasatauroina faau i luga ona vae, sei tulou.
E ui i le tiga ma le faigata i lea taimi ae masalo ina ua latou vaaia mai le lagi le faaleagaina o le taitaiga faapapelonia na latou alalaga ma fiafia.
E le gata i le au aposetolo ma le au perofeta ae faapea foi o i latou uma na talaiina le finagalo o le Atua ma tagatavaleina, o le a faapea ona fiafia ma olioli aua e pei ona taua e le agelu “ua faasalaina o ia (Papelonia) e le Atua ona o le faasalaina o outou e ia” (20).
Na finagalo le Atua ia matua le toe iloa lava se Papelonia, ma na mafua ai ona alu ae le agelu malosi lava ma sii mai se maaolo tele lava ma lafo i le sami ma faapea atu, “E faapea ona lafoina Papelonia le aai e le toe iloa atu” (21).
O le toe iloa ana musika, ma ana mea faafiafia, o ana pese ma siva ma taina mea faifaaili (22).
O le a matua faaumatiaina mea uma tau Papelonia (22-23).
I le fuaiupu e 24 o loo taua mai ai le vaega masalo na mafua ona toatamai tele le Atua i le galuega a Papelonia, ma inaina ai lava ina ia faaumatia.
“Ua iloa foi ia te oe le toto o perofeta ma le au paia ma i latou uma ua fasiotia i le lalolagi.”
O auauna uma a le Atua ua fasiotia e mafua uma mai ona o le galuega faapapelonia o loo galueina le lalolagi. O se tasi lea o valoaga e lei faataunuuina lava i le Feagaiga Tuai e faatatau lea ia Papelonia.
Silasila i le Ieremia e 51:49-50. “E pau lava Papelonia, o tagata o Isaraelu ua fasia, ua pauu foi faatasi ma Papelonia o tagata ua fasia i nuu uma lava. O outou ua sao i le pelu, ina o ia outou aua le tutu; ia outou manatua le Alii ai le nuu mamao, ia outou manatunatu foi i Ierusalema”.
O se tasi lenei o valoaga e le gata o loo faatatauina ia Papelonia, o tagata o le Atua ae o loo faasino foi i le taimi ma le nofoaga o le faaleagaina o Ierusalema.
O Papelonia o loo faatatauina lea i le auala o loo faagaoioia ai le lalolagi e le tiapolo, (poo le upu faaperetania, o le system), ma le faaseseina o tagata i le agasala. O le olaga o le faamaualuga le le matau, o le faitaaga, o le fasioti tagata o tapuaiga pepelo ma le ifo i tupua, o onaga ma maseiga ma agasala uma. O le a faapea ona oo i le taimi e faaumaina ai e le Atua le mana ma pule o lenei system poo le ala o mea o loo faatautee i le Atua. E iai le talitonuga e tusa ma faamaumauga a le Tusi Paia, e pei foi ona iai lenei fuaiupu mai le Ieremia, o le ogatotonu o Ierusalema o le a vaaia ai e le lalolagi atoa le ‘pau o Papelonia’.
O i e faagataina ai le toasa o le Atua i le lalolagi ma ona puapuaga. I mataupu o loo totoe o le a tatou vaaia ai le faataunuuina o le faamasinoga a le Atua, ma le tapenaina o le toe afio faalua mai o Keriso. O le a o tatou vaaia lona mamalu. O se tuufaafeagai ma le mataga o loo iai le lalolagi i lona faatafunaina.
O Keriso lava o ia e manumalo. O ia lava le pule autu ma le ona le malosi uma lava.
Ia manuia lenei vaiaso. Ona o Keriso. Soifua
