O le tusi i le Ekalesia i Filitelefaia
E faafeiloai atu i le mamalu o si o tatou atunuu Samoa. Talitonu o loo maualuga pea le agalelei o le Atua i lou soifua i lenei aso.
O loo tatou talatalanoa pea i le Tusi o Faaaliga ma le finagalo o le Atua i Ekalesia o loo taua e maua ai se feau mo tatou uma aemaise ekalesia o loo tatou galulue ai.
O le ekalesia i Filitelefaia ua faapea Keriso ua tuuina atu ai i luma le faitotoa ua avanoa. O Paulo na talosaga i le ekalesia ia Kolose 4:3 ina ia tatalo mo avanoa aua le faasalalauina o le tala lelei.
Ua saunoa foi Keriso, o Filitelefaia ua iai se malosi itiiti. Poo le a se malosi itiiti o ia i tatou, e mautinoa ua lava lea ma totoe aua o le Atua lava ia ua avea ma o tatou malosi. A o tatou vaivai ona tatou malosi lea. 2 Korinito 12:9-10, “O le vaivai e faaatoaina ai lou mana. O lea ua tele ai lou fiafia i mea ou te vaivai ai, ina ia tumau i ou luga le mana o Keriso”.
O le malosi faaleagaga o le ekalesia e pei ona tatou talanoaina i vaiaso ua tuanai, e le faatusaina lea i le toatele o tagata aua e mafai lava ona toatele tagata ma mautu galuega faatino, ae o le ola faaleagaga ua matua gaogaoii lava.
O isi vaega na faaalia ai le fiafia o Keriso i lenei ekalesia ona o le tumau i le Upu. “Ua e tausia lau Upu” (8) E faalua (10) ona faailoa atu le fiafia o Keriso ona o le tausia e Filitelefaia o le Upu a le Atua. O le mafuaaga lena o le malosi o le Ekalesia. E ui e foliga mai e itiiti le ekalesia, peitai o loo avea pea ma ekalesia malosi ona o le tauusiusi i le Upu a le Atua.
O le Upu a le Atua e aumaia le malosi i le ekalesia. O le Upu a le Atua e aumaia le matua faaleagaga. “Faapei o tama meamea faatoa fananau mai ia naunau outou i le suasusu faaleagaga e le suia ina ia outou tutupu ai i le faaolataga (1 Peteru 2:2).
O le Upu a le Atua e aumaia le malamalama faaleagaga i le eklaesia. “Amuia le tagata e le savali i filifiliga a e amio leaga ……… ae naunau o ia i le tulafono a Ieova” (Faataoto 1:1-2).
O le Upu foi a le Atua e aumaia le saolotoga (Ioane 8:31-32).
O le Upu foi e faamamaina ma le faapaiaina ai totonu o le Ekalesia. “Ua uma ona faamamaina outou i le Upu na ou tautala atu ai ia te outou” (Ioane 15:3).
Na lapataia e Keriso lenei Ekalesia i nisi o vaega e tatau ona nofouta i ai. E tolu ni vaega e tatau ona mataituina e Filitelefaia. (11)
1. Faauta ou te vave alu atu (11). O le afio mai o Keriso e siitia lana fanau poo le ekalesia e faatusaina i le emo o le mata ma le sau o le gaoi i le po. E leai se tasi na te silafiaina, e leai foi se tasi la te taupule. E sau vave ma sau faaleiloga. O lona uiga e leai se taimi e sauni ai. O le taimi nei le taimi talafeagai e sauni ai.
2. Taofi mau i le mea ua ia te oe. O le ekalesia lenei i Filitelefaia o se ekalesia sa iai le naunau i mea faaleagaga. O se ekalesia e iloga ona tuputupu ae aemaise o le matutua faaleagaga o tagata. O se ekalesia e fiafia i le Upu. O nei itu lelei e mafai ona avea ma mailei pe a le mataala. E mafai ona faafefeteina tagata i le upu ae le ola ai. O loo naunau Keriso i le Ekalesia ina ia tumau ma taofi mau i le Upu. E oo mai lava foi i nei ona po.
O le tele ia o Ekalesia aemaise foi o taitai ma failotu e iloa le Upu ae le ola ai. Ua fia ni taitai o ekalesia ua afaina ona o le ava malosi ma isi vaivaiga faapena?
3. Taofi mau lou pale nei aveesea e se tasi. E pei ona tatou talanoaina muamua, o pale i le feagaiga fou o loo faatusaina lea i le manumalo ma le taui o tagata tausinio.
O lea ua maea taaloga o le Olimipeka o loo tufaina ai le tele o pine auro. Ae pei ona silafia ina ua amata mai nei taaloga e leai ni pine auro. A manumalo le tagata e faapaleina. O ina o loo faatusa ai e le Tusi Paia tagata manumalo o tagata e faapaleina. O loo faatatau le naunautaiga o Keriso i le ekalesia ina ia aua nei mavae pe vave fiu gofie le ekalesia i le Upu a le Atua, ma le maua ai e tagata le ola manumalo ona avea lea ma ala e le maua ai le faapaleina. Silasila i le Kolose 2:8.
Soo se Kerisiano e taua le onosai, tumau, aua le faavaivai ae ia faamalosi ma ola i le Upu nei lelea lou pale.
Ona faaiu lea o le tusi i le ekalesia i Filitelefaia i le folafola atu i ai o faamanuiaga e maua e le tagata ma le ekalesia e manumalo.
1. Muamua e avea lea tagata poo lea ekalesia e fai ma poutu o le malumalu o le Atua. E le toe ulufafo lava o ia. O poutu o vaega ia o le fale e mafai ona iloa mamao atu. O vaega foi ia o le fale e iloa ai le malosi o se fale atoa ma lona matagofie. Manatua foi o lea tatou te talanoa agai i fale i ia ona po e iai poutu malolosi i fafo e siomia ai le fale.
2. Lona lua o le a tusia mo ia le igoa o le Atua, faapea ma le igoa o le aai o le Atua atoa ai ma lona igoa fou. I se faaupuga lata mai, o le a fai lau saofai. O le a tuuina atu ia te oe se suafa taua. O le a iloa e tagata uma ia oe i le lagi. O le a faaeaeaina oe. E le gata e maua lou pale ae o le a tuuina atu ia te oe se suafa fou. E taua atu i lenei igoa o oe o le tagata o le lagi. O oe ua faamagaloina, o oe ua faaolaina. O oe o le a e maua le avanoa e nofotupu faatasi ai ma Keriso e faavavau.
3. O le vaega e tautaua ai tele Filitelefaia o le Upu a le Atua. O tagata o le Upu. O tagata e tausi i le Upu ma ola i le Upu.
Masalo ua e tau maua mai le ata poo le finagalo autu o le Atua mo lana ekalesia, talu ona tatou talanoa i ekalesia nei i totonu o le Tusi o Faaaliga.
O le finagalo o Keriso mo le ekalesia ina ia ola ma tumau i le Upu. O le finagalo tusitusia, finagalo faaalia, finagalo manino o le Atua, ina ia ola ai lana ekalesia.
Afai tatou te le usitaia lona finagalo, o le a tatou faatautaia le ekalesia ma o tatou olaga Kerisiano i o tatou manatu ma lagona, ae le o iai le Atua.
Ia manuia lenei vaiaso.
